काठमाडौं– प्रतिनिधि सभा तथा प्रदेश सभा निर्वाचनमा केही क्षेत्रका उम्मेदवारहरुले अतिरिक्त चर्चा पाएका थिए। फरक पेसामा चर्चा कमाएर संसदीय राजनीतिका लागि उम्मेदवारी दिएका कलाकार पृष्ठभूमिकी रेखा थापा, कोमल वली, कलाकार मधुसुदन पाठक (सिते बा), कमेडियन हिमेश पन्त होउन् वा माओवादी केन्द्रका अध्यक्ष पुष्पकमल दाहाल प्रचण्डलाई टक्कर दिन गोरखा २ बाट उम्मेदवारी दिएका शताब्दी पुरुष टिका दत्त पोखरेलहरुलाई जनताले कति मत दिए होलान् त?
प्रसङ्ग सुरु गरौं रेखा थापाबाट।
नेपाली सिने जगतमा उल्लेख्य चर्चा कमाएकी थापाको राजनीतिक मोह प्रकट भएको एक दशक अघि नै हो। उनी तत्कालीन नेकपा माओवादी हुँदै हाल राप्रपाकी केन्द्रीय सदस्य छिन्। त्यसो त थापाले राप्रपाको महाअधिवेशनमा महामन्त्रीमा प्रतिस्पर्धा गरेर पराजय ब्योहोरेकी थिइन्।
मंसिर ४ को निर्वाचनमा थापा मोरङ क्षेत्र नंबर ३ बाट प्रतिनिधि सभा सदस्यका लागि प्रतिस्पर्धामा थिइन्। उनी एमालेका उम्मेदवार तथा निर्वतमान सांसद भानुभक्त ढकाल र कांग्रेस उम्मेदवार सुनिल शर्मासँग प्रतिस्पर्धामा थिइन्।
काठमाडौंबाट मोरङ पुगेका प्राय: पत्रकारले रेखासँग अन्तवार्ता लिए। त्यसो त समाजिक संजाल टिकटकमा उनीसँगका भिडियो भाइरल भएका दिखिन्थे। उनको चर्चा यति थियो की उनको प्रतिस्पर्धी पुरापुर छायाँमा परेका थिए।
तर जनताले थापालाई उती मत दिएनन् जति उनलाई संसद् छिर्न आवश्यक पर्थ्यो। संसदीय रेसका लागि थापालाई जनताबाट करिब १० हजार ९९८ मत मात्र प्राप्त भयो। जबकि उक्त क्षेत्रबाट निर्वाचित कांग्रेस उम्मेदवार शर्माले करिब ४८ हजार ६३१ मतका साथ जित निकालेका छन्।
यस्तै, झापा क्षेत्र नम्बर ४ बाट कलाकार खुश्बु ओलीले स्वतन्त्र उम्मेदवारी दिएकी थिइन्। तर उनले १ हजार ८२४ मत मात्र प्राप्त गरिन्। कुल सदर मतको १० प्रतिशत मत नपुगेर ओलीको जमानत जफत भयो। यो क्षेत्रबाट एमाले उम्मेदवार लाल प्रसाद सावाँ निर्वाचित भएका छन्।
झापा क्षेत्र नंबर ५ बाट लेखक युग पाठकले स्वतन्त्र उम्मेदवारी दिएका थिए। उनले पनि जमानत जोगाउन सकेनन्। पाठकले जम्मा ३५६ मत मात्र प्राप्त गरे। यो क्षेत्र बाट एमाले अध्यक्ष केपी शर्मा ओली निर्वाचित भए।
यस्तै, धनुषा क्षेत्र नम्बर ४ बाट कृष्ण कुमार महतोले स्वतन्त्र उम्मेदवारी दिएका थिए। जनकपुरका चर्चित हाँस्य कलाकार महतोले ४ हजार ३४३ मत प्राप्त गरे। निर्वाचन अगाडिको लोभलाग्दो चर्चाका बीच पनि उनले कुल सदर मतको १० प्रतिशत पुर्याउन सकेनन्। यो क्षेत्रबाट एमाले सचिव रघुबीर महासेठ निर्वाचित भएका छन्।
त्यस्तै, काठमाडौं क्षेत्र नम्बर ५ बाट चर्चित हाँस्यकार्यक्रम ‘सक्किगोनी’का कलाकार मधुसुदन पाठक (सिते बा) ले हाम्रो नेपाली पार्टीबाट उम्मेदवारी दिएका थिए। लौरो चुनाव चिह्न रहेकै कारण केही चर्चा कमाएको यो पार्टीका उम्मेदपार पाठकले भने जम्मा ३६४ मत प्राप्त गरे। पाठक पनि जमानत जोगाउनबाट निकै टाढा रहे। यो क्षेत्रबाट कांग्रेस उम्मेदवार प्रदीप पौडेलले जित हासिल गरे।
