काठमाडौं- पोखरामा दुर्घटनाग्रस्त यती एयरको जहाजमा सवार यात्रुहरुको शव काठमाडौं ल्याएर पोष्टमार्टम गर्दै सनाखत गरेर सम्बन्धित परिवारको जिम्मा लगाउने काम भइरहेको छ।
यतीको एन ९–एएनसी एटीआर–७२ को विमान माघ १ गते पोखरामा जाने क्रममा पोखराको नयाँ एयरपोर्ट नजिकैको सेती नदीको किनारामा दुर्घटनाग्रस्त भएको थियो। चालक दलका चार सदस्यसहित ७२ जना सवार जहाजमा सबैको मृत्यु भएको थियो।
मृत्यु भएकामध्ये केहीको शव तत्कालै पहिचान गरेर आफन्तलाई बुझाइएको थियो। बाँकी ४८ शव पोष्टमार्टमका लागि त्रिवि शिक्षण अस्पताल काठमाडौं ल्याइएको थियो। काठमाडौं ल्याइएका ४८ शवमध्ये ३४ वटा शव पहिचान गरेर आफन्तको जिम्मा लगाइएको छ। अझै १४ वटा शव पहिचान गरेर बुझाउन बाँकी रहेको त्रिवि शिक्षण अस्पतालका फरेन्सिक मेडिसिन विभागका प्रमुख डा गोपालकुमार चौधरीले बताए।
शव अत्यधिक जलेको र टुक्रा–टुक्रा भएको हुनाले पहिचान गर्न निकै गाह्रो भएको छ। शव पहिचान गर्न समस्या भएपछि टिचिङ अस्पतालले प्रहरीको समेत सहयोगमा शव पहिचानको काम गरिरहेको छ। शव पहिचानमा समस्या भएपछि पोष्टमार्टममा संलग्न डाक्टरहरुले काठमाडौं उपत्यका अपराध अनुसन्धान कार्यालयसँग सहयोग मागेका थिए।
त्यसपछि अपराध अनुसन्धान कार्यालयका दुई प्रहरी अधिकारीहरुले शव पहिचानका लागि सहयोगी भएर काम गरिरहेका छन्। उनीहरु दुई जना हुन् प्रहरीका स्केच आर्टिस्ट, बरिष्ठ सई योगेश महर्जन र सोको अफिसर तथा सोको फोटोग्राफर असई सिर्जनामाया मगर। यसअघि पनि विभिन्न दुर्घटनाहरुको शव पहिचानका लागि खटाइएका महर्जन गत जेठमा मुस्ताङमा भएको तारा एअरको विमान दुर्घटनाका शवहरु पहिचानका लागि पनि खटिएका थिए।
काठमाडौं ल्याइएकामध्ये ३३ वटा शव पहिचान हुन बाँकी रहेपछि प्रहरीलाई खबर गरिएको थियो। त्यसपछि स्केच आर्टिस्टको तालिम नै दिइरहेका बरिष्ठ सई महर्जन र असई मगर त्रिवि शिक्षण अस्पताल गएर सहयोगी भूमिका निभाएका छन्।
टुक्रा–टुक्रा अवस्थामा रहेको शवहरूका विभिन्न हुलिया, बडी पार्टहरूको, दाग, खत, औंलाका भाग जस्ता चिन्ह सहज हुने किसिमका हुलियाहरूको तस्बिर खिच्ने काम स्केच उनीहरूले गरेका छन्।
त्यसपछि मृतक परिवारसँगको सोधपुछ र बडिपार्टसँग मेल खान हुलियालाई आधार मानेर शवको पहिचान गरिरहेको अपराध अनुसन्धान कार्यालयले जनाएको छ। स्केच नै बनाएर शरीरको भागसँग मेल खाने हुलिया भएको अवस्थामा पनि शवको पहिचान गर्नुपर्ने अवस्था रहेको छ।
पहिचान हुन नसकेका शवहरूको टुक्रा–टुक्राको फोटा खिचेर आफन्तसँगको सोधपुछमा म्याच गराइएको छ। फोटा खिच्ने, आफन्तले दिएको हुलिया अनुसारको स्केच बनाउने र स्केचअनुसार बडी पार्टहरु खोजेर मिलाउने काम अहिले भइरहेको छ।
स्केच आर्टिस्टले काम गर्दासम्म ३३ वटा शव पहिचान हुन बाँकी थियो। अहिले भने जम्मा १४ वटा शवमात्रै पहिचान हुन बाँकी रहेको छ।
भूकम्पको बेला पनि महर्जनको फोटोग्राफी र स्केचबाट धेरै मानिसको शव पहिचान भएर आफन्तलाई जिम्मा लगाइएको थियो । भूकम्पको बेला साढे ३ सय शवहरु सनाखत परिवारलाई बुझाइएको थियो । महर्जनले त्यतिबेला गरेको काम देखेरै त्रिवि शिक्षण अस्पतालका डाक्टरले उनलाई युएस बंगला विमान दुर्घटना हुँदा पनि बोलाएका थिए ।
महर्जन यसअघि पनि विमान दुर्घटनाका मृतकहरूको शवको पहिचान गर्नका लागि सहयोगी भूमिकामा थिए। सन् २०१८ को मार्च १२ मा युएस बंगलाको विमान त्रिभुवन अन्तर्राष्ट्रिय विमानस्थलमा दुर्घटना भएको थियो। त्यतिबेला ५१ जनाको मृत्यु भएको थियो। त्यतिबेला पनि त्रिविका डाक्टरले नै महर्जनलाई शव पहिचानका लागि सहयोगी हुने भन्दै बोलाएर त्रिवि लगेका थिए। त्यसपछि उनले खिचेका फोटोग्राफी र हुलियाबाट शव पहिचान गर्न धेरै सहयोग भएको थियो।
सोको फोटोग्राफीमा अब्बल मानिएकी सिर्जनामाया मगर पनि शव पहिचानका लागि सहयोगी भएर काम गरिरहेकी छिन्। खासमा यो पटक शव पहिचानका लागि योगेशको भन्दा सिर्जनाको भूमिका ठूलो छ। याेगेश तालिममा भएकाले त्यति धेरै समय दिन पाएको छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
