काठमाडौं– हवाई सेवा तथा पर्यटन प्रवर्द्धनका लागि क्वालालाम्पुर र पेनाङमा नेपाल सेल्स मिसन मलेसिया सम्पन्न भएको छ।
नेपाल संस्कृति, पर्यटन तथा नागरिक उड्डयन मन्त्रालय, नेपाल वायुसेवा निगम, नेपाल पर्यटन बोर्ड र नाट्टाको संयुक्त आयोजनामा १६ डिसेम्बरमा क्वालालाम्पुर र १९ डिसेम्बरमा पेनाङमा उक्त कार्यक्रम गरिएको हो।
मन्त्रालयका सचिव सुरेश राज अधिकारीले कार्यक्रमको नेतृत्व गर्दै नेपालमा मलेसियन पर्यटक भित्र्याउन मलेसियाका पर्यटन व्यवसायीहरुलाई आह्वान गरे। उनले नेपाल सरकारका तर्फबाट सहजीकरणका सबै काम हुने प्रतिबद्धता जनाए।
यस्तै नेपाल पर्यटन बोर्डका अध्यक्ष डा धनन्जय रेग्मीले मलेसिया तथा नेपालका पर्यटन व्यवसायी र नेपाल वायुसेवा निगमसँग सहकार्य गरी स्लेबल प्याकेज डिजाइन गरी त्यसको प्रवर्द्धन गरिने जानकारी दिए।
निगमका कार्यकारी अध्यक्षी युवराज अधिकारीले नेपाल सरकारले पर्यटक भित्र्याउने योजनामा महत्वपूर्ण खम्बाको रुपमा काम गर्ने र यसबाट समग्र नेपालको आर्थिक विकासमा योगदान पुर्याउनुका साथै विदेशी मुद्रा आर्जन गर्न सकिने कुरा उल्लेख गरे।
यस्तै २० डिसेम्बरमा क्वालालम्पुरमा एजेन्ट सेल्स मिट र अन्तरक्रिया कार्यक्रम पनि सम्पन्न गरिएको छ। उक्त कार्यक्रममा निगमको कार्यकारी अध्यक्षले निगमको भावी योजना बताउँदै मलेसिया सेक्टरमा उडान संख्या बृद्धि गर्ने योजनाका साथै एजेन्टबाट आएका पृष्ठपोषणहरुको संवोधन गरिने बताए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।