काठमाडौं– जलस्रोत तथा सिँचाई विभागका तत्कालीन महानिर्देशक मधुकरप्रसाद राजभण्डारीविरुद्ध ३ करोड ५६ लाख ७७ हजार ४ सय ४६ रुपैयाँको भ्रष्टाचार मुद्दा दायर भएको छ।
राजभण्डारीले पदको अनुचित लाभ लिँदै गैरकानुनी सम्पत्ति आर्जन गरेकाले अख्तियारले सो बराबरको बिगो, जरिवाना र कैद सजाय गर्न माग अभियोगपत्रमा गरेको छ।
राजभण्डारीले सार्वजनिक सेवामा प्रवेश गरेको २०५१ फागुन ३० देखि २०७९ भदौ ३१ गतेसम्मको अनुसन्धान जाँच अवधिमा उनको उक्त सम्पत्तिको स्रोत खुल्न नसकेको दाबी अभियोगपत्रमा गरिएको छ।
उनको कूल ३ करोड ८५ लाख ५१ हजार ७ सय ४० रुपैयाँको मात्र स्रोत खुलेको र अन्य रकमको कुनै पनि स्रोत नखुलेकाले अन्य आर्जन अवैध देखिएको अभियोगपत्रमा उल्लेख गरिएको छ।
राजभण्डारीको सबै सम्पत्ति मूल्यांकन गर्दा ७ करोड ४२ लाख २९ हजार ८६ देखिएको र त्यसमध्ये ३ करोड ५६ लाख ७७ हजारको स्रोत नखुलेको अभियोगपत्रमा उल्लेख छ।
राजभण्डारीले अमिल्दो र अस्वाभाविक उच्च जीवनयापन गरेको पुष्टि हुन आएकोले भ्रष्टाचार निवारण ऐन अनुसार कैद सजाय पनि हुनुपर्ने अभियोगपत्रमा माग गरिएको छ।
त्यस्तै राजभण्डारीले जाँच अवधिमा गैरकानुनी रुपमा आर्जन गरेको सम्पत्ति श्रीमतीको नाममा हाल कायम रहेको स्रोत नखुलेको सम्पत्ति पनि जफत गर्न अख्तियारले माग गरेको छ। उनले सार्वजनिक सेवाको पदमा रहेर आफ्नो पदको दुरुपयोग गरी गैरकानुनी रुपमा आर्जन गरेको स्रोत नखुल्ने सम्पत्ति श्रीमती दीपा श्रेष्ठको नाममा खरिद गरिएको दाबी अख्तियारले गरेको छ।
अख्तियारले सोमबार विशेष अदालतमा भ्रष्टाचार मुद्दा दायर गरेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789383080.png)
