लण्डन– स्पेनलाई प्रिक्वाटर फाइनलमा पराजित गर्न महत्वपूर्ण योगदान गर्नै मोरक्कोका खेलाडीहरू ठूलो क्लबको आँखामा परेका छन्।
यसै क्रममा सोफियान अम्राबटलाई क्लबमा भित्र्याउन इंग्लिस क्लब लिभरपुलले चासो देखाएको छ। यसका लागि प्रशिक्षक जोर्गेन क्लोपले सोफियानको प्रतिनिधिलाई भेटेको बेलायती अखबारहरूको दावी छ।
मिडफिल्डर सोफियान कतारमा जारी विश्वकपमा मोरक्कोका महत्वपूर्ण खेलाडी हुन्। उनले सबै खेलमा पूर्ण समय टिममा छन्। स्पेनविरूद्ध निर्धारित ९० मिनेटपछि थप भएको समयमा पनि मैदानमै डटेर खेलिरहेका थिए।
फ्रेञ्च पत्रिका फुट मेर्काटोका अनुसार जर्गेनले सोफियानका प्रतिनिधिलाई भेटेर २६ वर्षीय मिडफिल्डरलाई क्लबमा भित्र्याउन प्रस्ताव राखेका छन्।
फ्रेञ्च मिडफिल्डर ओरेनिया चुआमेनीलाई क्लबमा भित्र्याउने प्रयास असफल भएपछि लिभरपुल नयाँ सिजनका लागि सेन्टर मिडफिल्डरको खोजीमा छ। चुआमेनी मोनाकोबाट रियल मड्रिड गएका छन्।
क्लबले जुड बेलिङ्घमलाई पनि भित्र्याउने प्रयास थालेको छ। एलेक्स ओक्सलेड–चेम्बरलिन, जेम्स मिल्नेर र नाबी केइताको अनुबन्ध सम्झौंता आउँदो समरमा सकिदैछ। कर्टेस जोन्स र फाबियानो फिटनेसबाट संघर्ष गरिरहेको बेला लिभरपुललाई नयाँ मिडफिल्डरको अभाव खट्किएको हो।
सोफियान हाल इटालियन क्लब फ्लोरेन्टिनामा आवद्ध छन्। उनको इच्छा च्याम्पियन्स लिग खेल्ने भएका हुनाले उनी लिभरपुल आउनसक्ने सम्भावना बलियो छ।
विश्वकपको समूह एफमा रहेको मोरक्कोका लागि सोफियानले क्रोएसिया र बेल्जियमविरूद्ध प्रभावशाली खेल प्रदर्शन गरेका थिए।
सोफियानका भाई नोर्डिनले पनि मोरक्को राष्ट्रिय टोलीको प्रतिनिधित्व गरिसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
