एजेन्सी- कतारमा जारी २२औं संस्करणको विश्वकप फुटबलको क्वाटरफाइनलमा शनिबार साविक विश्व विजेता फ्रान्स र इंग्ल्याण्ड प्रतिस्पर्धा गर्दैछन्। यी दुई टोलीबीच प्रतिस्पर्धा हुँदा हरेकजसोको ध्यान भने एक खेलाडीमा केन्द्रित भएको छ।
ती खेलाडी हुन्, पेरिस सेन्ट जर्मेनबाट क्लब फुटबल खेल्ने स्टार केलियन एम्बाप्पे। उनी यतिखेर विश्व फुटबलका उत्कृष्ट खेलाडी हुन्। इंग्ल्याण्डका प्रशिक्षक ग्यारेथ साउथगेट अहिले खेलाडीहरु एउटै कुराले बढी चिन्तित देखिन्छन्, कसरी एम्बाप्पेको गतिलाई रोक्ने?
बिबिसीले यिनै प्रतिभाका धनी एम्बाप्पे कसरी सुपरस्टार बन्ने भन्नेबारे ७ वटा कारण प्रस्तुत गरेको छ।
१. दोस्रो महँगा खेलाडी
सन् २०१७ मा एम्बाप्पे फ्रेन्च क्लब पेरिस सेन्ट जर्मन (पीएसजी)मा लोनमा आबद्ध भए। मोनाकोबाट प्रतिवर्ष १८० मिलियन युरोमा उनी लोनमा पीएसजीमा आबद्ध भएका थिए। यो नै अहिलेसम्मको दोस्रो महँगो ट्रान्सफर हो। यसअघि पीएसजीले नै बार्सिलोनाबाट सन् २०१७ मा नेयमारलाई २२२ मिलियन युरोमा किनेको थियो।
एम्बाप्पेले २३७ खेलमा १९० गोल गरिसकेका छन्। पीएसजीमा उनी नेयमार र लियोनल मेसीसँगै खेल्दै आएका छन्।
२. सिरियल विनर
एम्बाप्पे यस्ता भाग्यमानी फुटबलर हुन् जो व्यावसायिक फुटबलको सात वर्षमै लगातार विजेता भइरहे। सन् २०१८ मा विश्वकप, २०२०–२१ को युईएफए नेसन्स लिग, पएसजीबाट ४ र मोनाकोबाट १ गरी पाँच लिग वान टाइटल, २ वटा फ्रेन्च लिग कप एम्बाप्पेले जितेका छन्।
त्यसैगरी व्यक्तिगत रुपमा उनले सन् २०१७ मा अन्डर २१ प्लेयर्सतर्फको गोल्डेन बोई अवार्ड पनि जितेका थिए। दुई पटक फ्रेन्च प्लेयर्स अफ द इयर, लिग वान प्लेयर्स अफ द इयर, ३ वटक योङ प्लेयर्स अफ द इयरको उपाधि एम्बाप्पेले जितेका छन्।
सन् २०१८ को विश्वकपमा पनि उनी योङ प्लेयर्स चुनिएका थिए। चार पटक लिग वानको टप गोलकर्ताको पुरस्कार पनि एम्बाप्पेले पाइसकेका छन्।
उनकै उत्कृष्ट प्रदर्शनमा पीएसजी पहिलो पटक सन् २०२० मा च्याम्पिन्स लिगको फाइनलमा पुगेको थियो। यद्यपि, पीएसजीलाई पराजित गर्दै उपाधि भने जर्मन क्लब बायर्न म्युनिखले जितेको थियो।
३. विश्वकप प्लेटफर्म
जम्माजम्मी १९ वर्षको हुँदा फ्रान्सको राष्ट्रिय टिमबाट मुख्य भूमिकामा न् २०१८ को रसिया विश्वकप एम्बाप्पेले खेलेका थिए। रसिया विश्वकपमा एम्बाप्पेले उत्कृष्ट प्रदर्शन गर्दै ४ गोल गरे। उनकै उत्कृष्ट प्रदर्शनमा क्रोएसियालाई ४–२ ले हराउँदै फ्रान्सले उपाधि उचालेको थियो। रसिया विश्वकपमा गोल गर्दै एम्बाप्पले पेलेपछिको विश्वकपमा गोल गर्ने कान्छो खेलाडी बनेका थिए। सन् १९५८ मा पेले पछि विश्वकपमा गोल गर्ने कान्छो खेलाडी एम्बाप्पे बनेका थिए।
कतारमा जारी विश्वकपमा पनि एम्बाप्पेले सबैभन्दा बढी गोल गरेका छन्। प्रिक्वाटरफाइनल सकिँदासम्म एम्बाप्पेले ५ गोल गरिसकेका छन्। योसँगै विश्वकपमा उनको गोल संख्या ९ पुगिसकेको छ। यो सँगै उनले अर्जेन्टिनाका डियोगो म्याराडोना र पोर्चुगलका क्रिस्टियानो रोनाल्डोको ८ गोलको रेकर्डलाई पछि पारेका छन्।
