काठमाडौं- रमेश खरेल सरुवा भएर आउँदैछन् भनेपछि कुनै समय ‘भुँडे’ प्रहरीको दोहोलो नै हुन्थ्यो। ‘हि मे बि करप्टेड’ भुँडीवाला प्रहरी देख्यो कि उनको मुखबाट यही शब्द फुत्किन्थ्यो। कडा अनुशासन, खरो स्वभाव र आक्रामक पुलिसिङका कारण उनी संगठनभित्र चर्चित थिए।
अझ मन्त्रीका अगाडि ब्रिफकेस बुझाउनुपर्ने भन्दै भाषण ठोकेपछि उनको चर्चा संगठनभित्र मात्र नभई बाहिर पनि त्यति नै चुलियो। ८ वर्षअघि महेन्द्र पुलिस क्लबमा भएको एक कार्यक्रममा खरेलले प्रहरी अधिकारीहरु बढुवा हुनका लागि ब्रिफकेस बोकेर नेताका घर-घर पुग्ने गरेको भाषण गरेका थिए। उक्त भाषणपछि काठमाडौं प्रमुख रहेका एसएसपी खरेलको जिम्मेवारी समेत खोसिएको थियो।
खरेलले यस्तो भाषण गरेको केही दिनअघि मात्रै तत्कालीन गृहमन्त्री वामदेव गौतमले काभ्रेमा भएको युवा संघको कार्यक्रममा खरेल सेलिब्रटी बन्न खोजेको आरोप लगाएका थिए। ‘आफ्नो स्वाभिमान गिर्ने भएर होला, मलाई एक चोटी पनि भेट्न नआएको’ भन्दै गौतमले भाषण गरेका थिए।
तिनै खरो स्वभावका खरेललाई पछि पार्दै सर्वेन्द्र खनाल आईजीमा बढुवा भएपछि उनले प्रहरी संगठनबाट राजीनामा नै ठोके। नालायकको हातमा प्रहरी संगठन पुगेकाले त्यस्ता व्यक्तिको अन्डरमा बसेर काम गर्न आफ्नो नैतिकताले नदिने भन्दै उनले राजीनामा बुझाएका थिए।
प्रहरी जीवनको २९ वर्षसम्म खरो रुपमा उत्रिएका खरेल अवकाशको तीन वर्षसम्म गुमनाम बने। कोभिडसँगको लुकामारीबाट नयाँ जीवन पाएका उनी उसैगरी अहिले फरि राजनीतिक क्षेत्रमा खरो उत्रिने प्रयास गर्दैछन्। एक वर्षअघि २०७८ पुसमा नेपाल सुशासन पार्टी दर्ता गरेर त्यसको अध्यक्ष बनेका खरेलले गत मंसिरमा भएको प्रतिनिधि सभाको निर्वाचनमा काठमाडौं- १ बाट उम्मेदवारी दिएका थिए। ७१४३ मत ल्याएर कांग्रेसका प्रकाशमान सिंह विजयी हुँदा ३१२४ मत ल्याउँदै खरेल चौथो भएका थिए। आक्रामक घरदैलो गरेका खरेलको यो पहिलो चुनावी अनुभव पनि थियो।
कुशासनले भ्रष्ट बनेको देशलाई ट्र्याकमा ल्याउनु नै आफ्नो राजनीतिक उद्देश्य रहेकाले हारे पनि आफ्नो लक्ष्यमा दृढ रहेको खरेलले बताएका थिए। त्यही राजनीतिक हुटहुटीले खरेललाई अहिले फेरि उपनिर्वाचन लड्ने ठाउँसम्म ल्याएको छ।
रविले धोका दिएको बताउने खरेल कसरी पुगे रास्वपामा?
काठमाडौं- १ मा आफू पराजित हुनपर्ने कारणमध्ये एक रवि लामिछाने समेत रहेको खरेलले आरोप लगाएका थिए। निर्वाचनको एक महिनाअघि उपत्यकाका ४५ ठाउँमा एकसाथ उम्मेदवार सार्वजनिक गर्ने र दुवै पार्टीबाट (रास्वपा र नेसुपा) एकअर्काका उम्मेदवारलाई समर्थन गर्ने भद्र सहमति भए पनि रविले तोडेको खरेलको आरोप थियो।
‘काठमाडौं- १ मा उहाँले घन्टीबाट उम्मेदवारी नदिने भद्र सहमति थियो। तर उहाँले सहमति तोड्दै पुकार बमलाई उठाउनु भयो,’ खरेलले भनेका थिए। रविले धोका दिएको बताउने उनै खरेल अहिले रास्वपाबाटै उम्मेदवार बनेका छन्। आखिर यो अवस्था कसरी भयो?
