काठमाडौं– आइतबार बिहान पोखरामा भएको यती एअरलाइन्सको विमान दुर्घटनामा ज्यान गुमाएकाहरुप्रति शोक प्रकट गर्न आज शोक बिदा दिइएको छ।
विमान दुर्घटनापछि लगत्तै बसेको आकस्मिक मन्त्रिपरिषद्को बैठकले आज शोक बिदा दिने निर्णय गरेको हो। यस्तै आज आधा झण्डा झुकाइने निर्णय गरिएको गृहमन्त्रालयले जनाएको छ।
आन्तरिक उडानमा हालसम्मकै ठूलो क्षति भएको भन्दै मन्त्रिपरिषद् बैठकले शोक बिदा दिने निर्णय गरेको थियो। साथै हिजोकै बैठकले विमान दुर्घटनाबारे छानबिन गर्न जाँचबुझ आयोग पनि गठन गरेको छ। सरकारले बिदा दिने निर्णय गरे पनि छानबिनलाई प्रभावकारी बनाउनुको साटो बिदा दिइएको भन्दै चर्को आलोचनासमेत भएको छ।
यसैबीच यति एयरलाइन्सले विमान दुर्घटनाको शोकमा आजको लागि निर्धारित सबै उडान रद्द गरेको छ। आपतकालीन र उद्धार उडानबाहेक नियमित सबै उडान रद्द गरिएको कम्पनीले जनाएको छ।
आइतबार काठमाडौंदेखि पोखराका लागि उडेको यती एअरको विमान पोखराको सेती नदी खोँचमा दुर्घटनाग्रस्त बनेको थियो। जसमा १५ जना विदेशीसहित ५३ जना नेपाली यात्रु सवार थिए। साथै चार जना चालकदलका सदस्य पनि थिए। आइतबार रातिसम्म ६८ जनाको शव निकालिसकिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
