काठमाडौं– नेपाली नागरिकलाई भुटानी शरणार्थी बनाउँदै अमेरिका लैजाने भन्दै करोडौं ठगीमा संलग्न भएको आरोपमा पक्राउ परेका पूर्वगृहमन्त्री बालकृष्ण खाणले हाइप्रोफाइल अधिवक्ताहरु उतार्दै न्यायाधीशमाथि दबाबको रणनीति राखेका छन्।
नेपाली कांग्रेसका प्रभावशाली नेता तथा पूर्वगृहमन्त्री खाणले बार अध्यक्ष, पूर्वमहान्यायाधिवक्तासहित वरिष्ठ अधिवक्ताहरुलाई बहसमा उतार्दै दबाब सिर्जनाको रणनीति बनाएका हुन्। खाणको पक्षबाट मंगलबार पूरै दिन र बुधबार आधा दिन (खाजा ब्रेक) अघिसम्म बहस भएको छ। मंगलबार नै सबै प्रतिवादीहरुको तर्फबाट बहस सक्न न्यायाधीश प्रेमराज न्यौपानेले आदेश दिए पनि खाण पक्षकै बहस मंगलबार सकिएन।
मंगलबार साँझ अबेरसंम अधिवक्ता मनिराम उपाध्यायले बहस गरेका थिए। त्यसपछि न्यायाधीश न्यौपानेले अब तपाईंहरुको समय सकियो, बाँकी प्रतिवादीहरुको तर्फबाट बहस हुन्छ भनेका थिए। त्यसपछि खाणको पक्षमा बहस गर्न भनेर पुगेका पूर्वमहान्यायधिवक्ता खम्बहादुर खातीसहित अधिवक्ताहरूको टोलीले आफूहरुलाई अझै समय चाहिने बताएका थिए।
त्यसपछि न्यायाधीश न्यौपानेले दिग्दार हुँदै भने ‘अब त मैले हात उठाउने बेला भइसक्यो। तपाईंहरुलाई पहिला नै भनेको होइन, आज सबैको बहस सक्नुपर्छ भनेर। तपाईंहरुले अदालतलाई नै निरीह बनाउनुभयो। एउटै कुरा दोहोर्याएर समय खेर फाल्ने? सबै कुरा आइसक्यो अब नाम टिपाउनुस्।’
तर न्यायाधीशको भनाइमा खाणका अधिवक्ताहरु सहमत भएनन्। बुधबार खाजा ब्रेकअघिसम्मको समय मागे। त्यसपछि न्यायाधीशले १२ बजेभित्र सक्न भने। तर एक घण्टामा नसकिने र खाजा ब्रेकसम्मको समय मागेका थिए। सोही अनुसार बुधबार पनि खाणको पक्षबाट पूर्वमहान्यायाधिवक्ता खाती, नेपाल बार एशोसियसनका अध्यक्ष गोपालकृष्ण घिमिरे र वरिष्ठ अधिवक्ता ललित बस्नेतले बहस गरे।
खाणको प्रतिरक्षामा उत्रिएका अधिवक्ताहरु सरह नै समय अन्य प्रतिवादीहरुका अधिवक्तालाई दिने हो भने एक महिनामा पनि प्रतिरक्षा बहस नसकिने हुन्थ्यो। तर अन्य प्रतिवादीका अधिवक्तालाई भने खाणको जसरी डेढ दिनको समय न्यायाधीश न्यौपानेले दिएनन्।
बहालवालासहित बारका ५ पूर्वअध्यक्ष र २ पूर्वमहान्यायाधिवक्ताले गरे बहस
डीएलएमा संलग्न रहेका र बारका पदाधिकारी रहेका अधिवक्ताहरुसहित ३० भन्दा बढीले खाणको पक्षबाट बहस गर्न भन्दै नाम टिपाएका थिए। तर बहसका लागि समय नपाएपछि नाम समावेश गरिदिन भन्दै थप नाम टिपाएका छन्।
खाणको पक्षबाट प्रतिरक्षा बहस गरेका अधिवक्ताहरु सबैजसो हाइप्रोफाइल छन्। दुईदिन गरेर खाणको पक्षबाट १३ जनाले बहस गरे। जसमध्ये बारका बहालवाला अध्यक्षसहित चार पूर्व अध्यक्ष छन्।
बारका अध्यक्ष गोपालकृष्ण घिमिरे, अर्का वरिष्ठ अधिवक्ता तथा बारका पूर्वअध्यक्ष शेरबहादुर केसी, बारका पूर्वअध्यक्ष रहेका वरिष्ठ अधिवक्ता प्रेमबहादुर खड्का र बारकै पूर्वअध्यक्ष भइसकेका वरिष्ठ अधिवक्ता हरिहर दाहालले खाणको पक्षबाट बहस गरे।
