डार्बिन– नेपथ्यले अष्ट्रेलिया टुरको डार्बिनमा भव्य सुरुआत गरेको छ। भर्खरै नयाँ स्वरुप पाएको ‘डार्बिन इन्टरटेनमेन्ट सेन्टर’मा बुधबार नेपथ्यले कन्सर्ट गरेको हो।
कन्सर्टको सुरुवात नेपथ्यको ताजा सिर्जना ‘भटभटे’बाट भयो। गीत चलिरहँदा काठमाडौंको अस्तव्यस्त सडकमा छायांकन गरिएको त्यसको म्यूजिक भिडियो पछाडि पर्दामा देखाइएको थियो।
त्यसपछि ब्याण्डको प्रारम्भिक दिनदेखिकै चर्चित गीत ‘छेक्यो छेक्यो’ सुनाइएको थियो। यसअघि सन् २०१९ मा नेपथ्यले यसैगरि अष्ट्रेलियाको टुर गरिरहँदा उक्त गीतका सर्जक शुक गुरुङको नेपालमा देहावसान भएको थियो। परदेशमा यो सुनेर दुःखी भएको ब्याण्डले लगत्तैको मेलबर्न कन्सर्टमा स्टेजबाटै गुरुङप्रति श्रद्धाञ्जली अर्पण गरेको थियो।
यसपटक डार्बिनमा कन्सर्ट आयोजना हुनुभन्दा ठीक एकदिन अघि चार वर्ष अघिको त्यही भिडियो रेकर्डलाई ब्याण्डले आफ्नो आधिकारिक युट्युब च्यानलबाट रिलिज गरेको थियो। त्यसपछि ‘भेँडाको ऊनजस्तो’ गीतसँगै हलभित्र हिउँको वर्षा हुन थालेपछि तातो डार्बिनका वासिन्दाहरु रमाउँदै नाच्न सुरु गरे।
‘तपाइँहरुलाई यहाँ देख्दा मलाई गाउँमै पुगेको भान पर्दैछ,’ ब्याण्डका मुख्य गायक एवं अगुवा अमृत गुरुङले भने, ‘अब म तपाइँहरुलाई हाम्रो उतै गाउँको रोदीघरतिर लैजान्छु।’ त्यसपछि ‘लामपाते सुरती’ गाए।
‘जोमसोमे बजार’ र ‘शीरफूल शीरैमा’जस्ता गीतहरु गाउँदा पछाडि दृश्यमा पहाडी अनि हिमाली भेगका यात्राको क्रममा खिचिएका दृश्य देखाइएको थियो। त्यसले दर्शकलाई पनि जोमसोम र धौलागिरितिरै पुर्याएको थियो।
‘हाम्रा सुन्दर डाँडाकाँडाहरु पैदल घुम्ने अवसर पाएकोमा म आफूलाई भाग्यमानी ठान्छु,’ अमृतले भने, ‘अर्को पटक तपाइँहरु पनि नेपाल पुग्दा त्यसैगरि गाउँ ठाउँ पुग्ने अवसर नगुमाउनु होला।’
भर्खरै नेपालमा ‘मानवताको लागि संगीत’ नारा बोकेर सिंगो मुलुक भ्रमण गरेको नेपथ्यले यो वर्ष पुरै त्यसै नाराका साथ आफूलाई अघि बढाउने संकल्प लिएको छ। संगीतका माध्यमबाट मानवताको प्रवर्द्धन हुन सकोस् भन्ने भावनाले यसो गरिएको नेपथ्यले जनाएको छ।
अष्ट्रेलियाका दर्शकहरुमाझ पनि मानवसेवा आश्रमबाट उद्धार गरिएकाहरुको दृश्य राखेर तयार पारिएको भिडियो नै पृष्ठभूमिमा प्रस्तुत गरिएको थियो।
यो गीत सकिनेबित्तिकै अमृतले उपस्थित डार्बिनका दर्शकलाई मानवताको खातिर अघि बढ्न आह्वान गरेका थिए।
त्यसपछिको चरणमा भने ‘जोगले हुन्छ भेट’, ‘रेशम’ र ‘तालको पानी’ जस्ता गीत प्रस्तुत गरिएको थियो। कार्यक्रमको अन्त्य भने राष्ट्रिय झण्डाको महिमागान गर्दै ‘रातो र चन्द्रसूर्जे’ सुनाएर गरिएको थियो।
‘यो कार्यक्रम हेरुन्जेल मनोरञ्जन मात्र नभइ पुराना दिनका याद र चेतनामूलक सन्देशले असाध्यै छोइरहेको थियो,’ डार्बिनका आयोजक सुबिन कँडेलले भने, ‘कार्यक्रम हेर्न आएका सबैजसो दर्शकबाट असाध्यै उत्साहजनक प्रतिक्रिया पाइरहेको छु।’
उत्तरको डार्बिनबाट सुरु भएको नेपथ्यको अष्ट्रेलिया श्रृंखला अब दक्षिणको ‘साउथ अष्ट्रेलिया’ राज्यतर्फ बढ्नेछ। त्यसको राजधानी एडिलेडस्थित ‘हिण्डले स्ट्रीट म्यूजिक हल’मा जनवरी २८ तारिख शनिबारका दिन नेपथ्यका गीतहरु सुनाइने छन्। त्यस हलमा चार वर्षअघि पनि नेपथ्य प्रस्तुत भएको थियो।
एडिलेडपछि ब्रिसबेनको ‘फोर्टिच्यूड म्यूजिक हल’, क्यानबेराको ‘म्येनिंग क्लार्क हल, पर्थको ‘मेट्रो सिटी हल’, सिड्नीको ‘होडर्न पभिलियन’, मेलबर्नको ‘फोरम’हुँदै अन्तिममा ब्याण्डको यात्रा अष्ट्रेलियाकै पुछारतर्फको हुनेछ। बेग्लै टापुमा बसेको राज्य तास्मानियाको राजधानी होबार्टस्थित ‘ओडियन थिएटर’मा फेब्रुअरी १७ तारिख शुक्रबारको दिन यसपटक अष्ट्रेलिया यात्राकै अन्तिम प्रस्तुति नेपथ्यले दिनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
