काठमाडौं– भ्रष्टाचार मुद्दामा दोषी ठहर भएका डीएसपी रमेशबहादुर सिंह आफैंले दिएको बयान उनका लागि ‘ब्याक फायर’ बनेको तथ्य फैसलाको पूर्णपाठमा उल्लेख भएको विवरणबाट पुष्टि हुन्छ।
नागरिकता प्रमाणपत्रमा उल्लेख भएको जन्ममितिको विवरण २०३२ लेखिएको ठाउँमा त्यसलाई सच्याएर २०३३ बनाएको आरोपमा उनीमाथि छानबिन भएको थियो।
जन्ममिति सच्याएर प्रहरी सेवामा प्रवेश गरी भ्रष्टाचारको कसुर गरेको भन्दै अख्तियार दुरुपयोग अनुसन्धान आयोगले दायर गरेको मुद्दामा उनलाई विशेष अदालतले दोषी ठहर गर्दै ८ महिना कैद र १५ हजार रुपैयाँ जरिवाना तोकेको छ।
उक्त फैसलाको पूर्णपाठ हालसालै सार्वजनिक भएको छ। जहाँ डीएसपी सिंह आफैंले दिएको बयान विवरणअनुसार नमिल्दा उल्टै ब्याक फायर भएको देखिन्छ। सिंहले २०४९ साउन २५ गते आफूले नागरिकता बनाएको र त्यतिबेला आफूले जन्ममिति २०३३ माघ १२ उल्लेख गर्दै नागरिकता बनाउन निवेदन दिएकोमा भुलवश २०३२ माघ १२ गते हुन गएको बयान दिएका थिए।
त्यसपछि नागरिकता बनाउने कर्मचारीले नै सच्याएर २०३२ लाई २०३३ बनाइएको भन्दै सिंहले विशेष अदालतसमक्ष बयान दिएका थिए। तर, उनले दिएको बयान नै मेल नखाँदा उल्टै ब्याक फायर भएको देखिन्छ।
सिंहले भनेको समय २०४९ साउन २५ गते नागरिकता बनाएको उल्लेख गर्दै बयान दिएको कुरा जिल्ला प्रशासन कार्यालय बझाङको अभिलेखबाटसमेत उक्त कुरा पुष्टि हुन्छ। तर जन्ममिति भने २०३३ दाबी गर्दा उक्त समयमा सिंह १६ वर्ष नै पूरा भएको नदेखिँदा उनी समस्यामा परेका हुन्।
पूर्णपाठमा उल्लेख गरिएको छ, ‘सिंहले २०४९ साउन २५ मा जन्ममिति २०३३ माघ १२ उल्लेख गरी नागरिकता लिनका लागि उनी १६ वर्ष उमेर पुग्ने देखिँदैन। १६ वर्ष पूरा नभएको व्यक्तिले नागरिकता प्राप्त गर्न सक्दैन। नाबालकलाई नागरिकता दिने प्रावधान नरहेकाले सिंहको जिकिर तथ्यपरक देखिँदैन।’
फरेन्सिकले गर्यो कीर्तेको पुष्टि
जन्ममिति २०३२ लाई केरमेट गरेर २०३३ बनाएको भन्दै अख्तियारले डीएसपी सिंहका काजगातहरु जाँचका लागि राष्ट्रिय विधि विज्ञान प्रयोगशालामा पठाएको थियो। प्रयोगशालाका फरेन्सिक विज्ञको टोलीलेसमेत सिंहले कीर्ते गरेको पुष्टि गर्दै पत्र पठाएका थियो।
१, २, ३ र ४ का ल्याप्चेहरु आपसाम मिले पनि ५, ६ र ९ को दस्तखत आपसमा नमिलेको, ७ र ८ का दस्तखतहरु र ५, ६ र ९ का दस्तखतहरुको ढाँचा नै नमिलेको रिपोर्ट विधि विज्ञानले दिएको थियो।
त्यसैगरी २०४९ साउन २५ गते जिल्ला प्रशासन कार्यालय बझाङको आर्थिक वर्ष २०४८÷४९ को नागरिकताको प्रमाणपत्र अभिलेखमा ३६९३ प्रमाणपत्र नम्बर भएको नागरिकताको जन्ममितिमा २०३३ लेखिए पनि अन्तिमको ३ फरक मसीले सच्याएर २ को ठाउँमा २ लेखिएको फरेन्सिक रिपोर्टमा उल्लेख गरिएको छ।