यसैगरी पूर्वमहान्यायाधिवक्ताहरुले समेत खाणको पक्षबाट बहस गरेका छन्। दुई पूर्वमहान्यायाधिवक्ताहरु खम्बबहादुर खाती र महादेव यादवले खाणको पक्षबाट बहस गरे। खाणको पक्षबाट हाइप्रोफाइल अधिवक्ताहरुले अदालतमा बहस गरिरहँदा नेत्रविक्रम चन्द विप्लव सी नेतृत्वको नेकपाका कार्यकर्ताहरुले भने अदालत अगाडि नाराजुलुस नै गरेका थिए। राज्यको ठूलो अहोदामा बसेर राज्यविरुद्धकै अपराध गरेकाहरुलाई जोगाउन वरिष्ठ अधिवक्ताहरु लावालस्कर लागेर बहसमा उत्रिएको भन्दै उनीहरुले त्यसको विरोध गरे। विप्लव सी पार्टीका विद्यार्थी संगठन अखिल क्रान्तिकारीले प्रदर्शन गरेपछि केही कार्यकर्तालाई प्रहरीले पक्राउ समेत गरेको छ।
बारका अध्यक्ष तथा पूर्वअध्यक्ष र पूर्वमहान्यायाधिवक्ताहरुसँगै अन्य अधिवक्ताहरुले पनि खाणको पक्षबाट बहस गरेका छन्। तत्कालीन राष्ट्रपति रामवरण यादवका कानुनी सल्लाहकार रहेका वरिष्ठ अधिवक्ता ललित बस्नेत, बारका पूर्वपदाधिकारी एकराज पोखरेल, वरिष्ठ अधिवक्ता नृसिंह कुमार खत्री, पंकजनाथ कर्ण, अजयशंकर झा, मनिराम उपाध्याय र लक्ष्मी थापा खड्काले खाणको पक्षबाट प्रतिरक्षा बहस गरेका छन्।
सबैको एकै स्वर–पूर्वाग्रह साँधेर फसाउन खोजियो
खाणको पक्षबाट बहस गरेका सबै अधिवक्ताहरुले पूर्वाग्रह साँधेर फसाउने षड्यन्त्रले मुद्दा चलाइएको आरोप लगाएका छन्। कुनै पनि पीडित तथा जाहेरीकर्ताले जोहरीमा खाणको नाम उल्लेख नगरेको, कुनै वस्तुनिष्ठ प्रमाणबिना नै मुद्दा चलाइएको उनीहरुको जिकिर छ। पूर्ववर्ती सरकारले गरेको कामलाई निरन्तरता दिने काम मात्रै खाणको पालामा भएको र त्यसमा कुनै लेनदेनमा संलग्नता नरहेको दाबी उनीहरुको छ।
प्रधानमन्त्रीसम्म हुने हैसियत भएका खाणको करिअर ड्यामेज गर्नका लागि झुटा मुद्दा लगाइएकाले साधारण तारेखमा रिहा गर्नुपर्ने तर्क खाणका वकिलहरुले गरेका छन्। भुटानी शरणार्थी प्रकरणको फाइल अघि बढाउन भनेर हस्ताक्षर गर्ने कर्मचारीलाई उन्मुक्ति दिने र त्यो फाइलको विषय नै थाहा नभएका र देशको सम्पूर्ण सुरक्षा प्रणालीको जिम्मा लिएका व्यक्तिलाई बिना प्रमाण मुद्दा चलाइएको जिकिर उनीहरुले गरेका छन्।
खाणको साथबाट बरामद भएको मोबाइलमासमेत कुनै प्रमाण नभएको, पीडितले दिएको जाहेरीमा खाणको नाम उल्लेख नभएको, पैसाको लेनदेन भएको प्रमाण नदेखिएको, कुनै पनि अभियुक्तले बयानमा खाणको नाम नपोलेको, आरोपित खाणलेसमेत आरोप अस्वीकार गरेकाले उनी निर्दोष रहेको जिकिर अधिवक्ताहरुले गरेका छन्।
प्रतिवादीहरुको पटक–पटक बयान लिएर खाणको नाम पोल्न लगाइएको, यो प्रकरणमा अन्य अभियुक्तहरुसँग कुनै चिनजान नै नरहेकाले उनी निर्दोष रहेको दाबी गर्दै साधारण तारेखमा रिहा गर्नुपर्ने माग खाणका वकिलहरुको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779255893.png)
-1764146706.png)
