काठमाडौं– भ्रष्टाचारको कसुरमा दोषी ठहर भएर ८ महिना कैद सजाय सुनाइएका डीएसपी पक्राउ परेर जेलमा हुनुपर्ने हो। तर, प्रहरी कर्मचारी उनलाई भेटेर पनि पक्राउ गर्दैनन्, उल्टै सलाम गर्छन्।
भ्रष्टाचारको कसुरमा दोषी विशेष अदालतले डीएसपी रमेशबहादुर सिंहलाई दोषी ठहर गरेको १ वर्ष भइसकेको छ। २०७८ चैत २५ गते विशेष अदालतका न्यायाधीशहरु श्रीकान्त पौडेल, शालिग्राम कोइराला र बलभद्र बाँस्तोलाको इजलासले उनलाई दोषी ठहर गरेको थियो।
जन्ममिति सच्याएर प्रहरी सेवामा प्रवेश गरेको पुष्टि गर्दै अदालतले सिंहलाई ८ महिना कैद र १५ हजार रुपैयाँ जरिवानाको फैसला सुनाएको थियो। उक्त फैसलापछि पक्राउ गरेर सिंहलाई जेल पठाउनुपर्नेमा प्रहरीबाट सिंहले उल्टै सम्मान पाइरहेका पाइएको हो।
अदालतबाट दोषी ठहर भइ फरार भएकाहरुलाई विशेष अपरेशन नै चलाएर पक्राउ गर्दै प्रहरीले जेल पठाए पनि सिंहको हकमा भने त्यो लागु हुन सकेको छैन।
नागरिकता, शैक्षिक प्रमाणपत्र लगायतका सरकारी कागजात नै सच्याएको कसुरमा दोषी ठहर हुँदा समेत उनी अहिलेसम्म पक्राउ नपर्नुले प्रहरीले उनीमाथि सदासहायत देखाएको खुल्छ। सेवामा रहँदा अवैध रुपमा सम्पत्ति आर्जन गरेको कसुरमा अख्तियारले सिंहमाथि अनुसन्धान गरिरहेको छ।
उक्त कसुरको अनुसन्धानको क्रममा केही दिन अगाडि मात्रै सिंह अख्तियार दुरुपयोग अनुसन्धान आयोगको टंगाल, काठमाडौंस्थित कार्यालय पुगेका थिए।
बयान दिन टंगाल पुगेका सिंहलाई प्रहरीले पक्राउ गरेन। गेटमा भएका प्रहरी कर्मचारीले उल्टै सलाम ठोकेर सिंहलाई कार्यालयमा ‘स्वागत’ गरे।
आफैंले मुद्दा चलाएर दोषी ठहर भएको जानकार हुँदाहुँदै पनि सिंहलाई पक्राउ गर्नेबारे अख्तियार प्रशासनले पनि चासो देखाएन। अख्तियारका कर्मचारीले उनको बयान लिएर बिदा गरेका थिए।
नागरिकता, विद्यालयदेखि क्याम्पससम्मका कागजातहरु कीर्ते गरेको पाइएकाले सिंहमाथि छानबिन गर्न भन्दै अख्तियारले नै जिल्ला प्रहरी परिसर काठमाडौं र जिल्ला प्रहरी कार्यालय बझाङलाई पत्राचार गरेको थियो। कीर्तेको कसुरमा अहिले पनि बझाङ र काठमाडौं प्रहरीमा सिंहविरुद्धको उजुरी कायमै छ।
दुवै कार्यालयले सिंहविरुद्ध अनुसन्धान अगाडि बढाएका छैनन्। दुवै कार्यालयले सिंहविरुद्धको उजुरी थन्काएका मात्रै छन्।
प्रहरीले उनलाई ‘फरार अभियुक्त’को सूचीमा राखेको छ। तर सिंह भने उल्टै प्रहरी कार्यालयदेखि अख्तियारसम्म प्रहरी कर्मचारीको सलाम खाँदै आउजाउ गर्दै आएका छन्।
नेपाल लाइभले डीएसपी सिंहले कागजात सच्याएर प्रहरीको जागिर खाएकोबारे समाचार प्रकाशन गरेपछि अख्तियार दुरुपयोग अनुसन्धान आयोगले उनीमाथि छानबिन अघि बढाएको थियो। अख्तियारकै अनुसन्धानअनुसार पछि मुद्दा चल्यो र उनी दोषी ठहर भएका थिए।
