भोजपुरी गायक पवन सिंहको गालामा ढुंगा प्रहार

समाचार

नेपाल लाइभ बुधबार, फागुन २४, २०७९ १६:०३

काठमाडौं– भोजपुरीका चर्चित गायक तथा अभिनेता पवन सिंहको कार्यक्रममा ढुंगा प्रहार भएको छ।

घटना उत्तर प्रदेशस्थित बलिया नागराको हो। पवन सिंह सोमबार आयोजित एक कार्यक्रममा प्रस्तुति दिन त्यहाँ पुगेका थिए। केहीले पवन सिंहलाई आफ्नो मनपर्ने गीत गाउन अनुरोध गरेका थिए, जुन उनले पूरा गरेनन्। यसबाट आक्रोशित एक व्यक्तिले पवन सिंहलाई ढुङ्गा हाने, जुन उनको गालामा लागेको थियो।

घटनाको भिडियो सार्वजनिक भएको छ। भिडियोमा पवन सिंह स्टेजमा प्रस्तुति दिइरहेका बेला एउटा ढुङ्गा हावामा उडेर उनको गालामा हानेको देखिन्छ। यो देखेर पवन सिंह छक्क पर्छन्। उनले बीचमा गीत रोकेर मात्रै भएन, स्टेजबाटै ढुंगा हान्नेलाई गाली पनि गर्न थाले।

पवन सिंहले मञ्चबाट चुनौती दिए र सोधे, ‘भीडमा लुकेर ढुंगा हान्ने को हो?’ उनले ती व्यक्तिलाई आफ्नो शत्रु भन्दै चुनौती दिँदै भने, ‘यदि आफूमा हिम्मत छ भने लुक्नुको सट्टा अगाडि आएर देखाऊ।’पवन सिंहले यस्ता ढुङ्गाले पनि रोक्न नसक्ने बताए।

पवन सिंहको चुनौतीले विवाद उकास्यो। आक्रोशित भीडले त्यहाँ कुर्सी र ब्यारिकेड तोड्ने मात्रै गरेनन्, एकअर्कालाई इँटा र ढुंगा हान्न समेत थाले। मामिला शान्त पार्न प्रहरीले भीडमाथि लाठी चार्ज गर्नुपरेको थियो। केही घण्टाको संघर्षपछि स्थिति नियन्त्रणमा आएको थियो। तर पवन सिंह फेरि स्टेजमा प्रस्तुत भएनन्। प्रहरीका अनुसार अहिले यसबारे अनुसन्धान भइरहेको छ।

बिहारको आराबाट आएका पवन सिंहको छवि विवादास्पद भोजपुरी स्टारको रूपमा छ। २०१८ मा उनकी श्रीमती नीलमले मुम्बईको फ्ल्याटमा आत्महत्या गरेकी थिइन्। उनको दोस्रो विवाह पनि विवादमा परेको छ।

पवन सिंहकी दोस्रो श्रीमती ज्योतिले उनीमाथि धेरै गम्भीर आरोप लगाएर सम्बन्धविच्छेदको लागि अदालतमा निवेदन दिएकी छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

उमेर हुनजेल लोकसेवा लड्न दिऔँ –सांसद ज्वाला

बाजुरामा जिउँदै गाईलाई नदिमा बगाउनेलाई कारवाहीको माग

प्रतिनिधिसभा बैठक सुरु (Live)