काठमाडौँ- त्रिभुवन विश्वविद्यालयभन्दा पुरानो क्याम्पसको रूपमा परिचित छ, त्रिचन्द्र बहुमुखी क्याम्पस। मुलुककै जेठो क्याम्पस त्रिचन्द्रलाई नेता उत्पादन गर्ने ‘कारखाना’को रूपमा समेत चिनिन्छ।’
राणा प्रधानमन्त्री श्री ३ चन्द्र शमशेर जबराले विसं. १९७५ भदौ १२ गते त्रिचन्द्र क्याम्पसको स्थापना गरेका थिए। तत्कालीन राजा त्रिभुवनले १९७६ असोज २७ गते चाँदीको ताल्चा र चाँदीकै साँचोले खोलेर उक्त क्याम्पसको उद्घाटन गरेका थिए।
यस क्याम्पसले मुलुकको बागडोर समाल्ने राजनीतिज्ञदेखि प्राध्यापक, राष्ट्रसेवक कर्मचारी लगायत उच्च ओहोदाका व्यक्ति उत्पादन गरिसकेको छ।
पूर्वप्रधानमन्त्री कीर्तिनिधि विष्ट, गिरिजाप्रसाद कोइराला, शेरबहादुर देउवा, झलनाथ खनाल यही क्याम्पसका विद्यार्थी हुन्। यही क्याम्पसले बालकृष्ण सम, सुवर्ण शमशेर, लक्ष्मीप्रसाद देवकोटा, शङ्करदेव पन्त, सहिद दशरथ चन्द, गङ्गालाल श्रेष्ठका साथै डिल्लीरमण रेग्मी, यदुनाथ खनाल, गोपालप्रसाद रिमाल, तुलसीलाल अमात्य, विजयबहादुर मल्ल, गोविन्दबहादुर मल्ल, थिरबम मल्ल, मोहम्मद मोहसिन लगायत प्रतिभाहरूलाई दीक्षित गरायो। यो क्याम्पसले नेपाली कांग्रेसका महामन्त्री गगन थापा लगायतका राजनीतिज्ञहरू समेत जन्माएको छ।
२०३६ सालदेखि नेविसंघको एकलौटी
नेपाल विद्यार्थी संघले त्रिचन्द्र क्याम्पसको स्ववियु सभापतिमा २०३६ सालदेखि एकलौटी जित हासिल गर्दै आएको छ। त्रिचन्द्रमा २०३६ सालमा पहिलो पटक गोपीकृष्ण घिमिरे स्ववियु सभापति निर्वाचित भएका थिए।
त्यसैगरी ऋषिकेश घिमिरे (२०३८),अच्युत गौतम (२०३९), किशोर घिमिरे (२०४१), रामहरि ढुङ्गेल (२०४३), सुरेन्द्र पाण्डे (२०४५), शङ्कर भण्डारी (२०४९), किशोरसिंह राठोर (२०५१), हरि आचार्य (२०५१), गगन थापा (२०५५), सूर्यराज काफ्ले (२०५७), सरोजकुमार थापा (२०५७), दीपक भण्डारी (२०६२) र विनयराम भट्ट (२०६५) यो क्याम्पसको स्ववियु सभापति भएका छन्।
१४ वर्षपछि हुन लागेको त्रिचन्द्रको स्ववियु निर्वाचनमा यतिबेला विभिन्न विद्यार्थी संगठनबाट आकांक्षी रहेका छन्। नेविसंघ पुरानो बिरासत जोगाउन लागिपरेको छ भने अनेरास्ववियुका उम्मेदवार बिरासत भत्काउने कसरतमा छन्।
नेविसंघबाट एनपी जोशीको दाबी
नेपाल विद्यार्थी संघ त्रिचन्द्रबाट एनपी जोशीले स्ववियु सभापतिको दाबी गरिरहेका छन्। नेता जोशी भन्छन्, ‘विद्यार्थीहरूको एक मात्र प्रजातान्त्रिक संस्था नेपाल विद्यार्थी संघबाट मेरो उम्मेदवारी हुनेछ। नेविसंघको मुल आदर्श राष्ट्रियता, लोकतन्त्र, समाजवाद र विद्यार्थी एकतालाई सदैव शिरोपर गरी म अनवरत रूपमा लामो समयदेखि योगदान गरिरहेको छु। त्यसैले मेरो उम्मेदवारी स्वाभाविक रूपमा रहन्छ।’ आफू शैक्षिक उन्नयनका लागि आम विद्यार्थीको माझमा रहेको दाबी उनको छ।
उनले क्याम्पसको समग्र उन्नतिका लागि मूलभूत रूपमा अत्याधुनिक विज्ञान तथा प्रविधि विश्वविद्यालयको रूपमा अगाडि बढाउने संकल्प रहेको दाबी गरे।
विद्यार्थीमैत्री छात्रावास, स्थायी प्राध्यापकहरूका लागि आवासको कुरा अजेण्डामा रहेको उल्लेख गर्दै जोशीले समग्र क्याम्पसलाई सक्षम, सबल, आत्मनिर्भर र विश्व समुदायमा अब्बल दक्ष जनशक्ति उत्पादन गर्ने थलोको रूपमा स्थापित गर्नका लागि आफ्नो उम्मेदवारी रहने स्पष्ट पारे।
गुणस्तरीय, व्यावहारिक, रोजगारीमुलक र जीवन उपयोगी शिक्षा दिने नीति कार्यान्वयन गर्ने, अनिवार्य रूपमा अत्याधुनिक ल्याबको विकास गर्दै हरेक विद्यार्थीले अनिवार्य अनुसन्धान गर्ने थलो बनाउन आफू स्ववियु सभापतिको आकांक्षी रहेको उनले दाबी गरे।