४. डेब्युमै रेकर्ड ब्रेक
एम्बाप्पे फ्रान्सको राजधानी पेरिस नजिकैको वस्तीमा जन्मिएका थिए। उनले स्थानीय क्लब एएस बोन्डीबाट खेल्न सुरु गरेका थिए। उनको पहिलो मोनाकोबाट सन् २०१५ को डिसेम्बरमा भएको थियो।
१६ वर्ष ३४७ दिनमा मोनाकोबाट डेब्यु गर्दा उनी उक्त क्लबको इतिहासकै कान्छा खेलाडी बनेर रेकर्ड राखेका थिए। उक्त रेकर्ड राख्ने क्रममा एम्बाप्पेले फ्रान्स तथा आर्सनल क्बलका पूर्व लिजेन्ड खेलाडी थियरी हेनरीको सन् १९९४ को रकेर्ड तोडेको थिए। रेकर्ड तोड्ने क्रममा एम्बाप्पेले ८८औं मिनेटमा केनविरुद्धका खेलमा डेब्यु गरेका थिए।
त्यसको तीन महिनापछि ट्रोएसविरुद्ध गोल गर्दै क्लबको इतिहासमा गोल गर्ने सबैभन्दा कान्छो एम्बाप्पे बने। यो रेकर्ड यसअघि हेनरीको नाममा थियो।
५. सुपर फास्ट
कतारमा जारी विश्वकपको पोल्याण्डसँगको खेलमा फ्रान्स ३–१ ले विजयी भएको थियो। उक्त खेलमा २ गोल गरेका एम्बाप्पको स्पिड प्रतिघण्टा ३५.३ किलोमिटर थियो।
गत सेप्टेम्बरमा मात्रै लिग वानले एम्बाप्पे यस सिजनको सबैभन्दा तीव्र गतिको खेलाडीको भएको बताएको थियो। त्यतिबेला उनको तीव्र गति प्रति घण्टा ३६ किलोमिटर थियो।
जमैकाका धावक उसेन बोल्टसँग तुलना गर्ने हो भने उनको एभरेज गति ३७.५८ प्रतिकिलोमिटर छ। बोल्टको तीव्र गति भने ४४.७२ किलोमिटर प्रतिघण्टा छ। ९.५८ सेकेण्डमा १०० मिटर दौडदै बोल्टले सन् २००९ मा रेकर्ड राखेका थिए।
६. महँगो प्रस्ताव अस्वीकार
एम्बाप्पेले ला–लिगा क्लब रियल मड्रिडको महँगो प्रस्ताव समेत अस्वीकार गरेका थिए। रियल मड्रिडका अध्यक्ष फ्लेन्टिनो पेरजसँग एम्बाप्पेलाई भित्र्याउनेबारे छलफल भएको थियो। ३ वर्षको सम्झौतामा महँगो मूल्यको प्रस्ताव एम्बाप्पेले अस्वीकार गरेका थिए।
स्पेनिस फुटबलका विज्ञ गुइलेम बलागका अनुसार दुवै क्लबले एम्बाप्पेको ‘साइनिङ फि’ का लागि मात्र १५० मिलियन युरो तिर्न तयार भएका थिए। तर एम्बाप्पेले उक्त कुरा अस्वीकार गरेका थिए।
७. ग्लोबल स्टार
गत अक्टोबरमा एम्बाप्पे फोब्सको सूचीमा सबैभन्दा बढी कमाउने फुटबलरको सूचीमा परे। रोनाल्डो र मेसी बाहेक ९ वर्षपछि उक्त सूचीमा पर्ने एम्बाप्पे पहिलो खेलाडी हुन्। यस सिजन उनले १२८ मिलियन डलर अर्थात् ११५.२ मिलियन पाउन्ड कमाउने अनुमान गरिएको छ।
सोसल मिडियामा पनि एम्बाप्पे उत्तिकै चर्चित छन्। फेसबुक, ट्विटर र इन्स्टाग्रामको फलोअर्स जोड्ने हो भने १०० मिलियनभन्दा बढी फलोअर्स एम्बाप्पेको हुन्छ।
सन् २०२२ मा विश्वकपमा खेल्ने भएका कारण रोनाल्डो, मेसी र नेयमारपछि सबैभन्दा प्रभावशाली फुटबलरको रुपमा एम्बाप्पेलाई राखिएको छ।
चार वर्षअघि विश्वकप जितिसकेपछि एम्बाप्पेले आफ्नो कमाइको ३ लाख ८० हजार पाउण्ड बाल परोपकारी कामका लागि दान गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
