काठमाडौं– ‘बिकिनी किलर’का रुपमा कुख्यात फ्रान्सेली नागरिक चार्ल्स शोभराज केन्द्रीय कारागारबाट रिहा भएका छन्। १९ वर्ष २ महिनासम्म नेपाली जेलमा कैद रहेका शोभराज शुक्रबार रिहा भएका हुन्।
सर्वोच्च अदालतले बुधबार जारी गरेको आदेशानुसार केन्द्रीय कारागार सुन्धाराले शोभराजलाई थुनामुक्त गरेको हो। उनलाई अध्यागमन विभागको जिम्मा लगाइएको छ।
सर्वोच्चका न्यायाधीशद्वय सपना प्रधान मल्ल र तिलप्रसाद श्रेष्ठको संयुक्त इजलासले बन्दीप्रत्यक्षीकरणको रिटमा सुनुवाइ गर्दै शोभराजलाई जेलमुक्त गर्न आदेश दिएको थियो। सर्वोच्चले शोभराजलाई जेलमुक्त गरी १५ दिनभित्र स्वदेश (फ्रान्स) पठाउन समेत सरकारका नाममा आदेश जारी गरेको थियो।
सर्वोच्चको आदेशानुसार शोभराजलाई फ्रान्स डिपोर्ट गर्ने तयारी गरिएको अध्यागमन विभागका एक अधिकारीले जानकारी दिएका छन्। यद्यपि शोभराजले भने केही समय नेपालमै बिताउने इच्छा जाहेर गरेका छन्।
शोभराजको अपराध–यात्रा
सन् १९४४ मा भियतनाममा जन्मिएका शोभराजका बाबु भारतीय मूलका हुन्। पछि उनलाई आमाका प्रेमीले हुर्काएका थिए।
शोभराजको अपराध यात्रा सन् १९६३ मा १९ वर्षको उमेरबाट सुरु हुन्छ। त्यसबेला उनले पेरिसको १ घरमा चोरी गरेका थिए। त्यसबेला पक्राउ परेका उनले झन्डै १ वर्ष जेल जीवन बिताए। जेलमा त्यहाँको अन्डरवर्ल्ड समूहका सदस्य फिलिक्स इसकोन्जीसँग उनको चिनजान भयो।
जेलबाट छुटेपछि शोभराजले उनकै समूहमा आबद्ध भएर अपराध मच्चाउन थाले। त्यसबेला उनले अपराधभन्दा पनि सूचना संकलनको काम गरेको बताइन्छ। त्यसपछि उनले पेरिसमा चोरी आतंक मच्चाए। सो क्रममा प्रहरीले निगरानी थालेपछि उनले पेरिस नै छाडे।
त्यसपछि उनी पूर्वी युरोप हुँदै सन् १९७० मा भारत आए। मुम्बईमा उनी कार चोर्ने र बेच्ने गर्थे। भारतको मुम्बईस्थित होटल अशोकामा चोरी गरेकै कारण पक्राउ परेका उनी छुटेपछि अफगानिस्तान छिरेका थिए। त्यहाँ पनि उनी समातिए। तर, बिरामी परेको नाटक गरेर अस्पतालबाटै फरार भएर इरान, टर्की हुँदै ग्रिसतिर हान्निए। ती देशमा चोरी र लुटपाट आतंक मच्चाएपछि थाईल्यान्ड पुगे। त्यहाँ त उनले ३ जना पर्यटकको हत्या नै गरे।
हत्या गरिएका ३ जना पर्यटकको राहदानी बोकेर उनले काठमाडौंको यात्रा तय गरे। नेपाल आएका उनले यहाँ पनि विदेशी पर्यटकको हत्या गरे।
शोभराजले २०३२ पुस ६ गते क्यानेडियन नागरिक लोरेन्ट क्यारियरको हत्या गरेर शव टुक्रा पारी भक्तपुरको मनोहरा खोलामा फालेका थिए।
उनीविरुद्ध भक्तपुर चित्तपोलका गोकर्णबहादुर कार्कीले २०३२ पुस ६ मा मुद्दा दायर गराएका थिए। त्यसअघि काठमाडौंमा भएको कोन्नी ब्रोनिचको हत्यामा उनैको संलग्नता देखिएको थियो।
अमेरिकन युवती कोनी ब्रन्चिजको हत्या मुद्दामा सर्वस्वसहित जन्मकैदको फैसला सुनाइएका शोभराज प्रहरीलाई छक्याउँदै भाग्न सफल पनि भए।
उनी नेपालको विमानस्थलबाट हात्ती नै छिराइदिन्छु समेत भन्थे। २०६० मा नेपाल आउँदा भने उनी प्रहरीको पञ्जाबाट फुत्किन सकेनन्। २० वर्ष कैद सजाय तोकिएका उनी २०८० असोज १ गते छुट्दै थिए। तर सर्वोच्च अदालतले बुधबार नै बन्दी प्रत्यक्षीकरणको रिटामा फैसला गर्दै तत्कालै छाड्ने आदेश दिएपछि उनी रिहा हुने भएका छन्।
शोभराजको उपचारमा राज्यको वार्षिक १ लाख खर्च
शोभराज मुटुको बिरामी हुन्। उनको मुटुको शल्यक्रिया समेत गरिसकिएको छ। मुटुको भल्वले कामै गर्न छाडेपछि २०७४ जेठमा शहीद गंगलाल अस्पतालमा करिब ३ घण्टा लगाएर डा रामेश कोइरालाको टिमले शल्यक्रिया समेत गरेको थियो।
योसँगै उनी दमका रोगी पनि हुन्। बेलाबेला बिरामी परिरहने शोभराजलाई अस्पताल लगिरहनुपरेको कारागार प्रशासनले नेपाल लाइभलाई जानकारी दियो। ७८ वर्ष भइसकेका शोभराजको उपचारमा प्रत्येक वर्ष १ लाख रुपैयाँका हाराहारीमा राज्यको खर्च भइरहेको कारागार स्रोतले नेपाल लाइभलाई बतायो।
शोभराजको उपचारमा मात्रै करिब २० लाख रुपैयाँ खर्च भइसकेको छ। शोभरजाकै आग्रहमा केही निजी अस्पतालमा समेत उनको उपचार हुने गरेको थियो।
निजी अस्पतालको उपचार खर्च भने शोभराज आफैंले तिर्दै आएका छन्। निजी अस्पतालका लागि राज्यले तिरेभन्दा झन्डै दोब्बर रकम शोभराज आफैंले तिरेको प्रशासनले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
