काठमाडौं– नेकपा माओवादी केन्द्रका अध्यक्ष तथा प्रधानमन्त्री पुष्पकमल दाहाल प्रचण्डले एकीकृत समाजवादी पार्टी पनि सरकारमा आउनसक्ने बताएका छन्। माओवादी केन्द्रको पदाधिकारी बैठकमा ब्रिफिङ गर्दै उनले केही अडानका कारण अहिले नै समेट्न नसकिएको बताए।
‘मेरो नेतृत्वमा सरकार बनाउने कुरामा उहाँहरु सकारात्मक नै हुनुहुन्छ। पछिल्लो गठबन्धनका विषयमा थप छलफल हुनै बाँकी छ। केही वातावरण बनाए उहाँहरु हाम्रो समीकरणमा सहभागी हुनुहुन्छ,’ प्रचण्डको भनाइलाई उद्घृत गर्दै उपमहासचिव गिरिराजमणि पोखरेलले भने।
कांग्रेससँगको गठबन्धन टुटेपछि बनेको नयाँ गठबन्धनका विषयमा एकीकृत समाजवादीका अध्यक्ष माधव नेपालका केही अडान रहेको प्रचण्डले बताएका छन्। उपमहासचिव पोखरेलले एकीकृत समाजवादीलाई सरकारमा समेट्ने वातावरण बनाउने विषयमा माओवादी केन्द्र सकारात्मक रहेको समेत बताए।
प्रचण्डले केही दिनमा एकीकृत समाजवादीका अध्यक्ष नेपालसँग छलफल गरेर वर्तमान समीकरणका विषयमा धारणा लिएर वातावरण बनाउने उनको भनाइ थियो।
नेपाली कांग्रेसका सभापति शेरबहादुर देउवाले स्पष्ट कुरा गर्न नसकेका कारण गठबन्धन तोड्नुपरेको उनले बताएका छन्।
‘छलफल गर्ने नाममा झुलाउने कुरा मात्रै भयो,’ प्रचण्डले बैठकमा भने, ‘स्पष्ट कुरा नगरेर झुक्याउन खोजेको महसुस भएपछि हामी निस्किएका हौं।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
