काठमाडौं- विमानस्थलको रेडियो अपरेटरमा रहेर सुन तस्करीको सेटिङमा सहयोग गर्दै अवैध आर्जन गरेको अभियोगमा विशेष अदालतले श्यामकृष्ण च्यामु श्रेष्ठलाई दोषी ठहर गरेको छ।
विशेष अदालतका अध्यक्ष श्रीकान्त पौडेल, न्यायाधीशहरु यमुना भट्टराई र खुशीप्रसाद थारुको इजलासले उनीहरुलाई दोषी ठहर गरेको हो।
विशेषले विमानस्थलमा कार्यरत रहँदा अवैध रुपमा आर्जन गरेको र विभिन्न आफन्तको नाममा राखेको अवैध सम्पत्ति जफत हुने फैसला सुनाएको छ। विशेषले ४ करोड ५७ लाख बराबर बिगो र जरिवाना गर्ने ठहर ठरेको छ।
भ्रष्टाचार निवारण ऐन अनुसार १ वर्ष तीन महिना कैद हुने फैसला पनि सुनाएको छ। विशेषले श्रेष्ठलाई २ करोड २८ लाख ७४ हजार १ सय ३२ रुपैयाँ बिगो र सोही बराबरको जरिवाना गर्ने फैसला सुनाएको हो। त्यस्तै उनले जागिरको अवधिमा आर्जन गरेको अवैध सम्पत्ति जफत हुने ठहर पनि गरेको छ।
जाँच अवधिमा १८ करोड ८२ लाख २५ आर्जन देखिएको र त्यसमध्ये उनले वैधानिक दावी गरेको १६ करोड ५३ लाख ५१ रुपैयाँ देखिएको विशेषको फैसलामा उल्लेख छ।
सुन तस्करीमा मुछिएपछि अनुसन्धान हुँदा खुल्यो अवैध आर्जन
सुन तस्करीसँग कनेक्सन देखिनुअघि उनी अख्तियार दुरुपयोग अनुसन्धान आयोगको छानबिनबाट जोगिँदै आएका थिए।
चुडामणि उप्रेती गोरे सहितको सूहमा साढे ३३ किलो सुन तस्करी विमानस्थलबाट भएको अनुसन्धानमा देखियो। उर्लाबारीका सनम शाक्यको हत्याभएपछि खोजी हुँदै जाँदा ३३ किलो सुन तस्करीमा ठूलो समूहको संलग्नता देखिएको थियो।
जिल्ला अदालत मोरङमा ६२ जना विरुद्ध सुन तस्करीको मुद्दा दायर भय। उक्त कार्यमा संलग्न भएको भनी श्रेष्ठलाई पनि प्रतिवादी बनाइयो। आयोगले ३३ किलो सुन तस्करीको अभियोगमा निलम्बन परेपछि छानविन गर्दा त्रिभुवन अन्तर्राष्ट्रिय विमानस्थल, भन्सार कार्यालयका रेडियो अपरेटर रहेका श्रेष्ठको १४ करोड बराबारको अवैध सम्पत्ति आर्जन गरेर लुकाएर राखेको पत्ता लगायो।
अनुसन्धानपछि उनी विरुद्ध ती सबै सम्पत्ति जफत र भ्रष्टाचार निवारण ऐन अनुसार कैद तथा आर्जन गरेको सम्पत्ति जफत हुनुपर्ने माग गर्दै भ्रष्टाचार मुद्दा २०७५ फागुन १५ विशेष अदालतमा दायर गरेको थियो।
उनी २०७५ वैशाखमा सुन काण्डमा जिल्ला अदालतमा मुद्दा दायर हुँदै निलमबनमा परेका थिए। अख्तियारले उनीविरूद्ध १४ करोड ६१ लाख २४ हजार ४ सय ७८ भ्रष्टाचार गरी राष्ट्रलाई हानि-नोक्सानी पुर्याएको दावी गरिएको थियो।
अभियोगपत्रमा उनको वैधानिक आय जम्मा ९ करोड ६३ लाख ८ हजार ८ सय २७ रूपैयाँ मात्र भएको दावी गरेको थियो। उनले विभिन्न ठाउँमा गरेको लगानी र खर्च जोड्दा उनको सम्पत्ति १९ करोड ७४ लाख ५५ हजार ८ हजार १६ रूपैयाँ देखिएको थियो। वैधानिक रकम घटाउँदा उनको स्रोत नखुलेको सम्पत्ति १० करोड ११ लाख हुन्छ। तर अख्तियारले भने स्रोत नखुलेको सम्पत्तिबाट ४ करोड बढिबढाउ रकमलाई पनि स्रोत नखुलेको भन्दै १४ करोडको भ्रष्टाचार मुद्दा दायर गरेको हो।
२०५३ सालमा सरकारी सेवा प्रवेश गरेपछिको उनको सम्पत्ति अनुसन्धान र विश्लेषण गरी अख्तियारले उनीमाथि भ्रष्टाचार मुद्दा लगाएको थियो। उनलाई भ्रष्टाचार निवारण ऐन २०५९ को दफा २० बमोजिम २ वर्षसम्म कैद र १४ करोड नै जरिवाना तिराउनुपर्ने अख्तियारको अभियोगपत्रमा उल्लेख छ। त्यस्तै १४ करोड ६१ लाख रूपैयाँ बराबरको सम्पत्ति उनी, उनको परिवार र आफन्तबाट जफत गर्न पनि अख्तियारले भनेको थियो।
यसरी बिगो जफत गरेपछि त्यति नै जरिवाना पनि तिराउनुपर्ने अख्तियारको माग छ। उक्त सम्पत्ति जफत गर्नकै लागि भनेर अख्तियारले उनका बुबाआमा, दुवै जना श्रीमती, भाइ र भाइबुहारीलाई पनि अख्तियारले श्रेष्ठको मुद्दाका प्रतिवादी बनाएको थियो।
‘चल-अचल सम्पत्ति जफत गर्ने प्रयोजनको लागि बुबा ज्ञानकृष्ण श्रेष्ठ, आमा चन्द्रदेवी च्वामु श्रेष्ठ, भाइ रामकृष्ण श्रेष्ठ, भाइबुहारी रविना प्रधानाङ्ग, श्रीमतीहरू तारादेवी श्रेष्ठ र रेखा श्रेष्ठलाई समेत प्रतिवादी कायम गरिएको छ,’ अख्तियारको अभियोगपत्रमा भनिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773837959.png)
