काठमाडौं- नक्कली शरणार्थी प्रकरणमा पक्राउ परेका नेकपा एमालेका सचिव एवं सांसद टोपबहादुर रायमाझीको बयान सकिएको छ। सोमबार सुरु भएको उनको बयान राति अबेरसम्म लिइएको र मंगलबार बिहान त्यसलाई भेरिफाइ गरेर सकिएको जिल्ला सरकारी वकिलको कार्यालयका प्रमुख अच्युतमणि नेउपानेले बताए।
म्याद थपका लागि अदालत उपस्थित गराउन जिल्ला सरकारी वकिलको कार्यालय काठमाडौं पुर्याएका रायमाझीलाई त्यहींबाट बयान पनि सुरु गरिएको थियो। सुरुमा रायमाझीले अर्को दिन बयान गरौं भनेका थिए तर अनुसन्धान टोलीले समय धेरै दिन नभएकोले बयान गरिहालौं भनेपछि साँझ ४ बजेबाट बयान सुरु गरिएको थियो।
करिब ९ बजेसम्म सरकारी वकिलको कार्यालयमा उनलाई बयान लिइएको थियो। बयान राति अबेरसम्म बयान गराएर सकेको र मंगलबार अर्का प्रतिवादी पूर्व गृहमन्त्री बालकृष्ण खाणको बाँकी बयान हुने नेउपानेले बताए।
रायमाझीलाई उनको स्वास्थ्यदेखि छोराको नाममा काटिएको चेक र बिचौलियाहरुसँगको उठबससम्मका कुराहरुबारे प्रश्न गरिएको थियो। त्यस्तै रायमाझीको संलग्नतामा देखिएको प्रमाण र उनले अन्य व्यक्तिलाई पोल्न सक्नेबारे पनि प्रश्न अनुसन्धानको क्रममा सोधिएको छ। रायमाझीले अधिकांश बयान इन्कारी दिएको सरकारी वकिल कार्यालयको दाबी छ।
अर्का प्रतिवादी पूर्व गृहमन्त्री खाणको डेढ घन्टा मात्र बयान लिएको र बाँकी बयान आज सक्दै अभियोगपत्रको तयारीमा लाग्ने अनुसन्धान टोलीको लक्ष्य छ। केही दिनभित्रै अदालतमा मुद्दा दायर गर्नुपर्ने दबाबका कारण प्रहरीले धमाधम बयान गराउने, साक्षी बुझ्न र आवश्यक प्रमाणहरु जुटाउने कार्य गरिरहेको छ।
रायमाझी आइतबार राति पक्राउ परेका थिए भने खाण वैशाख २७ गते पक्राउ परेका थिए। खाणसँग बरामद भएको मोबाइल फरम्याट गरेको देखिएपछि प्रहरीले केही दिन बयान नगराई राखेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
