काठमाडौं- अस्पतालबाट शिशु गायब पारी सात लाख रुपैयाँमा बेचेको आरोपमा पक्राउ परेका ६ जनाविरुद्ध तीन वटा मुद्दा लगाइने भएको छ। जिल्ला प्रहरी कार्यालय मोरङका डीएसपी रन्जनकुमार दाहालले उनीहरु विरुद्ध तीन वटा कसुरमा मुद्दा चल्ने बताए।
उनीहरु विरुद्ध मानव बेचबिखन तथा ओसारपसार रकम लेनदेन तथा ठगी र संगठित अपराधको कसुरमा मुद्दा चलाइने डीएसपी दाहालले जानकारी दिए।
विराटनगरस्थित ग्रिनक्रस अस्पतालबाट बेपत्ता पारेर शिशु बेचेको आरोपमा मोरङ प्रहरीले ६ जनालाई केही दिनअघि मात्रै पक्राउ गरेको थियो।
पक्राउ पर्नेहरुमा शिशु बिक्रीमा संलग्न चिकित्सक कर्ण, खरिद गर्ने दिलमाया राजवंशी, अस्पतालमा कार्यरत सुधा राजवंशी, दिलमायाका पती सूर्यनारायण राजवंशी, भोजपुरको हतुवागडी गाउँपालिका–४ का गोविन्द राई र सिरहाको कल्याणपुर नगरपालिका–१२ की निर्मला यादव छन्।
अस्पतालका चिकित्सक तपेश्वर लाल कर्णको योजनामा शिशु ७ लाखमा बेचिएको प्रहरी अनुसन्धानले देखाएको छ।
प्रहरीको प्रारम्भिक अनुसन्धान अनुसार शिशु खरिद गर्ने दिलमाया राजवंशीले डा कर्णले शिशुको मूल्य पाँच लाख लिएको र उपचारका लागि थप दुई लाख रकम लिएको बयान दिएकी छिन्। प्रहरीले गत मंगलबार दिलमायाको घरबाट उक्त शिशुको उद्धार गरेको छ। अविवाहित जोडीबाट जन्मिएको उक्त शिशु बेपत्ता पारिएको भन्दै शिशुकी आमाले प्रहरीमा उजुरी दिएकी थिइन्।
अनुसन्धान गर्दै जाँदा मोरङको कटहरी गाउँपालिका–२ आदर्श टोलकी दिलमाया राजवंशीलाई शिशु बिक्री गरेको पत्ता लागेको हो। उक्त शिशुलाई आईसीयूमा राखेर उपचार गर्नुपर्ने भएकाले उपचारका लागि दुई लाख रकम दिएको राजवंशीले बयानमा बताएकी छिन्।
असार १४ गते जन्मिएकी नवजात शिशुलाई बेपत्ता पार्ने उनीहरुलाई अदालतबाट पाँच दिनको म्याद थप भई अनुसन्धान भइरहेको मोरङ प्रहरीले जानकारी दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
