काठमाडौं– कपिलवस्तुको बुद्धभुमि नगरपालिका–४ का ६६ वर्षीय गंगाराम थारुको २०७६ साउन ७ गते हत्या भयो। शरीरका विभिन्न ठाउँमा काटिएको अवस्थामा बुद्दभूमि–४ मा गंगाराम मृत भेटिएका थिए। गंगारामको धारिलो हतियार प्रहारबाट हत्या भएको आशंका गर्दै प्रहरीले अनुसन्धान अघि बढायो।
अनुसन्धानका क्रममा गंगारामको हत्या नै भएको खुल्यो। गंगारामको हत्या हुनुभन्दा करिब ७ वर्ष पहिले विक्की भनिने विक्रम थारुको बुवा बिष्णुप्रसाद थारुको मृत्यु भएको थियो। २०७६ असारमा खेत जोत्ने क्रममा विक्कीको गोरु समेत गरेको थियो।
गोरु मरेको केही समयपछि विक्कीको पनि खुट्टा दुखेपछि गंगारामले झारफुक गरेका थिए। त्यसपछि विक्कीको खुट्टा सञ्चो भएको थियो। केही समय पहिला बुवाको मृत्यु, जोत्दा गोरु नै मर्नु, आफ्नो खुट्टा दुख्नु र गंगारामले झारफुक गरेपछि निको भएकाले विक्कीले गंगारामलाई शंकाले हेरेका थिए। सबै गंगारामकै कारण भएको, उनी ‘बोक्सा’ भएको अन्धविश्वास गर्दै विक्कीले गंगारामको हत्या योजना बनाएर हत्या गरेको प्रहरी अनुसन्धानबाट खुलेको थियो।
गंगारामलाई ‘बोक्सा’ भन्दै विक्कीले विभिन्न ६ जना व्यक्तिको सहयोग लिएर हत्या गरेको प्रहरी अनुसन्धानबाट खुलेको थियो। यस घटनामा पक्राउ परेका ३ जना (बिष्णु प्रसाद चौधरी, इन्द्रा थारु, लिलाराम थारु) लाई जिल्ला अदालत कपिलवस्तुले १ लाख धरौटीमा रिहा गर्न आदेश दिएपछि उनीहरु रिहा भएका छन्।
सोही घटनामा संलग्न भएको आरोपमा गत साउन ८ गते विक्की भनिने विक्रम थारु र राम सेवक थारुलाई प्रहरीले पक्राउ गरी अनुसन्धान अघि बढाएको थियो। हाल उनीहरु पुर्पक्षका लागि थुनामा छन्। सोधुपुछको क्रममा उनीहरुले हत्या स्वीकार्दै हाल पक्राउ परेका कपिलवस्तुको भृकुटी नगरपालिका–७ का २३ वर्षीय शिव शरण चौधरीको पनि संलग्नता रहेको बताएका थिए।
त्यसपछि शिवशरणमाथि अनुसन्धान अघि बढाइएको थियो। अनुसन्धानका क्रममा उनी २०२१ अक्टोबर ८ तारेखमा भिजिट भिसामा युएई पुगेका खुलेको थियो। भिजिट भिसामा युएई पुगेपछि उनलाई पक्राउ गर्न नेसनल सेन्ट्रल ब्यूरो (एनसीबी) काठमाडौंले रेड नोटिस जारी गरी खोजी तथा पक्राउ गर्नका लागि प्रहरीको अन्तराष्ट्रिय संगठन इन्टरपोललाई पत्राचार गरेको थियो।
इन्टपरपोल शाखाको अनुरोधमा इन्टरपोल महासचिवालयबाट २०७९ भदौ १४ गते उनीविरुद्ध रेड नोटिस जारी भएको थियो। त्यसको १ सातापछि २०७९ भदौ २१ गते एनसीबी अबुधाबीले शिवशरणलाई पक्राउ गरेको थियो। त्यसको ६ महिनापछि बल्ल उनलाई नेपाल ल्याइएको छ।
युएईमा २ पटक पक्राउ परेका थिए शिवशरण
शिवशरण युएईमा २ पटक पक्राउ परेको पाइएको छ। गत भदौ २१ गते पक्राउ परेपछि शिवशरणलाई प्रहरीले अदालतमा उपस्थित गराएको थियो। त्यसको केही समयसम्म हिरासत तथा जेलमा राखेर छाडेको थियो। ‘उहाँहरुको आन्तरिक प्रक्रियाबारे हामीलाई त्यति जानकारी हुँदैन। तर १ पटक पक्राउ गरेर केही दिन राखेर छाडेको देखिन्छ। त्यसको केही समयपछि पुनः पक्राउ परेका देखिन्छ,’ नेपाल प्रहरी स्रोतले भन्यो, ‘पक्राउ गरेपछि किन छाडियो भन्ने विषय चाहिँ हामीलाई थाहा हुँदैन।’
भिजिट भिसामा दुबई पुगेपछि शिवशरण त्यहाँ मजदुरको रुपमा काम गर्न थालेका थिए। सोही क्रममा आबुधाबी प्रहरीले पक्राउ गरेको थियो। दोस्रोपटक पक्राउ गरेपछि एनसीबी आबुधाबीलले सपुदर्गगीका लागि कागजात माग गरेको थियो।