शैक्षिक क्यालेन्डर कार्यान्वयन, क्याम्पसमा शैक्षिक मैत्री र शान्त वातावरणमा पठनपाठनको विकास, अध्ययनपश्चात् हरेक विद्यार्थीको रोजगारीको ग्यारेन्टी गर्न देशका हरेक सरकारी निकाय, निजी क्षेत्र र सबै तहका सरकारसँग समन्वय र संवाद आफ्नो अजेण्डामा समेटेको उनले बताए।
इलेक्ट्रोनिक लाइब्रेरीको व्यवस्था गर्ने, नवीन प्रविधिको प्रयोग गरी क्याम्पसका हरेक गतिविधिहरू डिजिटालाइज्ड गर्ने, विश्वविद्यालयले सञ्चालन गर्ने कक्षा, परीक्षा, नतिजा प्रकाशन लगायतका सम्पूर्ण गतिविधिलाई पूर्व निर्धारित कार्यतालिका बमोजिम विश्वसनीय र प्रभावकारी तरिकाले सञ्चालन गर्नका लागि आफ्नो उम्मेदवारी रहने जोशीको भनाइ छ।
नेविसंघको बिरासत तोड्छौंः अध्यक्ष कँडेल
अनेरास्ववियु त्रिचन्द्र बहुमुखी क्याम्पसका अध्यक्ष सुनिल कँडेलले यस पटक नेविसंघको विरासत तोड्ने दाबी गरेका छन्। उनले अनेरास्ववियुले स्ववियु केन्द्रित गतिविधिहरूलाई तीव्र पारेको बताउँदै क्याम्पस प्रशासनको मातहतमा बनेको स्ववियु निर्वाचन समितिसँग समेत छलफल परामर्श गरेको बताए।
कँडेलले भने, ‘चैत ५ गते हुने स्ववियु निर्वाचन भयरहित हुनुपर्छ। करिब १५ वर्षदेखि हुन नसकेको स्ववियु निर्वाचन कुनै पनि बहानामा रोकिनु हुँदैन।’
विगत ४० वर्षदेखि नेविसंघले जित्दै आएको भए पनि उसले विद्यार्थीहरूको हकहितमा काम गर्न नसकेको आरोप उनले लगाए। नेविसंघले कलेजलाई भूतबङ्गाला जस्तो बनाएको आरोप लगाउँदै कँडेलले नेविसंघको कुनै सङ्गठन नभएको र नेविसंघको नाममा अनेक झुन्डहरू आएर तालाबन्दी गर्ने, क्याम्पस तोडफोड गर्ने गरेको बताए।
क्याम्पसको शैक्षिक र प्रशासनिक सुधारका लागि अनेरास्ववियुले जित्नु पर्ने उनको दाबी छ। अनेरास्ववियु शैक्षिक आन्दोलनको सङ्गठन भएको बताउँदै उनले अनेरास्ववियुले जितेका क्याम्पसहरू व्यवस्थित भएको दाबी गरे। उनले गुण्डागर्दी र दादागिरीका कारण त्रिचन्द्रको साख गिर्दै गएको बताए। आफ्नो सङ्गठनको प्रमुख माग भनेको ई-लाइब्रेरी, क्यालेन्डर कार्यान्वयनका साथै भौतिक सुधार रहेको बताउँदै उनले नेविसंघबाट निर्वाचित पूर्वस्ववियु सभापतिले क्याम्पसलाई दोहन गरेको आरोप लगाए।
उमेर हदका कारण क्याम्पसका अध्ययनरत विद्यार्थीहरूलाई मर्का परेको बताउँदै उनले अनेरास्ववियुले एक/दुई दिनमा उम्मेदवारको टुंगो लगाउने बताए।
सबै विद्यार्थीको साझा उम्मेदवार बन्छु: शाही
नेकपा एकीकृत समाजवादी निकट अनेरास्ववियूका नेता विकासजंग शाहीले आफू त्रिचन्द्र क्याम्पस स्ववियु सभापतिको साझा उम्मेदवार भएको दाबी गरे। विद्यार्थीहरूका हरेक समस्यामा आफू भिजेको बताउँदै उनले यो या त्यो नभनी काम गरेका कारण साझा उम्मेदवारको रूपमा आफूलाई उभ्याउने दाबी गरे ।
विद्यार्थीका हकहितका पक्षमा आफू सदैव लामो समयदेखि अग्रस्थानमा रहेर काम गरेको बताउँदै शाहीले त्रिचन्द्र बहुमुखी क्याम्पसका आम विद्यार्थीको साझा उम्मेदवार आफू भएको बताए।
उनले भने, ‘२०२० सालदेखि एउटै अजेण्डा छन्। तिनीहरूलाई परिमार्जन गर्नुपर्नेछ। रोजगारमुलक शिक्षा हुन आवश्यक छ।’ उनले हिजोको परम्परागत चक-डस्टरको शिक्षालाई डिस्प्लेमा आधारित शिक्षण बनाउनुपर्ने बताए। उनले प्रविधिमैत्री शिक्षामा जोड दिँदै त्रिचन्द्र क्याम्पसमा सेमिनार हल, ल्याब, प्रयोगशाला नभएको बताउँदै त्यस्ता समस्या समाधानका लागि आफू स्ववियु सभापतिमा निर्वाचित हुन चाहेको बताए।
क्याम्पसलाई स्मार्ट बनाउने योजनासहित आफ्नो घोषणापत्र जारी गर्न लागेको उनको भनाइ छ। ‘२०३६ सालदेखि नेविसंघले स्ववियु जितेर के गर्यो?, कलेजको अवस्था कहाँ छ?,’ उनको प्रश्न छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
