काठमाडौं– उपप्रधान एवम् गृहमन्त्री नारायणकाजी श्रेष्ठले मिटरब्याज पीडितहरुको समस्या समाधानका लागि गठन गरिने आयोगले फिल्डमै पुगेर काम गर्ने बताएका छन्। मिटरब्याज पीडितहरुको समस्या समाधानका लागि सरकारले अहिले पहल गरिरहेको गृहमन्त्री श्रेष्ठको भनाइ छ।
आइतबार प्रतिनिधि सभाको बैठकमा उठेका प्रश्नहरुको जवाफ दिँदै गृहमन्त्री श्रेष्ठले सामन्तवादको अवशेषहरु अझै बाँकी रहेको र मिटरब्याज पनि त्यसकै अवशेष भएको दाबी गरे। मिटरब्याजको समस्या समाधानका लागि विगतमा पहल भएको, तर पर्याप्त नभएको उल्लेख गर्दै मन्त्री श्रेष्ठले अब टुंगोमा पुर्याउनुपर्ने बताए।
मिटरब्याज पीडितहरुको समस्या समाधान गर्न सरकार गम्भीर रहेको उल्लेख गर्दै मन्त्री श्रेष्ठले आफूले विगतमा सर्लाहीका मिटरब्याजी पीडितहरुको आन्दोलनमा सरिक भएको र सञ्चारमाध्यमको समेत ध्यानाकर्षण गराएको दाबी गरे।
उनले तत्कालीन समयमा ठोस कदम चालेर पहल गर्न ध्यानाकर्षण गराएको भन्दै सर्लाहीका पीडितहरुले गरेको आन्दोलनले केही उपलव्धि हासिल भएको बताए। तत्कालीन समयमा कतिपय पक्राउ परेको र केही तमसुक च्यातिएको भन्दै उनले यो समग्र तराईको समस्या भएकाले त्यही रुपमा काम गर्नुपर्ने बताए।
उनले विगतमा आयोग बनेको र अहिले पनि बनेकाले समाधान नहुने भन्ने चिन्ताप्रति उनले आफ्नो ध्यानाकर्षण भएको उल्लेख गर्दै श्रेष्ठले विगतमा कार्यदल बनाइएको र अहिले आयोग नै बनाउने सहमति भएको बताए।
अब बस्ने पहिलो मन्त्रिपरिषद् बैठकबाट आयोग गठनको विषयमा निर्णय गर्ने उल्लेख गर्दै मन्त्री श्रेष्ठले विगतमा कार्यदलले ऐन संशोधन गर्न दिएको सिफारिसको सरकारले कार्यान्वयन सुरु गरेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779880470.png)
-1764146706.png)
-1779545841.jpg)
