समाचार

एक क्विन्टल सुन तस्करी प्रकरण: व्यापारी अडुकिया पक्राउ

नारायण अधिकारी शुक्रबार, साउन २६, २०८० १५:०३

सुन तस्करी प्रकरणमा नाम जोडिएका राकेश कुमार अडुकिया (फाइल तस्बिर)

काठमाडौं– एक क्विन्टल सुन तस्करीमा संलग्न रहेको भनिएका व्यापारी *राकेश कुमार अडुकिया छोरा रोहन अकुडिया पक्राउ परेका छन्। उनलाई त्रिभुवन अन्तर्राष्ट्रिय विमानस्थलबाट शुक्रबार पक्राउ गरिएको हो।

प्रहरीको केन्द्रीय अनुसन्धान ब्यूरो (सीआईबी) स्रोतले अडुकिया पक्राउ परेका पुष्टि गरेको छ। यसअघि राकेश नै *रोहन अडुकियाका नाममा आएको हुनसक्ने आशंका सीआइबीको थियो।

‘राकेश कुमार अडुकिया हुन् कि उनका छोरा रोहन अडुकिया हुन् भन्नेबारे अनुसन्धान भइरहेको छ। उनको साथमा रोहन अडुकियाको नामको राहदानी भेटिएको छ,’ सीआईबी स्रोतले भन्यो।

साउन २ गते त्रिभुवन अन्तर्राष्ट्रिय विमानस्थलको भन्सारबाट जाँचपास भएर बाहिरिएको सुन तस्करीमा अडुकियाको संलग्नता रहेको भन्दै प्रहरीले उनको खोजी सुरु गरेको थियो। सुन बरामद भएपछि व्यापारी अडुकिया फरार थिए।

सुन बरामद गरेको राजस्व अनुसन्धान विभागको टोलीले साउन ११ गते, बुधबार काठमाडौंको कमलपोखरीस्थित अडुकियाको घरमा छापा मारेको थियो। राजस्व अनुसन्धान विभागले घरमा छापा मार्दासम्म उनी फरार भइसकेका थिए।

अनुसन्धानका क्रममा राकेश नेपाल र भारत दुबै देशको राहदानी भएका व्यापारी रहेको खुलेको थियो। उनले काठमाडौं, दिल्ली, दुबई, हङकङको भ्रमण गरिरहने गरेको रिपोर्ट कार्ड देखिएपछि सुन तस्करीमा उनको संलग्नताको थप आधार फेला परेको राजस्व अनुसन्धान स्रोतले जनाएको थियो।

अडुकियाले जेड ६३९६४२१ नम्बरको भारतीय राहदानी बोकेर विदेश भ्रमण गर्ने गरेको खुलेको थियो।

बरामद भएको १ क्विन्टल सुन हङकङबाट नेपाल आएको थियो। उक्त सुन बरामद हुनुभन्दा १ महिना अगाडि मात्रै उनी हङकङ गएको खुलेको थियो।

उनी सेयर बजारका चर्चित खेलाडी समेत हुन्। उनी लामो समयदेखि सेयर मार्केटमा संलग्न थिए। गोर्खा विकास बैंक काण्डपछि उनी सेयर बजारको ठूलो खेलाडीबाट विस्थापित भए। त्यसपछि उनी सुनको धन्दामा लागेको हुनसक्ने आशंका गरिएको छ।

गोर्खा विकास गोर्खा विकासमार्फत् सर्वसाधारणको करौडौं निक्षेप डुबाउनेमा पनि उनको मुख्य भूमिका रहेको थियो।

अडुकियाले ‘तीन घुम्ती चलचित्र’ समेत निर्माण गरेका थिए । नेपाली कांग्रेसका संस्थापक नेता तथा नेपालका प्रथम जननिर्वाचित प्रधानमन्त्री विश्वेश्वर प्रसाद कोइरालाको उपन्यास‘तीन घुम्ती’मा आधारित रहेर अडुकियाले २०७३ सालमा चलचित्र निर्माण गरेका थिए।

*प्रारम्भिक जानकारीमा राकेश उल्लेख भएकोमा क्षमायाचनासहित सच्याइएको छ। - सम्पादक