धनगढी– कैलालीको धनगढी उपमहानगरपालिका–१३ स्थित प्रादेशिक आयुर्वेद चिकित्सालयलाई पूर्ण रुपमा सञ्चालनमा ल्याउने तयारी अघि बढाइएको छ।
भवन निर्माण सम्पन्न भई हस्तान्तरण भएपनि जनशक्ति अभावका कारण पूर्ण रुपमा सेवा सञ्चालन गर्न नसकेको चिकित्सालयले तयारी अघि बढाएको हो। चिकित्सालयका लागि आवश्यक पर्ने जनशक्ति व्यवस्थापन गर्न करारमा कर्मचारी समेत माग गरिएको छ।
चिकित्सालयले दुई जना आयुर्वेद चिकित्सक, एक–एक होमियोप्याथिक चिकित्सक, प्राकृतिक चिकित्सक, रेडियो ग्राफर, ल्याब टेक्निसियन, सहायक कम्प्युटर अपरेटर, ल्याब असिस्टेन्ट, दुई–दुई अनमी, वैद्य, स्टाफ नर्स र तीन जना कविराज पदमा आवेदन खुल्ला गरेको छ।
सो पदमा योग्य व्यक्तिले १५ दिनभित्र आवेदन दिइसक्नुपर्ने चिकित्सालयका निमित्त चिकित्सक डाक्टर खगेन्द्र बमले जानकारी दिए। चिकित्सालयले असोज ९ गतेदेखि अस्पताल सञ्चालनमा ल्याउन निःशुल्क स्वास्थ्य शिविर गर्दै केही सेवा सुरु गरेको थियो।
चिकित्सालयले पहिलो चरणमा ओपीडी सेवा, ल्याब सेवा, औषधि वितरण र योग परामर्श सेवा प्रदान गरिरहेको छ। उनले भने, ‘यी सेवा सुरु भएसँगै अस्पतालमा बिरामीको आकर्षण विस्तारै बढिरहेको छ।’
उनले जनशक्ति व्यवस्थापन भएपछि अस्पताल भवन उद्घाटन हुने बताए। ‘दशैंअघि नै भवनको समुद्घाटन गर्ने तयारी गरेपनि निर्वाचन आचारसंहिताका कारण सो कार्य अघि बढ्न सकेको थिएन’, उनले भने ‘अब केही दिनमा भवनको पनि उद्घाटन हुने छ।’
उनले प्राविधिका कारणले अस्पतालले प्रदान गर्नुपर्ने सेवा सञ्चालनमा ढिलाइ भएको बताए। भवन, उपकरण लगायतका तयारी भने पूरा भइसकेको उनको भनाइ छ।
चिकित्सालयमा अन्तरंगसहितको सेवा उपलब्ध गराउने गरि पाँच जना चिकित्सक (डाक्टर), प्राकृतिक चिकित्सक र होमियोप्याथिक एक/एक, कविराज चार, स्टाफ नर्स दुई, ल्याब, रेडियोग्राफर एक÷एक र अन्य गरि ३५ जना कर्मचारीको दरबन्दी रहेको छ।
संघीय सरकारले २०६८ सालमा सुदूरपश्चिम प्रदेशमा आयुर्वेद अस्पताल सञ्चालन ल्याउने उद्देश्यसहित क्षेत्रीय आयुर्वेद अस्पताल नामाकरण गरेको थियो। २०७७ सालको प्रदेश मन्त्रिपरिषद्को बैठकले प्रादेशिक आयुर्वेद चिकित्सालय नामाकरण गरि सञ्चालनको तयारी गरिएको थियो।
सो भवनको ठेक्का २०६८ सालमै अघि बढेपनि निर्माण कार्य २०७४ सालमा अघि बढाइएको थियो। वनले स्वीकृति नदिँदा भवन निर्माणको काम छ वर्षसम्म अघि बढ्न सकेको थिएन। १८ लाख बढी लागतमा निर्माण भएको चिकित्सालय भवनबाट अन्तरंग, बहिरंग, योग, आयुर्वेद औषधि वितरण लगायतका सेवा प्रदान गरिने बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
