काठमाडौं– नेकपा एमालेका सचिव तथा सांसद योगेश भट्टराईले जुन जगमा पुष्पकमल दाहाल प्रचण्ड प्रधानमन्त्री भए, त्यही जगमा एमालेबाट प्रस्तावित व्यक्ति राष्ट्रपति हुने बताएका छन्।
शनिबार एमाले निकट ताप्लेजुङ–काठमाडौं सम्पर्क मञ्चले प्रतिनिधि सभामा निर्वाचित सांसदलाई बधाई तथा शुभकामनाका लागि आयोजना गरेको कार्यक्रममा सम्बोधन गर्दै भट्टराईले पुस १० कै सहमतिको जगमा प्रदेशमा मुख्यमन्त्रीहरु बनेको बताए।
‘अन्यत्र सबैतिर पुस १० गतेकै सहमति अनुसार हुने तर राष्ट्रपति हुन नहुने किन?,’ उनले भने, ‘कि त मुलुकमा अर्को राजनीतिक समीकरण निर्माण हुनुपर्यो। यदि यो राजनीतिक समीकरण आजको आवश्यकता हो र यो कायम छ भने राष्ट्रपति पदमा मात्रै त्यो खण्डित हुनुपर्ने औचित्य छैन।’
भट्टराईले फागुन २५ गते एमालेबाट प्रस्तावित व्यक्ति राष्ट्रपति निर्वाचित हुने र चैत २ गते सत्ता गठबन्धनकै व्यक्ति उपराष्ट्रपति निर्वाचित हुने दाबी गरे।
गत पुस १० गते एमाले र माओवादी केन्द्र लगायतका दलहरुबीच नयाँ सत्ता साझेदारीको सहमति हुँदा प्रचण्डलाई प्रधानमन्त्रीमा सघाउने र राष्ट्रपति तथा सभामुखमा एमालेले प्रस्तावित गरेका व्यक्तिलाई सघाउने सहमति भएको बताइन्छ।
अन्य पदहरुको निर्क्र्योल भइसकेको भए पनि राष्ट्रपति र उपराष्ट्रपतिको निर्वाचन बाँकी छ। ती पदमा माओवादी केन्द्रले एमाले उम्मेदवारलाई नसघाएर कांग्रेस उम्मेदवारलाई सघाउने आशंका व्यक्त गर्न थालिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