यही क्षेत्रबाट उम्मेदवार रहेकी रञ्जु दर्शनाले पनि जमानत जोगाउन सकिनन्। २०७४ को निर्वाचनमा काठमाडौं महानगरको मेयर पदकी प्रत्याक्षी रञ्जुले जित ननिकाले पनि सान्दार मत प्राप्त गरेकी थिइन्। सार्वजनिक वृत्तमा अधिक चर्चामा रहेकी उनी पार्टी राजनीतिमा भने प्राप्त पुँजी संरक्षण गर्न नसक्दा यो निर्वाचनमा जम्मा ६०० मतमा मात्र सीमित हुन पुगिन्। तत्कालीन विवेकशिल, विवेकशिल साझा हुँदै यो निर्वाचनमा आइपुग्दा दलविहीन अवस्थमा पुगिन्। उनले स्वतन्त्र उम्मेदवारी दिएकी थिइन्।
यस्तै, चर्चीत नेपाली कमेडियन कार्यक्रम ‘कमेडि च्याम्पियन’ को पहिलो स्पर्धाको विजेता हिमेश पन्त राष्ट्रिय स्वतन्त्र पार्टीको उम्मेदवारका रुपमा धादिङ क्षेत्र नम्बर १ बाट प्रतिनिधि सभाका उम्मेदवार थिए। पन्तले १२ हजार ४९४ मत प्राप्त गरे। यो क्षेत्रबाट एकीकृत समाजवादीका राजेन्द्र प्रसाद पाण्डे विजयी बने। तेस्रो स्थानको मत पाएका पन्तले ‘घण्टी’ को रुझान भएको बेला औसत मत प्राप्त गरे।
चिनवनबाट उम्मेदवार दिन गोरखा २ पुगेका माओवादी केन्द्रका अध्यक्ष प्रचण्डलाई हराउन चिनवनबाटै गोरखा पुगेका १०० बर्षीय टिका दत्त पोखरेलले १३० मत पाए। उनले नेपाली कांग्रेस बीपी पार्टीबाट उम्मेदवार दिएका थिए।
त्यस्तै, दाङ क्षेत्र नंबर ३ बाट उम्मेदवार दिएकी पूर्व सञ्चारकर्मी तथा कलाकार कोमल वलीले २९ हजार ०९२ मत प्राप्त गरिन्। त्यसो त उनले नेकपा एमालेबाट राष्ट्रिय सभामा एक कार्यकाल पुरा गरिसेकी थिइन्। तर यो निर्वाचनमा कांग्रेस उम्मेदवार दिपक गिरीसँग पराजय भोगिन्।
दाङ क्षेत्र नंबर १ बाट उम्मेदवारी दिएकी गंगा चौधरी (सत्गौवा) १ हजार ९३ मतमा सीमित हुन पुगिन्। उनले हाम्रो नेपाली पार्टीबाट उम्मेदवारी दिएकी थिइन्। चौधरीको यहाँ चर्चा किन गरियो भने नेकपा एमालेको केन्द्रीय सदस्य रहँदा र अघिल्लो संसद्मा सांसद रहेकी चौधरी एमाले अध्यक्ष केपी ओलीले गरेका ‘राम्रा–नराम्रा’ सबै कामको बफादार रक्षा गर्थिन्। पार्टीले अन्तिम समयमा अर्की नेतृ शान्ता चौधरीलाई टिकट दिएपछि गंगाले पार्टी त्यागेर नयाँ दलबाट उम्मेवारी दिइन्। तर १० प्रतिशत मत प्राप्त गर्नबाट उनी धेरै दूर रहिन्। यो क्षेत्रबाट पूर्व एमाले तथा वर्तमान एकीकृत समाजवादी पार्टीका नेता मेटमणि चौधरीले जित निकाले।
यस्तै बहालवाला प्रधानमन्त्री तथा नेपाली कांग्रेसका सभापतिलाई संसदीय टक्कर दिन डडेलधुरा पुगेका गुल्मीका सागर ढकालले १३ हजार ४६ मत प्राप्त गरे। एक कार्यक्रममा उ बेलाका र अहिलका पनि प्रधानमन्त्री शेरबहादुर देउवाको हप्की भेटेका ढकालले देउवा हराउन डडेलधुरा पुगेर स्वतन्त्र उम्मेदवारी दिएका थिए। जित देउवाकै भए पनि ढकालले सम्मानजनक दोस्रो स्थानको मत प्राप्त गरे।
यी बाहेक नयाँ बनेको राष्ट्रिय स्वतन्त्र पार्टीबाट उम्मेदवारी दिएका फरक पेसाका डा तोसीमा कार्की, पूर्व संचारकर्मी रवी लामिछाने, अधिवक्ता तथा संचारकर्मी सोबिता गौतम लगायतको चर्चा भने मतमा पनि परिणत भयो। उनीहरुले संघीय संसद्को यात्रा सुनिश्चित गरेका छन्। चुनावमा जित निकालिसकेका कारणले पनि उनीहरुको चर्चा अहिले र आगामी दिनमा पनि रहिरहने छ।
निर्वाचन अघि चर्चामा रहेका, तर जित हात नलागेका उम्मेदवारको चर्चा भने अपवाद बाहेक क्रमश: सेलाउँदै जाने निश्चित छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791122041.webp)
-1786602170.png)
