काठमाडौं– नेकपा एमालेका अध्यक्ष केपी शर्मा ओली संगीतप्रेमी नेता हुन्। ओलीद्ये आफ्नै निवासमा संग्रहित बाजासँग ताल मिलाएको तस्बिर, भिडियो बेलाबखत आइरहन्छन्। ४ दिन अघि पनि ओलीले आफ्नो समाजिक सञ्जालमार्फत् एउटा म्यूजिक भिडियो शेयर गरे।
जहाँ उनले लेखेका थिए, ‘कलाकार यश कुमारको ‘सुस्तरी’ले सुस्तरी होइन, एकैपटक मन छोयो। नगर प्रहरी र मकै पोलेर गुजारा चलाउने किशोरी बीचको रोचक प्रेमकथा! हिजो बेलुका युटुबमा हेरेको लिंक शेयर गरेको छु, हेर्नुस् है!'
‘मैले छोएको पानी चल्दैन’ जस्तो चर्चित गीतबाट आफ्नो यश दुनियाँमाझ पुर्याएका यशकुमार बीचको केही समय फिल्मतिर मोडिए। फिल्मका कारण संगीतमा पुरानै लय कायम राख्न नसकेका उनी फेरि संगीतमा फर्किएका थिए। तर, उनको पुनरागमन भने सुस्तरी भइरहेको थियो। ‘सुस्तरी’ले चाहिँ उनको संगीतमा पुनरागमनको गति बढाउने संकेत देखिएको छ।
यो गीतमा उनले गायन र अभिनय दुवैको तीर्खा एकैपटक मेटाएका छन्। फिल्म र गीतलाई मिश्रण गरेका छन्। नगर प्रहरी र मकै पोल्ने युवतीको प्रेमकथालाई भिडियोमा उनेका छन्। ‘म्युजिकल फिल्म’ भनिएको यसलाई त्यसरी नै प्रस्तुत गरिएको छ।
शहरमा हरेक दिनजसो सडक व्यवसायी र नगर प्रहरीको झडप चल्छ। नगरी प्रहरीसँग फुटपाथ व्यवसायीको शत्रुताका कथाहरु थुप्रै लेखिएका छन् र देखिएका छन्। गायक तथा अभिनेता यशकुमारले त्यसलाई फरक दृष्टिबाट हेर्ने कोसिस गरेका छन्। व्यवसायिक बाध्यताबीच नगर प्रहरीमा देखिने मानवीयतालाई उनले प्रस्तुत गरेका छन्।
युवा नगर प्रहरी र युवती मकै पोल्ने युवतीबीच पलाउने प्रेमलाई उनले संगीतमार्फत् देखाएका छन्। संवाद्मार्फत् व्यवसायका कारण उत्पन्न शत्रुता प्रस्तुत गरेका छन्। संगीतमा यशकुमार भेराइटी रुचाउनेमा पर्दैनन्। सुन्ने गीत गाउन रुचाउने उनले यसमा त्यसलाई निरन्तरता दिन खोजेका छन्। तर, यसपल्ट गीत हेराउन पनि खोजेका छन्। फिल्मबाट लिएको अनुभवको झलक यो गीतको म्युजिक भिडियोमा देखिएको छ।
निकेश खड्काको निर्देशन रहेको गीतको हरेक दृष्यमा उत्तिकै मेहनत गर्न खोजिएको छ। गीत सुनाउनुका साथै १२ मिनेटमा एउटा फिल्मसमेत देखाइसक्ने उनको प्रयास दर्शकले रुचाएका छन्। त्यसैले युट्युबमा अपलोड भएको ४ दिन झन्डै ३० लाखले हेरिसकेका छन्।
यशकुमारकै शब्द तथा लय रहेको गीतमा नारी स्वर अनु चौधरीको सुन्न सकिन्छ। भिडियोमा उनीसँगै अनु थापा, राजेश घतानी, पन्ची तामाङ, अनिता लामा लगायतले अभिनय गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1765273665.jpg)
