दोहा– सेनगलविरुद्धको खेलमा ‘प्लेयर अफ दी म्याच’ भएका इंग्ल्याण्डका कप्तान ह्यारी केनलाई सोधियो, ‘यदि तपाईंले यो अवार्ड अरु खेलाडीलाई दिन चाहनुभयो भने कसलाई दिनुहुन्छ?’
केनले जवाफ फर्काए, ‘जेड (जेड बेलिङ्घम) फेन्टास्टिक खेलाडी छन्। उनी मैदानको जुनसुकै कुनामा पनि पुगिरहेका हुन्छन्। फिल (फिल फोडेन) त्यस्तै महान् छन्। गोलका लागि राम्रो अवसर सिर्जना गर्छन् । सायद, यी दुईमध्ये एउटा छान्थेँ।’
कप्तान केनले चर्चा गरेकामध्ये जेड बेलिङ्घम १९ वर्षका उदीयमा खेलाडी हुन्। पहिलोपटक विश्वकपमै अहिले बेलिङ्घम कतारमा चम्किरहेका छन्।
जर्मन क्लब बोरुसिया डर्टमुन्डको मिडफिल्डको ‘मियो’ बनेर चम्किरहेका बेलिङ्घम अहिले कतार विश्वकपमा पनि त्यसैगरी उदाइरहेका छन्।
कप्तानले केनले दुईजना जसको नाम लिएका थिए, उनै फिल फोडेनले समेत बेलिङ्घमको नाम लिँदै भनेका छन्, ‘बेलिङ्घम संसारकै उत्कृष्ट मिडफिल्डर बन्नेछन्।’
सेनेगलविरुद्धको खेलमा लोभलाग्दो प्रदर्शन गरेपछि बेलिङ्घमको भविष्यलाई लिएर निकै ‘बोल्ड प्रेडिक्सन’ फोडेनले गरेका हुन्।
‘म उसलाई धेरै उक्साउन चाहन्न। किनकि, उ धेरै जवान छ। तर, उ मैले देखेको सबैभन्दा प्रतिभाशाली खेलाडीमध्ये एक हो’, फोडेनले भने, ‘उसको खेलमा कुनै कमजोरी देखिँदैन। मलाई लाग्छ उ संसारकै उत्कृष्ट मिडफिल्डर हुनेछ।’
बेलिङ्घमको लोभलाग्दो उत्कृष्ट प्रदर्शनमा अफ्रिकन कप अफ नेसन्स च्याम्पियन टोली सेनेगलमाथि इंग्ल्याण्डले ३–० को जित निकाल्दै क्वार्टरफाइनल प्रवेश गरेको छ।
जम्माजम्मी १९ वर्ष १५८ दिन उमेरका उनी इंग्ल्याण्डका लागि विश्वकपमा असिस्ट गर्ने सबैभन्दा कान्छा खेलाडीसमेत बनेका छन्।
पहिलो हाफमा मिडफिल्डर बेलिङ्घमले खेल आफ्नो पकडमा राखे। उनले सबैभन्दा धेरै ८ ट्याकल गरेका थिए।
फाइनल थर्ड (सिक्स–सिक्स पास)मा उनको शतप्रतिशत पास एक्युरेसी थियो। समग्रमा भने बेलिङ्घमको ९६ प्रतिशत पास एक्युरेसी थियो। पहिलो गोलका लागि उनैले जोर्डन हेन्डरसनलाई पास मिलाएका थिए।
पहिलो हाफमको खेल सकिएपछि बीबीसी रेडियोसँग कुरा गर्दै इंग्ल्याण्डका पूर्वडिफेन्डर मिच रिकार्डले भनेका थिए, ‘बेलिङ्घमको प्रदर्शन अविश्वसनीय छ। जब खेलमा सेनेगलले इंग्ल्याण्डलाई समस्या निम्त्याउँदै थियो। त्यतिबेला इंग्ल्याण्डलाई लयमा फर्कन कसैको आवश्यकता थियो। बेलिङ्घमले त्यो पूरा गरे। रक्षापंक्ति, पासिङ र आक्रमण सबैतिर उनी पुगे। इंग्ल्याण्ड लयमा फर्कियो।’
खेलको १५ मिनेट बाँकी छँदा बेलिङ्घम अन्य खेलाडीद्वारा स्थानन्तरण गरिए। उनले सबैभन्दा बढी ४ ड्रिब्लिङ, खेलकै सबैभन्दा बढी ४ पटक ‘ट्याकल्स एटेम्पट’ गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