२०५८ मंसिर १२ मा प्रहरी निरीक्षकमा भर्नाका लागि आवेदन खुला भएको थियो। त्यो बेला रमेश सिंहले पनि प्रहरी निरीक्षकमा भर्ना हुनका लागि आवेदन दिए।
२०५८ सालमा परीक्षा दिएका परीक्षार्थीको नतिजा लोक सेवा आयोगले २०६१ सालमा निकाल्यो। आवेदन दिएकामध्ये ८४ जना परीक्षार्थी उत्तीर्ण भएका थिए। तीमध्ये एक थिए, रमेशबहादुर सिंह। उनै रमेशबहादुर सिंह २०६१ जेठ १५ गतेबाट प्रहरी निरीक्षकमा सेवा प्रवेश गरेका थिए।
प्रहरी सेवामा भर्ना भएर १६ वर्ष सेवा गरिसकेका सिंहले नागरिकता लगायत कागजात कीर्ते गरेर जागिर खाएको विषयमा नेपाल लाइभले समाचार प्रकाशित गरेको थियो।
बझाङको श्री शान्ति माध्यमिक विद्यालय चौघानपाटाबाट २०४८ सालमा एसएलसी उत्तीर्ण गरेका थिए सिंहले। सिंहको एसएलसीको सिम्बोल नम्बर ०७०००५४ (बी) हो।
एसएसलीको लब्धांकपत्रअनुसार उनको उमेर त्यसबेला २६ वर्ष भइसकेको थियो। लब्धांकपत्रमा उनको जन्ममिति २०३२ माघ १२ गते थियो। प्रहरीमा आवेदन खुलेको बेला उनी २५ वर्ष ११ महिनाको भइसकेका थिए। प्रहरी नियमावलीअनुसार आवेदन खुलेको मितिमा २५ वर्ष ननाघेको व्यक्तिले मात्रै आवेदन दिन मिल्ने व्यवस्था छ।
प्रहरी नियमावलीको व्यवस्थाअनुसार सिंह आवेदन दिन नै अयोग्य थिए। त्यसपछि सिंहले स्कूलले दिने एसएलसीको चारित्रिक प्रमाणपत्र नै नक्कली बनाए।
नक्कली बनाइएको चारित्रिक प्रमाणपत्रमा उनको जन्म मिति २०३३ माघ १२ गते राखियो। नक्कली चारित्रिक प्रमाणपत्रअनुसार उनी उनी प्रहरी निरीक्षकको आवेदन दिन योग्य भएका थिए। बझाङबाट जारी भएको नागरिकता प्रमाणपत्रमासमेत उनको जन्ममिति २०३२ माघ १२ गते नै थियो।
नागरिकतालगायत अन्य प्रमाणपत्र सच्याउनुपर्ने भएपछि सिंहले सोही चारित्रिक प्रमाणपत्रको आधारमा नागरिकताको प्रतिलिपि काठमाडौं जिल्ला प्रशासन कार्यालयबाट लिए, जन्ममिति २०३३ माघ १२ गते राखेर। पछि नागरिकता र एसएलसीको चारित्रिक प्रमाणपत्रअनुसार अन्य डकुमेन्टमा भएको २०३२ सालको अन्तिमको ‘२’ को ठाउँमा ‘३’ बनाएर सच्याएको पाइएपछि उनी दोषी ठहर भएका हुन्।
डिएसपी सिंहले त्रिभुवन विश्वविद्यालय परीक्षा नियन्त्रण कार्यालय बल्खु, नेपाल ल क्याम्पसदेखि जिल्ला प्रशासन कार्यालय, प्रहरी प्रशासनसम्मलाई गुमराहमा राखेका थिए। उनले २०३२ को अन्तिमको ‘२’ रहेको स्थानमा ‘३’ बनाएको उक्त डकुमेन्ट नै ‘फेक’ भएको प्रमाणित भएको थियो।
डिएसपी सिंहको परीक्षा नियन्त्रण कार्यालय बल्खुबाट जारी भएको रजिस्ट्रेसन नम्बर २५८६२–९२ हो। यो रजिस्ट्रेसन नम्बर लिँदा उनको जन्ममिति २०३२ माघ १२ नै थियो। तर उनले प्रहरी निरीक्षकमा भर्ना हुन जन्ममिति सच्याएर नागरिकता र स्कूलको चारित्रिक प्रमाणपत्र बनाइसकेका थिए। सोही अनुसार त्रिविको सर्टिफिकेटमा २०३२ को ‘२’ को ठाउँमा ‘३’ बनाएर पेस गरी प्रहरी सेवामा प्रवेश गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