जन्ममितिको २०३३ लेखिएको मा ३ को मसी हराएर सुरुमा लेखिएको २ नै देखिएको, २०३३ को अन्तिमको ३ माथिल्लो भागको तुलनामा माथि उठेको र तल्लो भागको तुलनामा तल झरेको उल्लेख पनि गरिएको छ।
उता डीएसपी सिंहले सुरुमा नागरिकता लिएको जिल्ला प्रशासन कार्यालय बझाङको ढड्डामासमेत सच्याएर २०३२ सालको ठाउँमा २०३३ बनाइएको खुलेको पाइएको छ। सोही अनुसार स्कूल, कलेजका डकुमेन्टहरुसमेत सच्याइएको पूर्णपाठमा उल्लेख गरिएको छ।
यसरी सच्याएका थिए सिंहले जन्ममिति
२०५८ मंसिर १२ मा प्रहरी निरीक्षकमा भर्नाका लागि आवेदन खुला भएको थियो। त्यो बेला रमेश सिंहले पनि प्रहरी निरीक्षकमा भर्ना हुनका लागि आवेदन दिए।
बझाङको श्री शान्ति माध्यमिक विद्यालय चौघानपाटाबाट २०४८ सालमा एसएलसी उत्तीर्ण गरेका थिए सिंहले। सिंहको एसएलसीको सिम्बोल नम्बर ०७०००५४ (बी) हो।
एसएसलीको लब्धांकपत्रअनुसार उनको उमेर त्यसबेला २६ वर्ष भइसकेको थियो। लब्धांकपत्रमा उनको जन्ममिति २०३२ माघ १२ गते थियो। प्रहरीमा आवेदन खुलेको बेला उनी २५ वर्ष ११ महिनाको भइसकेका थिए। प्रहरी नियमावली अनुसार आवेदन खुलेको मितिमा २५ वर्ष ननाघेको व्यक्तिले मात्रै आवेदन दिन मिल्ने व्यवस्था छ।
प्रहरी नियमावलीको व्यवस्था अनुसार आवेदन दिन नै सिंह अयोग्य थिए। त्यसपछि सिंहले स्कूलले दिने एसएलसीको चारित्रिक प्रमाणपत्र नै नक्कली बनाए।
नक्कली बनाइएको चारित्रिक प्रमाणपत्रमा उनको जन्ममिति २०३३ माघ १२ गते राखियो। चारित्रिक प्रमाणपत्रअनुसार अब भने उनी प्रहरी निरीक्षकको आवेदन दिन योग्य भएका थिए। तर अन्य प्रमाणपत्र र नागरिकताअनुसार भने उनी योग्य थिएनन्। किनकि अन्य सर्टिफिकेटमा उनको जन्ममिति २०३२ माघ १२ गते थियो।
बझाङबाट जारी भएको नागरिकता प्रमाणपत्रमासमेत उनको उमेर २०३२ माघ १२ गते नै थियो।
नागरिकतालगायत अन्य प्रमाणपत्र सच्याउनुपर्ने भएपछि सिंहले सोही चारित्रिक प्रमाणपत्रको आधारमा जिल्ला प्रशासन कार्यालय बझाङका तत्कालीन कर्मचारीलाई प्रभावमा पारेर रेकर्ड रहेको ढड्डामा २०३२ को ठाउँमा २०३३ बनाउन लगाएका थिए।
पछि सोही आधारमा नागरिकताको प्रतिलिपि बनाई पाउँदै भन्दै काठमाडौं जिल्ला प्रशासन कार्यालयबाट जन्ममिति २०३३ माघ १२ गते राखेर २०६३ साउन २१ मा नागरिकता लिएका थिए। यसरी जन्ममिति सच्याएर सेवा प्रवेश गरेका उनले १६ वर्षसम्म जागिर खाएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
