फिचर

के ‘रोनाल्डो युग’को अन्त्य भएकै हो त?

दीपेन्द्र सापकोटा बिहीबार, मंसिर २२, २०७९ १४:०८

काठमाडौं– यतिबेला सुपरस्टार फुटबलर क्रिस्टियानो रोनाल्डो आफ्नो करिअरको सबैभन्दा कठिन मोडमा आइपुगेका छन्।

रोनाल्डोको कप्तानीमा रहेको टोली पोर्चुगल कतारमा जारी विश्वकप फुटबलको क्वार्टरफाइनलमा प्रवेश गरिसकेको छ। तर, यसका रोनाल्डोको खासै योगदान छैन। उनले पहिलो खेलमा घानाविरुद्ध पेनाल्टीमा गोल गर्नबाहेक टोलीलाई आवश्यक परेको बेला गतिलो याेगदान गर्न सकेका छैनन्।

रोनाल्डो यस्ता खेलाडी हुन्। जो सन् २००३ देखि लगातार पोर्चुगलको राष्ट्रिय टोलीमा छन्। उनी २००८ यता निरन्तर पोर्चुगलको सुरुवाती ११ मा थिए। २००७ देखि टोलीका कप्तान छन्। उनी अन्तर्राष्ट्रिय फुटबल इतिहासकै सर्वाधिक गोलकर्ता हुन्।

पोर्चुगलका लागि सर्वाधिक १९५ खेलेका खेलेका उनले ११८ गोल गरेका छन्। पोर्चुगलका लागि उनले सर्वाधिक १० ह्याट्रिक गरेका छन्। कीर्तिमानै–कीर्तिमान बनाएका यिनै रोनाल्डाकोे क्लबसँगै अन्तर्राष्ट्रिय करिअर पनि जोखिम मोडमा पुगेको छ।

पोर्चुगल राष्ट्रिय टोलीका निर्विकल्प स्टार रहेका रोनाल्डोले जारी विश्वकपको नकआउटको स्विट्जरल्याण्डविरुद्धको महत्वपूर्ण खेलको अधिकांश समय बेन्चमा बिताए। ठूला अन्तर्राष्ट्रिय प्रतियोगितामा रोनाल्डाले बेन्चबाट सुरुवात नगरेको ३१ खेल भइसकेको थियो। बेन्चमा बसिरहेका रोनाल्डो स्विट्जरल्याण्डविरुद्ध ७४ औँ मिनेटमा मैदान छिरे।

Cristiano Ronaldo reacts after being substituted on in Portugal's win over Switzerland

तर त्यो बेला टोलीलाई उनको आवश्यकता थिएन। किनकि, रोनाल्डोको ठाउँ लिँदै सुरुवाती ११ मा स्थान बनाएका गोन्कालो रामोसले ह्याट्रिक गरेपछि पोर्चुगल स्विट्जरल्याण्डमाथि ५–१ ले अगाडि थियो। पछि राफायल लिआउले गोल थपेपछि सो खेल पोर्चगलले ६–१ ले सानदार ढंगले जित्यो। यसपछि रोनाल्डो सुरुवाती ११ मा पर्ने अवसर झनै पर सर्यो।

यससँगै रोनाल्डो र मुख्य प्रशिक्षक फर्नान्डो सान्तोसबीचको विवाद झनै चकिँदै गएको छ। सान्तोसले बिहीबार रोनाल्डोलाई प्रतिस्थापन (सब्टिच्युट) खेलाडीले गर्ने तालिममा पठाए। उनले नमानी सुरुवाती ११ का खेलाडीले गर्ने तालिममा गए।

प्रशिक्षक सान्तोसले दक्षिण कोरियाविरुद्धको समूह चरणको खेलमा रोनाल्डोलाई पूरै समय खेल्न दिएनन्। यसले गर्दा रोनाल्डोले असन्तुष्टि जनाएका थिए। यसपछि प्रशिक्षक र उनीबीच विवाद बढेको हो। प्रशिक्षकसँग विवाद गरेपछि आगामी शनिबार हुने क्वार्टरफाइनलमा रोनाल्डो सुरुवाती ११ मा हुने सम्भावना लगभग शून्य प्रतिशतमा झरेको फुटबल पण्डितहरूले विश्लेषण गरिहेका छन्। यससँगै झण्डै दुई दशक अन्तराष्ट्रिय फुटबलमा छाएका रोनाल्डो अब राष्ट्रिय टोलीको जर्सीमा देखिने सम्भावना नरहेको उनीहरूको दाबी छ। उनीहरूका अनुसार देखिइहाले पनि अब उनी बेन्चमा देखिने छन्।

यता, नेपाली फुटबलका विश्लेषकको भनाइ पनि उस्तै छ। नेपाली राष्ट्रिय फुटबल टोलीका पूर्वकप्तान हरि खड्का रोनाल्डोको फुटबल करिअर अब ओरालोतिर लागेको स्वीकार गर्छन्।

