काठमाडौं– कतारमा जारी २२ औं संस्करणको फिफा विश्वकप फुटबलमा आज (शनिबार) राति हुने पहिलो क्वार्टरफाइनलमा मोरक्को र पोर्चुगल आमने–सामने हुँदैछन्। राति ८ः४५ बजे हुने यस खेल अल थुमामा रंगशालामा हुनेछ।
अफ्रिकी टोली मोरक्कोले अन्तिम १६ मा पेनाल्टी सुटआउटमा स्पेनलाई हराउँदै क्वार्टरफाइनलमा स्थान बनाएको हो। यता, पोर्चुगल भने स्विट्जरल्याण्ड लाई ६–१ गोलको भारी अन्तरले हराउँदै क्वार्टरफाइनलमा पुगेको हो।
मोरक्को पहिलोपटक सेमिफाइनलमा पुग्ने अफ्रिकी टोली बन्दै इतिहास रच्न चाहन्छ। यसका लागि उसले युरोपको बलियो टोली पोर्चुगललाई हराउनु पर्छ। यो मोरक्कोका लागि कठिन काम हो। तर स्पेनजस्तो उत्कृष्ट टोलीलाई हराएर क्वार्टफाइनलमा पुगेकाले यो असम्भव भने छैन। इतिहास हेर्दा यो सम्भव नै देखिन्छ। किनकि, ‘हेड टु हेड’मा यिनीहरूबीच समानता भए पनि गोल अन्तरमा मोरक्को अगाडि छ।
हालसम्म यी टोलीबीच दुई पटक भेट भएकोमा दुवैले एक–एक जित र हार हासिल गरेका छन्। तर, मोरक्कोले तीन गोल लगाएको छ भने पोर्चुगलले दुई गोलमात्र फर्काएको छ।
सन् १९८६ को विश्वकपमा मोरक्कोले पोर्चुगललाई ३–१ ले हारएको थियो भने २०१८ मा पोर्चुगलले बदला लिएको थियो। रुसमा भएको अघिल्लो विश्वकपमा क्रिस्टियानो रोनाल्डोको एकमात्र गोलमा पोर्चुगलले मोरक्कोलाई बदला लिएको थियो। आज मोरक्को त्यसको बदला पुनः फर्काउन चाहन्छ।
प्रि–क्वार्टरफाइनलमा सुपरस्टार खेलाडी रोनाल्डोलाई बेन्चमा राखेर उत्रँदा पोर्चुगल झनै लयमा देखियो। तर, यसले टिमभित्रको एकतामा भने असर पुगेको छ। कप्तान रोनाल्डो र प्रशिक्षक फर्नान्डो सान्तोसको विवाद हुन पुग्यो। जारी विश्वकपमा रोनाल्डो खासै लयमा छैनन्, त्यसमाथि प्रशिक्षकसँग पनि विवादमा छन्। यसर्थ, उनी मोरक्कोविरुद्ध पनि सुरुवाती ११ मा नपर्ने सम्भावना प्रबल छ। तर, रोनाल्डोविनाको पोर्चुगल झनै खतरनाक देखिएको छ। यसर्थ, आज राति मोरक्कोविरुद्ध पोर्चुगलले जित निकाल्ने सम्भावना बढी रहेको एकथरी फुटबल पण्डितहरू बताइरहेका छन्।
अर्कोतिर हाकिम जियाच, अच्र्राफ हाकिमीजस्ता स्टार खेलाडीसहितको मारेक्को संगठित प्रदर्शन गरिरहेको छ। यसर्थ, आज राति पोर्चुगललाई उसले सेमिफाइनलमा स्थान बनाउने धेरैले आशा गरेका छन्। विशेषगरी, अरब क्षेत्र र अफ्रिकाका फुटबल पण्डितहरू मोरक्कोको पल्ला भारी भएको बताइरहका छन्।
आज राति मोरक्कोले जिते जिते इतिहास बन्नेछ। मोरक्को पहिलोपटक सेमिफाइनलमा पुग्ने अफ्रिकी देश बन्नेछ।
यता, पोर्चुगल भने मोरक्कोलाई रोक्दै १६ वर्षपछि सेमिफाइनलमा स्थान बनाउँदै आफ्नो साख फर्काउन चाहन्छ। २००६ मा जर्मनीमा भएको विश्वकपमा पोर्चुलग सेमिफाइनलमा पुगेको थियो। त्यसयता, पहिलोपटक क्वार्टरफाइनलमा पुगेको हो।
यस्तै अर्को क्वार्टरफाइनल खेल राति १२ः४५ बजे फ्रान्स र इंग्ल्याण्डबीच हुँदैछ। यी दुईबीचको खेल अल बाषत रंगशालामा हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
