युरोप पठाउने नाममा लाखौं ठगी

सुरक्षा/अपराध

कल्पना घिमिरे शनिबार, साउन २०, २०८० ०९:१९

काठमाडौं– पोल्याण्ड पठाइदिन्छु भन्दै रू एक लाख २० हजार ठगी गरेको आरोप लागेका पाल्पाका पुरण अस्लामीलाई काठमाडौं अपराध अनुसन्धान कार्यालयले मंगलबार पक्राउ गर्‍यो।

अस्लामीले धनञ्जय चौधरीलाई पोल्याण्ड पुगेपछि होटलमा काम लगाइदिन्छु भन्दै प्रलोभन देखाएर ८ लाख रुपैयाँ माग गरेका थिए। तर एक लाख २० हजार रुपैयाँ पाएपछि अस्लामी एकाएक सम्पर्कविहीन बने। त्यसपछि चौधरीले वैदेशिक रोजगार विभागमा खबर गरे।

विभागले पक्राउ गर्न आदेश गरेपछि गोकर्णेश्वरबाट सोमबार पक्राउ गरेर मंगलबार वैदेशिक रोजगार विभाग पठाइएको कार्यालयका प्रवक्ता रवीन्द्र रेग्मीले जानकारी दिए।

यो भन्दा दुई दिनअघि मात्रै द नेदरल्याण्डस पठाइदिन्छु भन्दै ६ जनालाई ४४ लाख ५० हजार रुपैयाँ ठगी गरेको आरोपमा महोत्तरीका कपिल बर्मालाई अपराध अनुसन्धान कार्यालयले पक्राउ गरेको थियो। महोत्तरी जलेश्वर–१३ स्थायी घर भएका बर्मा काठमाडौंको शान्तिनगरमा बस्दै आएका थिए। बर्माले द नेदरल्याण्डस पुगेपछि सुपरमार्केटमा स्टोरकिपरको काम लगाइदिने र मासिक तलब दुई लाखभन्दा बढि हुन्छ भन्दै प्रलोभनमा पारेर प्रतिव्यक्ति १२ लाख लिएका थिए।

गत १० गते क्रोएशिया पठाउँछु भन्दै ६ लाख रुपैयाँ ठगी गरेको आरोपमा पचलन राई पक्राउ परे। राईले समरबहादुर परियारलाई क्रोएशियामा मासिक एक लाख रुपैयाँ कमाइ हुने भन्दै प्रलोभन देखाएर रकम लिएर फरार रहेका थिए। सोही दिन पोल्याण्ड पठाउँछु भन्दै आठ लाख रुपैयाँ लिएर सम्पर्कविहीन बनेका अनन्तप्रकाश श्रेष्ठलाई पनि कार्यालयले पक्राउ गरेको थियो। उनीमाथि योगेन्द्रबहादुर साउदलाई पोल्याण्डमा २ लाख तलब हुने कम्पनीमा काम लगाइदिन्छु भन्दै १२ लाख रुपैयाँ लिएको आरोप लागेको थियो।

यी भए चालू आर्थिक वर्ष २०८०/२०८१ यताका ठगीका उजुरी। वैदेशिक रोजगारीका लागि युरोपेली मुलुक लगायतका अन्य विकसित मुलुकमा जाने नेपाली ठगीमा पर्ने गरेका छन्। युरोपियन मुलुकमा कमाइ राम्रो हुने भन्दै युवाहरुलाई प्रलोभनमा पारी ठगी गर्ने प्रवृत्ति बढ्दै गएको कार्यालयका प्रवक्ता रेग्मी बताउँछन्। यसरी ठगी गर्नेलाई वैदेशिक रोजगार विभाग र काठमाडौं अपराध अनुसन्धान कार्यालयको समन्वयमा कारबाही गरिँदै आएको उनको भनाइ छ।

अहिले कार्यालयमा ठगीका निवेदनको चाङ लाग्ने गरेको उनले बताए। ‘यस्ता ठगीका थुप्रै निवेदन आउने गरेका छन्। यस्तो किसिमको ठगी गर्नेलाई निवेदनका आधारमा पक्राउ गरी कारबाही गर्ने गरेका छौं,’ उनले भने।

उनका अनुसार आर्थिक वर्ष २०७९/२०८० को असार मसान्तासम्म ४०३ ओटा ठगीका निवेदन कार्यलयमा परेका छन्। जसमध्ये आर्थिक वर्ष २०७९/०८० को जेठ महिनासम्ममा १७६ निवेदन कार्यालयमा परेका छन्। उक्त निवेदनका अनुसार पीडितको ठगीको बिगो कूल १३ करोड ५३ लाख २८ हजार एक सय रुपैयाँ रहेको छ।

जसमध्ये ८ वटा मुद्दा दर्ता भएको कार्यालयले जनाएको छ। जसको २ करोड ५९ लाख १८ हजार दुई सय रुपैयाँ मुद्दा बिगो दाबी गरेको छ। कार्यालयले ५८ जनालाई पक्राउ गरी कारबाहीसमेत गरेको छ भने उक्त क्रममा ५८ जनासँग २१ लाख २३ हजार रुपैयाँ बिगो दाबी गरेको छ। यस्तै अवैध रुपमा लाओस पुगेका १३ जना नेपालीलाई गत माघ १० गते लाओसबाट फिर्ता ल्याइएको कार्यालयले जनाएको छ।