‘रोनाल्डोले राष्ट्रका लागि जति दिनुपर्ने हो त्यो दिइसकेका छन्। अब अहिले उनीबारे अहिले जुन कुरा आइरहेको छ। र, उनको खेल खस्किँदो देखिएको छ, त्यसले चाहिँ उनको फुटबल करिअर ओरालो लाग्दै गरेको देखिन्छ’, नेपाल लाइभसँग कुरा गर्दै उनले भने।

यद्यपि, पोर्चुगिज राष्ट्रिय टोलीका लागि रोनाल्डोले जुन योगदान दिएका छन्, त्यसलाई कम आँक्न नमिल्ने उनी बताउँछन्।

फुटबल प्रशिक्षकसमेत रहेका खड्काले प्रशिक्षक सान्तोसले रोनाल्डोलाई बेन्चमा राख्नुलाई नकारात्मक रूपमा मात्रै हेर्नु नहुने बताए। ‘खेल जित्नलाई यो एउटा प्रशिक्षकको रणनीति पनि हुन्छ’, उनले थपे, ‘किनकि, त्यो खेल पोर्चुगलले ६–१ को भारी अन्तरले जित्यो नि!’

यसरी भयो रोनाल्डो युग अन्त्यको सुरुवात

ब्रिटिस पत्रकार पियर्स मोर्गनसँग रोनाल्डोले दिएको अन्तर्वार्ता विश्वकप सुरु हुनुभन्दा चार दिनमात्र अघि अर्थात १४ नोभेम्बरमा प्रकाशित भयो। जहाँ रोनाल्डोले आफू आबद्ध क्लब म्यानचेस्टर युनाइटेडमाथि तितो पोखे। मुख्य प्रशिक्षक इरिक टेग ह्याग र केही अधिकारीहरूले आफ्नो फुटबल करिअर नै समाप्त पार्न खोजेको आरोप लगाए।

साथै, उनले क्बल म्यानचेस्टर युनाइटेड पनि पुरानै ढर्रामा चलेकाले नतिजा ननिस्किएको आरोप लगाए।म्यानचेस्टर युनाइटेडमा रोनाल्डोको प्रदर्शन चित्तबुझ्दो नभएको भन्दै प्रशिक्षक ह्यागले उनलाई सुरुवाती ११ मा ठाउँ दिन छोडेका थिए। यसलाई लिएर रोनाल्डो आफ्नो अपमान गरेको बताउँदै आफूले पनि प्रशिक्षकलाई सम्मान नगर्ने स्पष्ट पारेका थिए।

The FULL Cristiano Ronaldo Interview With Piers Morgan | Parts 1 and 2 - YouTube

क्लबमै आबद्ध भएका रोनाल्डोले आफ्ना असन्तुष्टि यसरी छताछुल्ल पोखेपछि म्यानचेस्टरमा हल्लीखल्ली मच्चियो। रानाल्डोलाई बर्खास्त गरेको औपचारिक निर्णय भएको छैन। तर उनी म्यानचेस्टर नफर्कने निश्चित भइसकेको छ। अझ भनौं रोनाल्डोको व्यवहारबाट युरोपका ठूला क्लबले उनलाई लिने जोखिम नमोल्ने इंग्लिस मिडियाहरूमा विश्लेषण आइरहेको छ।

हुन पनि रोनाल्डोलाई लिनलाई युरोपकै ठूला क्लबले खासै चासो दिएका छैनन्। यस्तोमा उनीबारे विभिन्न हल्ला आइरहेका छन्। यसैबीच, स्पेनिस पत्रिका मार्काले आगामी जनवरी १ देखि रोनाल्डो साउदी अरेबियाको क्लब अल नास्सरमा आबद्ध हुने दाबी गरेको छ।

रोनाल्डो क्लब फुटबलका ‘बादशाह’ मानिन्छन्। उनले सर्वाधिक पाँच पटक च्याम्पियन्स लिगको उपाधि जितेका छन्। यो प्रतियोगिताको उनी सर्वाधिक गोलकर्ता हुन्। यसरी युरोपका ठूला क्लबमा आबद्ध भएर दुई दशकसम्म सनसनी मच्चाइरहेका रोनाल्डो साउदी अरेबियाको क्लबमा जान बाध्य भइरहेका छन्। अधिकांश ब्रिटिश फुटबल पण्डितहरूले यसलाई रोनाल्डो युगको अन्त्य भएको मानिरहेका छन्। हाल फुटबल पण्डितको काम गरिहेका इंग्लिस राष्ट्रिय फुटबल टोलीका पूर्वसदस्य गेरी नेभिल रोनाल्डोको फुटबल करिअर समाप्त भइसकेको तर उनले त्यो अस्वीकार गरेको बताउँछन्।

Cristiano Ronaldo returns to Manchester United: Gary Neville says Portuguese gives club hope of great season ahead | Football News | Sky Sports

नेभिल तिनै हुन् जसलाई रोनाल्डोले म्यानचेस्टर युनाइटेडमा आफ्नो करिअर सिध्याउन भूमिका खेलेका आरोप लगाएका थिए। यद्यपि, रोनाल्डो र नेभिल म्यानचेस्टर युनाइटेडका पूर्वसहकर्मी हुन्।