काठमाडौं– दक्षिण अफ्रिकाको जोहनेसबर्गमा सम्पन्न विश्वका उदीयमान अर्थतन्त्रहरूको साझा संगठन ‘ब्रिक्स’को सम्मेलनमा सहभागी हुन पुगेका भारतीय नरेन्द्र मोदीको विमानस्थलमा स्वागतको विषयलाई लिएर विवाद नै सिर्जना भएको छ। खास गरेर दक्षिण अफ्रिकाका सञ्चारमाध्यममा प्रकाशित समाचारले गरेको दाबीपछि विवाद सिर्जना भएको हो।
दक्षिण अफ्रिकी मिडियामा प्रकाशित समाचारमा दाबी गरिएअनुसार जोहनेसबर्ग विमानस्थलमा अवतरणपछि मोदी विमानबाट बाहिर निस्किन मानेन्। आफ्नो स्वागतमा एउटा मन्त्रीलाई विमानस्थल पठाइएकोबारे मोदीले असन्तुष्टि जनाएका थिए।
दक्षिण अफ्रिकी पत्रिका डेली म्याभरेकले २३ अगस्टमा छापिएको समाचारको शीर्षक छ– कठिन त्रिकोणात्मक प्रेम: रामाफोसाले सीमा ध्यान केन्द्रित गर्दा मोदीले असन्तुष्टि जनाए र आफ्नो विमानबाट ओर्लिन अस्वीकार गरे। समाचारमा दक्षिण अफ्रिकाका राष्ट्रपति सिरिल रामाफोसाले चिनियाँ राष्ट्रपति सी चिनफिङमा ध्यान केन्द्रित मोदी असन्तुष्ट भएको दाबी गरिएको छ।
यद्यपि दक्षिण अफ्रिकाका उपराष्ट्रपतिका प्रवक्ताले डेली म्याभरेकको समाचारको खण्डन गर्दै समाचारमा दाबी गरिएअनुसार कुनै पनि परिस्थिति सिर्जना नभएको बताएका छन्।
दक्षिण अफ्रिकी सरकारले ब्रिक्सका सबै सदस्य राष्ट्रलाई सम्मेलनमा भाग लिन आउने राष्ट्र प्रमुख तथा सरकार प्रमुखलाई विमानस्थलमा कसले स्वागत गर्ने भन्नेबारे पहिले नै जानकारी गराइएको बताएको छ।
चिनियाँ राष्ट्रपतिको स्वागतका लागि दक्षिण अफ्रिकी राष्ट्रपति आफैं विमानस्थल पुगेका थिए। डेली म्याभरेकले समाचारमा उल्लेख गरेअनुसार दक्षिण अफ्रिकाका राष्ट्रपति सामाफोसाले चिनियाँ राष्ट्रपति सीलाई ‘अर्डर अफ साउथ अफ्रिका’बाट सम्मानित गरे। जुन त्यहाँको सर्वोच्च नागरिक सम्मान हो। उक्त अवधिमा दुवै नेताका कयौं कार्यक्रम सँगै आयोजित भएका थिए।
त्यसपछि दक्षिण अफ्रिकी मिडियामा चर्चा सुरु भयो कि रामाफोसा सी चिनफिङको अगुवाइमा व्यस्त थिए, तर वाटरक्लूफ एयर फोर्स बेसमा पुगेका नरेन्द्र मोदीको स्वागत गर्नका लागि आफ्ना एक क्याबिनेट मन्त्रीलाई पठाए। अरु मिडियाहरुमा पनि दाबी गर्न थालियो– विमानस्थलमा आफ्नो स्वागतका लागि क्याबिनेट मन्त्री पठाइँदा मोदी खुसी थिएनन्।
रिपोर्टमा दाबी गरिएको छ कि मोदीको ‘असन्तुष्टि’लाई सम्बोधन गर्न पछि राष्ट्रपति रामाफोसाले उपराष्ट्रपति पल शिपोकोसालाई विमानस्थल पठाए।
भारतीय प्रधानमन्त्रीको आधिकारिक ट्विटर (एक्स) ह्याण्डलमा मोदीलाई दक्षिण अफ्रिकाका उपराष्ट्रपति पल शिपोकोसाले विमानस्थलमा स्वागत गरिएको भनेर बताइएको छ।
डेली म्याभरेकले मोदीको स्वागतका सन्दर्भमा समाचार छापिएपछि आफ्नो साइटमा साइबर हमला भएको समेत बताएको छ। अखबारले एकपछि अर्को ट्विट गर्दै आरोप लगाएको छ कि उक्त समाचार प्रकाशित भएपछि आफ्नो साइटमा साइबर हमला भयो। साइबर हमलाबाट बच्नका लागि वेबसाइटलाई भारतमा ब्लक गर्नु परेको पनि अखबारले बताएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
