गुल्मी– कृषि ज्ञान केन्द्र गुल्मी सुन्तलाजात बगैँचा सुदृढीकरण तथा कृषकका समस्या पहिचान कार्यक्रम लिएर कृषकसम्म पुगेको छ।
शुक्रबार गुल्मी दरबार गाउँपालिका–३ राजामा ‘कृषकसँग विज्ञ’ कार्यक्रम अन्तर्गत सुन्तलाजात बगैँचा सुदृढीकरण तथा कृषककै बगैँचामा उनीहरूको समस्या पहिचान कार्यक्रम गरिएको हो। यसरी कृषकहरूका बगैँचामा आएर प्रत्यक्ष भेटघाट गर्दा वास्तविक समस्या पहिचान हुने र समाधानको बाटो देखाउन सकिने कृषि ज्ञान केन्द्र गुल्मीका प्रमुख नवराज भण्डारीले बताए।
ज्ञान केन्द्रका कर्मचारीहरूले बगैँचा सुदृढीकरण गर्ने तरिका सिकाउँदै सुन्तलामा मल लगाउने तरिका, बोडो पेस्ट तथा बोडो मिक्चर कसरी मिश्रण गर्ने र बोटमा लगाउने भन्ने विषयमा प्रयोगत्मक प्रशिक्षण दिए।
कृषकहरूले सुन्तला बर्खाको बेलामा ढुसी लागेर झर्ने र साना बोटहरू नै पहेंलो हुने, सुन्तला अमिलो हुने र सुन्तलामा दाग देखा पर्ने लगायतका समस्या भएको बताएका थिए।
यस्तै, सुन्तला बाक्लो फलेपनि सानो सानो दाना फल्ने भएकाले बिक्री वितरण गर्न गाह्रो भएको कृषक जानकी टण्डनले बताइन्।
1675477675.jpg)
कृषकहरूको सुन्तला खेतीको समस्याको सम्बोधन गर्दै कृषि ज्ञान केन्द्र गुल्मीका प्रमुख भण्डारीले सुन्तलालाई राम्रो बनाउनका लागि माघ महिनामा अनिवार्य मल लगाउनु पर्ने बताउँदै धेरै गहिरोमा मल हल्दा बिरुवाको जराले उक्त मल लिन नसक्ने बताए। उनले १५ सेन्टिमिटरभन्दा माथि गहिराइमा मल हाल्नु पर्ने सिकाए। जसले गर्दा सुन्तलाको बोट पनि हुर्कने र फल पनि राम्रो हुने उनको भनाइ छ।
कार्यक्रममा ८० जना कृषकहरूको सहभागिता रहेको थियो। यस कार्यक्रमबाट सुन्तला उत्पादन वृद्धि गर्नका लागि मल हाल्ने तरिका, काटछाँट गर्ने तरिका, सिंचाइ गर्ने तरिका लगायतको जानकारी पाएको कृषकहरूले बताए।
यसरी कृषकहरूको बगैँचामा आएर उनीहरूलाई प्रशिक्षण दिएकोमा गाउँपालिकाले कृषि ज्ञान केन्द्रलाई धन्यवाद दिएको छ। गाउँपालिकाका अध्यक्ष सरोजकुमार थापाले आफ्नो पालिकाको समृद्धि कृषि क्षेत्रबाट मात्रै हुने भएकाले यसतर्फ विभिन्न कार्यक्रम ज्ञान केन्द्रसँग सहकार्य गरेर गर्ने बताए।
कृषकहरूलाई निलो तुथो, चुना, जैविक मल, सूक्ष्म तत्व लगायतका मल तथा औषधि समेत वितरण गरिएको थियो। गुल्मीमा यो वर्ष २९ करोडको सुन्तला उत्पादन भएको र १३ करोडको सुन्तला अन्य जिल्लाहरूमा निर्यात भएको ज्ञान केन्द्र गुल्मीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
