जब गृहमन्त्री खाणले गुपचुप राखेको प्रतिवेदन मन्त्रिपरिषद्को रेकर्डसँग म्याच खाएन

राजनीति

भुटानी शरणार्थी प्रकरण: जब गृहमन्त्री खाणले गुपचुप राखेको प्रतिवेदन मन्त्रिपरिषद्को रेकर्डसँग म्याच खाएन

नारायण अधिकारी बुधबार, वैशाख २७, २०८० २०:२७

काठमाडौं– नेपाली नागरिकलाई नक्कली भुटानी शरणार्थी बनाएर अमेरिका पठाउने भन्दै एक अर्बभन्दा बढी ठगी गरेको प्रकरणमा पूर्वगृहमन्त्री तथा नेपाली कांग्रेसका प्रभावशाली नेता बालकृष्ण खाण पक्राउ परेका छन्।

खाणसँगै उनका सहयोगी तथा तत्कालीन निजी सचिव नरेन्द्र केसी बुधबार बिहान खाणको चाबहिलस्थित निवासबाट पक्राउ परे। उनीहरु दुवैजनालाई ३ दिन हिरासतमा राखेर अनुसन्धान गर्न अदालतले अनुमति दिइसकेको छ।

खाण प्रक्राउ पुर्नको मुख्य कारण भने सचिव तथा तत्कालीन गृहसचिव टेकनारायण पाण्डेको बयान र उनको मोबाइलमा भेटिएको प्रमाण रहेको खुलेको छ। प्रहरीले पक्राउ गर्दा सचिव पाण्डेले आफ्नो मोबाइल फम्र्याट गरिसकेका थिए। मोबाइल जाँचका लागि प्रहरीले डिजिटल फरेन्सीक ल्याबमा पठाएको थियो। डिजिटल फरेन्सीक ल्याबले मोबाइलमा भएका सम्पूर्ण चिजहरु रिकभर गरेपछि खाण पक्राउको बाटो खुल्यो।

प्रहरी स्रोतकाअनुसार सचिव पाण्डे र खाणबीच नक्कली शरणार्थीबारे कुराकानी हुने गरेको तथ्य प्राप्त गरेको छ। त्यसवापत आर्थिक लेनदनका कुराहरु पनि गरेको म्यासेजहरु फेला परेको प्रहरी स्रोतले बतायो। पाण्डेको बयान र बयानलाई म्याच गर्ने गरी मोबाइलमा भेटिएको प्रमाणपछि प्रहरीले जरुरी पक्राउ पुर्जी दिएर खाणलाई पक्राउ गर्‍यो।

जब खाणले गुपचुप राखेको प्रतिवेदन मन्त्रिपरिषद्को रेकर्डसँग म्याच खाएन
भुटानी शरणार्थी समस्या समाधानका लागि भन्दै गृहमन्त्री रामबहादुर थापाको पालामा २०७६ जेठ ३० मा एउटा कार्यदल नै गठन गरिएको थियो। गृह मन्त्रालयका पूर्वसहसचिव बालकृष्ण पन्थीको संयोजकत्वमा विज्ञको रुपमा गणेशबहादुर केसी र सदस्य सचिवको रुपमा गृहका तत्कालीन शाखा अधिकृत दीपकप्रसाद न्यौपाने थिए।

छुटपुट भन्दै उक्त कार्यदलले ४२९ जनाको नाम समेट्दै प्रतिवेदन बुझाएको थियो। उक्त प्रतिवेदन बादलकै पालामा गृहबाट मन्त्रिपरिषद्‌मा पेस गरिएको थियो। तर पछि सरकार ढलेपछि मन्त्रिपरिषद्ले पास गर्न सकेन। पछि उक्त प्रतिवेदन मन्त्रालयमै फिर्ता पठाइएको थियो। त्यही प्रतिवेदन गुपचुप राखिएको बताइएको थियो।

तर अनुसन्धानका क्रममा वास्तविकता भने अर्कै रहेको खुल्यो। नक्कली भुटानी शरणार्थी प्रकरण बाहिरिएपछि प्रहरीले पन्थीको कार्यदलसँग पनि बयान लियो। उनीहरुले आफूले तयार पारेको प्रतिवेदन प्रहरीकहाँ पेस गरे। उनीहरुले पेस गरेको प्रतिवेदन र खाणले गुपचुप राखेको प्रतिवेदनमा मेल खाएन।

यी दुई मध्ये एक प्रतिवेदन नक्कली हुने कुरा प्रष्ट देखियो। त्यसपछि कुन नक्कली र कुन सक्कली प्रतिदेन छुट्याउनेतर्फ प्रहरी लाग्यो। पन्थी कार्यदलको प्रतिवेदन बादलको पालामा मन्त्रिपरिषद्‌मा पेस गरिएको भनिएपछि मन्त्रपिरिषद्सँग रेकर्ड हुनसक्ने भन्दै प्रहरीले त्यतिबेलाको पन्थीको प्रतिवेदन माग गर्‍यो।

जसक्रममा मन्त्रिपरिषद्को रेकर्डमा रहेको र पन्थी कार्यदलले पेस गरेको प्रतिवेदन म्याच खाएपछि गृहमा खाणले गुपचुप राखेको प्रतिवेदन नक्कली रहेको पुष्टि भएको एक अनुसन्धान अधिकारीले नेपाल लाइभलाई बताए।

नक्कली शरणार्थीसँग मोटो रकम लिँलै प्रतिवेदनमै आफूखुसी अनुसूची थप्दै खाण नेतृत्वले नक्कली शरणार्थीको नामसमेत राखेको पाइएको प्रहरीले जनाएको छ। उनी पक्राउ पर्नुको मुख्य कडी यो पनि रहेको प्रहरीले जनाएको छ।

यही नक्कली प्रतिवेदन मन्त्रिपरिषद्‌मा पेस गरेर पास गराउने र त्यसपछि रकम लिएकाहरुलाई अमेरिका पठाउने तयारी खाण तथा सचिव पाण्डेको थियो। यसका लागि उनीहरुले झापा, मोरङका सहायक सिडिओको नेतृत्वमा अर्को उपसमिति गठन गरेर कर्मकाण्डी गर्ने र नक्कली प्रतिवेदन मन्त्रिपरिषद्‌मा पेस गर्ने तयारी गरेका थिए। त्यसका लागि उनीहरुले उपसमिति समेत गठन गरेका थिए।

यो विषय विवादमा आइसकेको भन्दै उपसमितिले काम नगरेपछि उनीहरुको योजना सफल भएको हुन पाएन। त्यसपछि नयाँ सरकार गठन भएपछि यो प्रकरण छानबिनको दायरामा आएको हो।