अपराध अनुसन्धान कार्यलयमा दर्ता भएका महिनागत दिवेदनहरु:

सि=नं=	महिना	निवेदन संख्या	मुद्दा दर्ता संख्या	बिगो	मुद्दा बिगो	पक्राउ तथा कारबाही संख्या	असुल बिगो	अ=अ जारी
१	साउन	८		५०,३६,०००		३	८,००,०००	५
२	भदौ	२		३,८९,०००				२
३	असोज	१		३०,००,०००		२		१
४	कात्तिक	२		२,१०,०००		१	५०,०००	१
५	मंसिर	७		२,८७,२०,०००		२	२,२०,०००	५
६	पुस	२१	२	२,४४,५५,०००	१,७०,०६,०००	१	६०,०००	१८
७	माघ	१२		६१,९६,०००		३	१०,२५,०००	९
८	फागुन	२५	३	२,२७,२१,२००	१५,००,०००	१०	१,१२,६०,०००	१२
९	चैत्र	४८	१	१,७१,७२,९००		१८	८४,३२,९००	२९
१०	बैशाख	२५	१	२,०२,००,०००	६६,३७,०००	११	१,०८,५७,०००	१३
११	जेठ	२५	१	७२,२८,०००	७,७५,२००	९	२१,२३,०००	१५
१२	असार
	जम्मा	१७६	८	१३,५३,२८,१००	२,५९,१८,२००	५८	३,४८,२७,९००	११०

स्रोतः काठमाडौं अपराध अनुसन्धान कार्यालय मिनभवन

सोही आर्थिक वर्षको असार मसान्तसम्ममा विभागबाट विदेश पठाउने नाममा ठगी गर्ने २२० जनाको नाममा पक्राउ पुर्जी जारी भएको छ। जसमध्ये ६४ जना पुरुष र १७ जना महिला गरी ८१ जना पक्राउ परेका छन्। जसको मुद्दामा बिगो २ करोड २२ लाख २८ हजार सात सय रुपैयाँ तोकिएको छ।

विभागबाट प्राप्त पक्राउ पुर्जीको सम्बन्धमा भए/गरेका महिनागत कार्य विवरण:

सि=नं=	महिना	पक्राउ पुर्जी संख्या	पक्राउ संख्या	पुरुष	महिला	बिगो
१	साउन	१७	८	७	१	१,५६,००,०००
२	भदौ	४	४	२	२	५१,७५,०००
३	असोज	५	३	२	१	६५,००,०००
४	कात्तिक	११
५	मंसिर	६	३	२	१	६२,००,०००
६	पुस	१७	४	४		१,७२,६२,०००
७	माघ	३७	८	६	२	१,५५,००,०००
८	फागुन	२६	६	४	२	४२,००,०००
९	चैत्र	२५	४	३	१	१,४३,००,०००
१०	बैशाख	४६	२६	२१	५	११,९७,३४,०००
११	जेठ	१८	१०	८	२	१,३५,१६,०००
१२	असार	८	५	५		४३,००,०००
	जम्मा	२२०	८१	३४	१७	२२,२२,८७,०००

स्रोतः काठमाडौं अपराध अनुसन्धान कार्यालय मिनभवन
यस्तै वर्षभरीमा काठमाडौं बाहिरबाट समन्वय गरी ६ पुरुष र १ महिला गरी ठगीमा संलग्न ७ जना पक्राउ गरिएको छ। जसमध्ये कात्तिकमा बाराका १ पुरूष, माघमा धादिङकी १ महिला, फागुनमा मकवानपुर र पूर्वी नवलपरासीका १/१ पुरुष, वैशाखमा रौतहट र झापा जिल्लाका १/१ पुरुष र जेठमा नवलपरासी पूर्वकै १ पुरुष पक्राउ परेका छन्।

सचेत रहन मन्त्रालयको आग्रह
युरोपका नाममा युवा ठगिने क्रम बढेपछि श्रम, रोजगार तथा सामाजिक सुरक्षा मन्त्रालयले विज्ञप्तिमार्फत् सचेत गराएको छ। मन्त्रालयका सहसचिव डण्डुराज घिमिरेले एक विज्ञप्ति जारी गर्दै वैदेशिक रोजगारीका लागि विभिन्न प्रलोभनमा पारेर ठगी गरेको पाइएकाले त्यसप्रति सचेत रहन आग्रह गरेका छन्।

पछिल्लो समय आकर्षक सेवासुविधाको प्रलोभन देखाई पोर्चुगल, माल्टा, रोमानिया, पोल्यान्डलगायतका युरोपियन देशमा रोजगारी दिने बहानामा लाखौं रुपैयाँ ठगी भइरहेको सार्वजनिक भएसँगै मन्त्रालयले सचेत गराएको हो। यस प्रकारका ठगीका विषयमा सूक्ष्म अध्ययनसमेत भइरहेको मन्त्रालयले जनाएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।