पोखरा– नेपाली कांग्रेस बागलुङका सभापति जित शेरचन २०७४ मा भएको प्रदेश सभा निर्वाचनमा कांग्रेसबाट उम्मेदवार बने।
राष्ट्रिय जनमोर्चाको बलियो क्षेत्रका रुपमा हेरिने बागलुङमा शेरचन पहिलो प्रयासमै असफल भए। उक्त क्षेत्रमा राष्ट्रिय जनमोर्चाका उम्मेदवार टेकबहादुर घर्ती ३ हजार बढीको फराकिलो मतान्तरका साथ विजयी भए।
घर्तीले ११ हजार ८ सय ८४ र शेरचनले ८ हजार ६ सय २४ मत प्राप्त गरे।
निर्वाचित भएका टेकबहादुर घर्तीको ०७५ मंसिर २७ गते निधन भयो। त्यसपछि रिक्त रहेका क्षेत्रमा सरकारले ०७६ मंसिर १४ गते उपनिर्वाचनको मिति घोषणा गर्यो। त्यससँगै कांग्रेसका शेरचनलाई २ वर्षमै दोस्रो पटक बागलुङ प्रदेश सभा–२ ‘ख’ बाट चुवानी मैदानमा उत्रिने अवसर मिल्यो। उनले राष्ट्रिय जनमोर्चाका खिमबिक्रम शाहीसँग प्रतिस्पर्धा गरे।
तर दोस्रो पटक पनि उनी असफल भए। उनलाई जनमोर्चाका शाहीले २ हजार ९७ मतान्तरले पछि पार्दै दोस्रो प्रयास पनि असफल पारे।
तेस्रो पटकको निर्वाचनमा पनि शेरचनले टिकट पाए। उनले यसपालि टिकट मात्र पाएनन् दुई पटक पराजित गरेका जनमोर्चाको साथ पनि पाए। उनले यसपालि लगातार पराजित भएको क्षेत्र छोडेर नयाँ क्षेत्रमा उम्मेदवार बने।
लगातार २ पटक पराजित भएको बागलुङ प्रदेश सभा २ ‘२’ मा पनि कांग्रेसका द्रोणकुमार कुँवरलाई छोडर उनी २ ‘क’ मा उम्मेदवारी दिए।
पहिलेका प्रतिस्पर्धीको साथ पाएका शेरचन यसपालि विजयी भए । लगातार तेस्रो पटकको प्रयासपछि शेरचन प्रदेश सभा सांसद बन्न सफल भएका छन्। उनले एमालेले समर्थन गरेको माओवादीका बागी उम्मेदवार प्रकाश घर्तीलाई करिब ३ हजार मतान्तरले पराजित गरे।
शेरचनले १५ हजार १ सय ६ मत र घर्तीले १२ हजार ८ मत प्राप्त गरे।
विद्यार्थीकालदेखि नै आफ्नो राजनीति यात्रा सुरु गरेका शेरचन नेविसंघ बागलुङको विभिन्न पदमा रही काम गरिसकेका छन्। उनी ०६२ सालमा नेविसंघबाट ताजहल क्याम्पस काठमाडौंको स्ववियु सभापतिमा निर्वाचित भएका थिए। ०६७मा नेविसंघको केन्द्रीय सदस्य भएका शेरचन नेपाली कांग्रेस बागलुङ जिल्ला सभापति छन्।
उनले छोडेको बागलुङ–२ ‘२’मा पनि कांग्रेस विजयी भएको छ। कांग्रेसबाट उम्मेदवार बनेका द्रोणकुमार कुँवर करिब ४ हजार मतान्तरले विजयी भएका हुन्। कुँवरले १२ हजार ४ सय ८ मत र एमालेका लक्ष्मण पुनले ८ हजार ६ सय ७१ मत प्राप्त गरे।
बागलुङमा अन्य दुवै प्रदेशसभातफ कांग्रेसका उम्मेदवारले जित हासिल गरेका छन्। गठबन्धनबाट उम्मेदवार बनेका कांग्रेसका सबै उम्मेदवारले विजयी हासिल गरेका हुन्।
बागलुङ १ ‘१’ मा कांग्रेसका दीपेन्द्रबहादुर थापा १३ हजार ८ सय ८४ मतसहित विजयी भए। नेकपा एमालेका हिराबहादुर केसीले १२ हजार ४ सय ५ मत प्राप्त गरे।
बागलुङ १ ‘२’ मा कांग्रेसका युवा उम्मेदवार डिल्लीराम सुवेदीले जित हासिल गरे। उनले १३ हजार ३ सय २० मत लिँदा उनका प्रतिस्पर्धी नेकपा एमालेका नवराज पौडेलले ७ हजार २ सय ५३ मत प्राप्त गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