पक्राउ परेको करिब ६ महिनापछि बल्ल उनलाई नेपाल ल्याइएको हो। त्यतिन्जेल उनलाई युएईकै जेलमा राखिएको थियो।
शिवशरणलाई लिन इन्सपेक्टर कमाण्डको टोली युएई
पक्राउ परेको ६ महिनामा सबै कागजात पुगेपछि सपुर्दगीका लागि अनुरोध गरिएको थियो। सो क्रममा एनसीबी आबुधाबीले शिवशरणलाई भने त्यत्तिकै नपठाउने भन्दै लिनका लागि अफिसर स्तरको प्रहरी कर्मचारी पठाउन भन्दै पत्राचार गरेको थियो। ‘केही जघन्य प्रकृतिका घटनामा प्रहरी कर्मचारी स्वयम् उपस्थित नभए सम्बन्धित देशले सपुर्दगी गर्दैनन्। शिवशरणको पनि हत्या जस्तो जघन्य अपराध जोडिएकाले प्रहरी नै पठाउन अनुरोध भएपछि हामीले प्रहरी कर्मचारी पठाएरै उनलाई नेपाल ल्याएका हौं,’ नेपाल प्रहरीका प्रवक्ता तथा डीआईजी पोषराज पोखरेलले भने।
गत फागुन ११ गते शिवशरणलाई नेपाल सपुर्दगी गर्ने प्रयोजनार्थ सुरक्षा टोली पठाइदिन भन्दै दुबई प्रहरीले पत्राचार गरेको थियो। एनसीबी आबुधाबीले अधिकृतस्तरको प्रहरी कर्मचारी पठाउन भनेपछि इन्टरपोलबाट इन्सपेक्टरको कमाण्डमा २ जनालाई युएई पठाएर उनलाई गत बिहीबार नेपाल ल्याइएको हो। जसकारण शिवशरणलाई नेपाल ल्याउँदा आर्थिक लागत समेत महँगो परेको प्रहरीले जनाएको छ।
उनलाई आवश्यक अनुसन्धानको लागि ईलाका प्रहरी कार्यालय गोरुसिंगे कपिलवस्तुलाई बुझाइएको छ। शुक्रबार अदालतमा उपस्थित गराइएकोमा थुनछेक बहस नसकिएकाले आज (आइतबार) पनि बहस भएको थियो ।आइतबार कपिलवस्तुका न्यायाधीश नरनारयण पौडलेको इजलासले उनलाई पुर्पक्षका लागि कारागार पठाउने आदेश दिएसँगै उनी कारागार चलान भएको कपिलवस्तुका एसपी मीनबहादुर घलेले बताए।
हत्या घटनाका २२ जनालाई नेपाल ल्याइयो
नेपाल इन्टरपोलको सदस्य भएयता शिवशरणजस्तै हत्या घटनामा मुछिएर विभिन्न देशमा पुगेका २२ जनालाई इन्टरपोलको सहयोगमा नेपाल ल्याइएको छ।
नेपालमा व्यक्ति हत्या लगायत विभिन्न अपराध गरेपछि सुरक्षित हुन भन्दै विभिन्न देशमा पुगेर लुकेर बसेकाहरुलाई पक्राउ गर्न भन्दै एनसीबी काठमाडौंले रेड नोटिसका लागि इन्टरपोललाई पत्राचार गर्ने गर्छ। त्यसपछि इन्टरपोलका सदस्य राष्ट्रहरुले त्यस्ता व्यक्तिहरुलाई खोजी गरी सम्बन्धित देशमा बुझाउने गर्छन्।
हालसम्म जालसाझी घटनाका २, वन्यजन्तुसम्बन्धी अपराध घटनाका २, सुन तस्करी घटनाका ७, मानव बेचबिखन घटनाका ४, साइबर अपराध घटनाका १, बलात्कार घटनाका १ र धोखाधडी घटनाका ३ जना गरी ४३ जनालाई नेपाल ल्याइएको एनसीबी काठमाडौंको तथ्यांक छ।
३८ जनाविरुद्ध रेड नोटिस जारी
नेपालमा अपराध गरी फरार भएर विभिन्न देशमा पुगेका ३८ जनाविरुद्ध रेड नोटस जारी गरिएको छ। एनसीबी काठमाडौंको अनुरोधमा उनीहरुविरुद्ध रेड नोटिस जारी भएको हो। रेड नोटिस जारी हुनेहरुमा सबैभन्दा बढी हत्या घटनाका १२ जना छन्।
त्यसपछि धोखाधडी कसुरका ८ जना, मानव बेचबिखन घटनाका ७ जना, वन्यजन्तसम्बन्धी अपराधको घटनाका ३ जना, बलात्कार तथा यौन हिंसा घटनाका २ जना, फिरौती घटनाका २ जना, जालसाझी घटनाका १, अपहरण घटनाका १, लागु औषध र साइबर अपराध घटानाका १/१ गरी ३८ जनाविरुद्ध रेड नोटिस जारी भएको प्रवक्ता पोखरेलले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790399464.jpeg)
-1790307658.jpeg)
-1786602170.png)
