काठमाडौं– राष्ट्रिय स्वतन्त्र पार्टीका सभापति रवि लामिछानेको राहदानी दुरुपयोग सम्बन्धी मुद्दा नचल्ने भनी महान्यायाधिवक्ता दिनमणि पोखरेलले गरेको निर्णय बदर हुनुपर्ने माग गर्दै सर्वोच्च अदालतमा रिट निवेदन पेस भएको छ।
युवराज पौडेल ‘सफल’ले लामिछानेमाथि राहदानी दुरुपयोगमा सजाय हुनुपर्नेमा उन्मुक्ति दिएकाले उक्त निर्णय बदर हुनुपर्ने दाबी गरिएको छ।
उक्त रिट हालसम्म दर्ता भएको छैन। सर्वोच्च अदालतका प्रवक्ता विमल पौडेलका अनुसार लामिछानेविरुद्धको रिट पेस भएको र अध्ययनको क्रममा रहेको बताए। प्रशासनले अध्ययनपछि दर्ता गर्ने वा दरपिठ गर्ने निर्णय गर्ने उनले बताए।
यसअघि नागरिकतासम्बन्धी विवादमा सर्वोच्च अदालतको संवैधानिक इजलासले सांसद पद खारेज गर्दै पुन: नागरिकता लिन आदेश गरेको थियो। सर्वोच्चको उक्त फैसला अनुसार लामिछानेले पुन: नागरिकता लिएका थिए।
नागरिकता विवाद मंसिर ४ मा भएको निर्वाचन अघि नै आएपनि उनी चितवन–२ बाट उम्मेदवार हुँदै निर्वाचित भएका थिए। तर, सर्वोच्चले नेपाली नागरिक नभएको ठहर गरेपछि सांसद पद गुमाएका थिए।
निर्वाचन आयोगले उक्त क्षेत्रमा उपनिर्वाचन गर्ने निर्णय गरेको थियो। वैशाख १० गते उपनिर्वाचनको मिति तोकिएको छ। त्यसका लागि सोमबार उम्मेदवारी दर्ता हुँदैछ।
त्यसको अघिल्लो दिन सर्वोच्चमा दोस्रो रिट पुगेको हो। उक्त रिट दर्ता भएर अन्तरिम आदेश जारी भएमा भने रवि उपनिर्वाचनमा भाग लिनबाट रोकिने छन्। दरपिठ गरे वा अन्तरिम आदेश जारी गर्न अस्वीकार भएमा भने उनका लागि कानुनी बाटो खुला रहनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