यसबारे उनले शनिबारको पत्रकार सम्मेलनमा भनेका छन्, ‘नेपाल आमा रोइरहेकी छिन्। नेपाल आमालाई अफ्ठ्यारो भएको छ। कुशासनले देश आक्रान्त छ। यस्तो अवस्थामा राष्ट्र बचाउनका लागि हामी नयाँ शिराबाट एक ठाउँमा उभिन सकिएन भने ब्याप्त कुशासनलाई चिर्न सकिँदैन। सुशासन कायम गर्न र सामाजिक न्याय दिँदै नागरिकलाई हौसला प्रदान गर्नका लागि हामी एक ठाउँमा उभिएका हौं।’
खरेलले यसो भनिरहे पनि स्थानीय तहदेखि संघीय चुनावसम्म विभिन्न ठाउँमा उम्मेदवारी दिएको खरेलको पार्टीको उत्साहजनक उपस्थित खासै देखिएन। पर्साको एउटा वडामा वडाध्यक्ष जित्नु बाहेक अन्यत्र सन्तोषजनक मत समेत खरेलको पार्टीले ल्याएन। पार्टीका अध्यक्ष खरेल स्वयंले समेत काठमाडौंबाट सोचे अनुरुप मत ल्याउन सकेनन्।
खरेललाई जनमतले उत्साहित हुनपर्नेभन्दा पनि थप सोचेर अघि बढ्नुपर्ने पाठ दिएको थियो। यो सँगै उनलाई रास्वपामा ल्याउने सूत्रधार थिए, अर्का पूर्वसुरक्षाकर्मी प्रणय राणा। यो कुरा खरेल स्वयंले समेत स्वीकार गरेका छन्। रास्वपाबाट उम्मेदवार बन्ने निर्णय गरेपछि खरेलले भनेका छन्, ‘डा प्रणय राणाको प्रयासलाई स्वागत र सम्मान गर्दै यहाँहरु सबैको सहयोगको अपेक्षा गर्दछु।’
‘१६५ क्षेत्रमै उठ्नका लागि आधार बनाइसकेको छु’
काठमाडौंबाट उम्मेदवार बनेका खरेल अहिले मधेसी समुदायको बाहुल्य रहेको बारा-२ बाट चुनाव उठ्ने भएका छन्। जुन पहाडी मुलका खरेललाई मधेसी मुलको बाहुल्य रहेको क्षेत्रबाट चुनाव जित्न निकै गाह्रो हुने देखिन्छ। यस्तो हुँदाहुँदै खरेलले बाराबाट उम्मेदवारी दिने निर्णय किन गरे?
यसबारे खरेल भने आफ्नो प्रहरी सेवालाई मुख्य आधार मान्छन्। २९ वर्षसम्म प्रहरी सेवामा रहेर काम गरेकाले देशका सबैजसो भू-भागको बारेमा ज्ञान र अनुभव भएकाले आफू जहाँबाट उठे पनि परिचित रहेको उनको तर्क छ।
‘७७ वटै जिल्ला, १६५ वटै निर्वाचन क्षेत्रमा रमेश खरेल उठ्ने आधारहरू छन्। म मौका पाएर इमानदार भएर निस्केको मान्छे हुँ भन्दा घमण्डी नभन्नुहोला। २९ वर्ष देशको सेवा गरेर टेस्टेड भइसक्नु नै पहिलो आधार हो,’ खरेलले भने। प्रहरीमा २९ वर्ष सेवा गर्दाको अनुभवले देश कुशासनको बाटो गएको र त्यसलाई तोड्न आवश्यक रहेको देखिएकाले आफूले उम्मेदवारी दिनु परेको उनको भनाइ छ।
खरेल तराई क्षेत्रका लागि पनि परिचित अनुहार हुन्। बाराको सीमावर्ती जिल्ला पर्सा जिल्ला इन्चार्ज भएर काम गरेका खरेलको खरो स्वभावका कारण उनी त्यस क्षेत्रमा पनि परिचित छन्। सीमा नाकाबाट हुने तस्करी, अपराध तथा तराईका क्षेत्रमा लगाइने अवैध गाँजा खेतीविरुद्ध खरेल आक्रामक भएर प्रस्तुत भएका थिए।
तराईमा आफू परिचित अनुहार भएकाले त्यसको फाइदा उपनिर्वाचनमार्फत लिने दाउमा अहिले खरेल मधेस झरेका छन्। जितेको अवस्थामा खरेलका लागि यो ऐतिहासिक बन्नेछ। उनी पहिलो पटक संसद् भवन छिर्नेछन्। यसमा खरेल सफल हुँदै इतिहास रच्छन् वा काठमाडौं- १ कै नियति दोहोरिन्छ त्यो भने हेर्न बाँकी नै छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_ZtgGYzEpDO-1789120936.webp)
-1786602170.png)
