काठमाडौं– अछामका पृथ्वीबहादुर शाहसहितका व्यक्तिहरूले विभिन्न १४ वटा कम्पनी खोलेर ६० करोड रुपैयाँ ठगी गरेको खुलेको छ। उनीसहितको समूहले अमेरिकी, क्यानडियन, बेलायती नागरिकसहितलाई विभिन्न प्रलोभनमा पारेर करोडौं रुपैयाँ ठगी गर्दै नेपाल भित्र्याएको खुलेको हो।
अमेरिकाको फेडेरल ब्यूरो अफ इन्भेष्टिगेसन (एफबीआई)सहितको सहयोगमा नेपाल प्रहरीको केन्द्रीय अनुसन्धान ब्यूरो (सीआईबी)ले गरेको दुई महिना लामो अनुसन्धानबाट उक्त विषयहरू खुलेका हुन्।
शाहसहित अछामकै विजयविक्रम शाह, रंगबहादुर साउद, दोलखाका अनुप खड्का, जाजरकोटका चक्रबहादुर खत्री र नवलपरासी पश्चिमका रुक्माङ्गत काफ्लेलाई पक्राउ गरेर सीआईबीले अनुसन्धान गरेको थियो। ठगी, लिखतसम्बन्धी कसूर, सहकारी ठगी र संगठित अपराधमा गरिएको अनुसन्धानको क्रममा शाहसहित १९ जनाको समूहले करोडौं रुपैयाँ ठगी गरेको खुलेको हो।
अमेरिकी नागरिक जुलिया होड्गेज रिक्किट, डार्लेन पेड्रोन्सिल, एलिजाबेथ डिना मासहितका व्यक्तिलाई शाहले एन्टी भाइरस नवीकरण गरिदिने भनी उनीहरूको खातामा अनधिकृत पहुँच पुर्याएर रकम निकालेको पाइएको अनुसन्धानबाट खुलेको छ। खातामा अनधिकृत पुहँच पुर्याएर उक्त रकम शाहले हन्टिङ रिसर्भ अफ नेपाल प्रालिको नाममा रहेको नेपालस्थित विभिन्न बैंकको खातामा जम्मा गरेको खुलेको सीआईबीले जनाएको छ।
हन्टिङको नाममा रकम जम्मा भएपछि विभिन्न व्यक्ति तथा सहकारी संस्थाको खातामा रकम जम्मा गरी रकमान्तर गरेको अनुसन्धानबाट खुलेको छ। शाहले ठगी गर्ने उद्देश्यले आपराधिक समूह बनाएर देश तथा विदेशमा समेत मान्छे परिचालन गरेर ठगी गरेको खुलेको छ। कम्प्युटर सञ्चार प्रविधिको माध्यमबाट विभिन्न मान्छेसँग सम्पर्क गर्दै बैंक खातासम्म पुहँच पुर्याएर ४५ लाख ४६ हजार ६३९ अमेरिकी डलर (५९ करोड रुपैयाँ भन्दा बढी) २२ हजार पाउण्ड स्टर्लिङ ठगी गरेको पाइएको अभियोगपत्रमा उल्लेख गरिएको छ।
ठगी गरिएकोमध्ये केही रकम भारतमा समेत पुर्याएको अनुसन्धानबाट खुलेको छ। शाहको मोबाइल परीक्षण गर्दा तीन बन्डल अमेरिकी डलर पार्सल गरी पठाएको र उक्त पार्सल डिपार्टमेन्टल स्टोरजस्तो देखिने स्थानमा खोलिएको भिडियो समेत प्राप्त भएको, भारतीय नागरिकसँग भएको विभिन्न कुराकानीबाट उक्त रकम भारतमा समेत पुर्याएको खुलेको औंल्याइएको छ।
ठगी गरेको रकमबाट शाहले विभिन्न व्यक्तिको नाममा रकमान्तर गरेको, घरजग्गा, सेयर खरिद र बीमाकंनसमेत गर्ने गरेको खुलेको छ। ठगी गरेको रकमबाट शाहले काठमाडौंसहित १३ ठाउँमा १६ करोड रुपैयाँ भन्दा बढीको जग्गा खरिद गरेको खुलेको छ। त्यस्तै, बीमामा करिब २ करोड जम्मा गरेको, २ करोडकै सेयर खरिद गरेको पाइएको छ।
शाहले शंकास्पद रुपमा नेपाल भित्र्याएको रकम राष्ट्र बैंकले रोक्का गरेपछि तत्कालीन अर्थमन्त्री जनार्दन शर्माले फुकुवाका लागि निर्देशन समेत दिएको विषय सार्वजनिक भएको थियो। उक्त कुरा नमानेपछि गभर्नर महाप्रसाद अधिकारीलाई बर्खास्तीको प्रक्रिया अघि बढाइएको थियो। पछि सर्वोच्चले अन्तरिम आदेश दिएपछि अधिकारी काममा फर्किएका थिए।
उनीहरूले ठगीबाट आर्जित गरेको रकम ३८ करोड, ८६ लाख ६२ हजार १३६ रुपैयाँ रहेको खुल्न आएको छ। शाहको समूहले ठगी गरी नेपाल ल्याएको रकममध्ये १ करोड २८ लाख ९३ हजार ८५ रुपैयाँ बैंकहरूले रोक्का गरिदिएको पनि सीआईबीको अनुसन्धानमा उल्लेख गरिएको छ।
पक्राउ परेका सबैलाई काठमाडौं जिल्ला अदालतले सोमबार पुर्पक्षका लागि कारागार चलानको आदेश दिएपछि उनीहरू कारागार चलान भएका छन्।
यो पनि पढ्नुहोस्
अमेरिकी नागरिकसहितबाट ३९ करोड ठगी प्रकरण: पृथ्वी शाहसहित ६ जना जेल चलान
पृथ्वी शाह र उनको समूहमाथि ठगीसम्बन्धी चारवटा मुद्दा लगाउन सिआईबीको सिफारिस
शंकास्पद कारोबार गरेको आरोपमा पृथ्वी शाहसहित ६ जना पक्राउ
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
