निर्वाचन विशेष

मुस्ताङको राजनीतिमा ३ युवाले गरेको ‘हस्तक्षेप’

रिखिराम जिसी मंगलबार, मंसिर ६, २०७९ १०:३२

पोखरा–प्रतिनिधि सभाका लागि निर्वाचित हुने पहिलो नाम हो योगेश गौचन। मुस्ताङमा नेपाली कांग्रेसबाट उम्मेदवार बनेका मुस्ताङको थासाङ गाउँपालिका–३ लेते कालोपानीका २९ वर्षीय गौचनले प्रभाशाली नेतालाई हराउँदै सघीय संसद्को यात्रा पक्का गरेका छन्।

मुस्ताङमा प्रतिनिधि सभाका लागि मुस्ताङका जिल्ला सभापतिसमेत रहेका रोमी गौचनलाई प्रतिनिधिसभा र प्रदेशसभाको टिकट दिएर पठायो। रोमी आफैंले चुनाव लड्ने इच्छा जनाएनन्। उनले छोरालाई टिकट दिए।

‘मैले आफ्नो छोरालाई नै टिकट दिन खोजेको थिइनँ, तर प्रेम तुलाचनसँग भिड्न कोही तयार भएनन्। मनोनयन गर्ने दिन १ बजे खाली टिकट हातमा आयो। सबैले योगेशलाई देखाएपछि उसैलाई टिकट दिएको हुँ,’ उनले भनेका थिए।

एक आपसमा निर्वाचन लडेर १/१ पटक विजयी भएका रोमी र प्रेम २०७९ को प्रतिनिधि सभामा सँगै लड्ने अवसर मिलेन। रोमीले आफू नउठी पूर्व प्रतिस्पर्धी तुलाचनसँग प्रतिस्पर्धा गर्न छोरा योगेशलाई उठाए। तर पूर्वमन्त्री रोमी कार्यकर्ता र पार्टीको निर्णयानुसार छोरा उम्मेदवार बनेको बताउँछन्।

रोमीका छोराले टिकट पाउँदा धेरैले प्रेम तुलाचनको जित सुश्निचित रहेको आकलन गरेका थिए। तर धेरैको आकलन योगेश गौचनले गलत साबित गरिदिए। २०७४ को निर्वाचनमा आफ्नो बाबुलाई हराएर सांसद बनेका प्रेम तुलाचनलाई हराउँदै योगशले संसद्को यात्रा तय गरे।

निर्वाचित भएका योगेश र पराजित तुलाचन नाताले साला–भेना हुन्। योगेशले तुलाचनलाई ९ सय १४ मतान्तरले पराजित गरे। ७ हजार २३० मत खसेको मुस्ताङमा योगेशले ३ हजार ९९२ मत र एमालेका तुलाचनले ३ हजार ७८ मत ल्याए।

योगेश कांग्रेसबाट प्रतिनिधि सभा सदस्यमा निर्वाचित हुने कान्छा सांसद हुन्। विद्यार्थी राजनीतिबाट आएका उनी नेपाली कांग्रेसका गण्डकी प्रदेश सदस्य र महाधिवेशन प्रतिनिधि छन्। उनी युवा उद्यमी पनि हुन्। भारतबाट बिजनेस म्यानेजमेन्टमा स्नातक गरेका योगेश पछिल्लो समय राजनीतिमा सक्रिय छन्। मुस्ताङको लेतेमा उनको ‘कालोपानी गेस्ट हाउस’ नामक होटल पनि छ।

चुनावमा योगेशले कोरला नाका सञ्चालन गर्न चीनसँग कूटनीतिक पहल गर्ने प्रतिबद्धता व्यक्त गरेका थिए। सीमाना जोड्ने सडक पूर्वाधार तयार पार्ने मुद्दालाई प्राथमिकता दिने उल्लेख गर्दै आएका थिए। बेनी–जोमसोम सडकलाई स्थायी र दीर्घकालीन निकास दिन पहल गर्ने र जोमसोम–कोरला सडक कालोपत्रे गर्ने प्रतिबद्धता जनाएका थिए।

निर्वाचित भएपछि प्रतिक्रिया दिँदै योगेशले राजनीतिमा युवाहरुले हस्तक्षेप गर्न सक्छन भन्ने प्रमाणित भएको बताए। आफूले जनताको सेवक भएर काम गर्ने उनको भनाइ छ। उनले भने, ‘म तपाईं जनताको साथसाथै हिँड्नेछु। चाहे म गन्तव्यमा ढिलो किन नपुगुँ।’

४ दशक बढी कांग्रेस मुस्ताङको राजनीतिमा निर्वाचित योगेशका बुबा रोमीले बलियो पकड कायम राखेका थिए। रोमीले २०५६ र २०७० सालको निर्वाचनमा जितेका थिए। पूर्व मन्त्री समेत रहेका रोमी २०६४ र २०७४ मा चुनाव हारेका थिए।

रोमी वाणिज्य तथा आपूर्ति मन्त्री भइसकेका छन्। २०७० सालको निर्वाचनअघि पूर्व वाणिज्य मन्त्री गौचन र एमाले उम्मेदवार प्रेम दुवै नेपाली कांग्रेसमा थिए। तुलाचनले पार्टी सञ्चालनमा एकलौटी गरेको भन्दै त्यसबेला कांग्रेसबाट ठूलो पंक्ति लिएर प्रेमले विद्रोह गरे।

२०७० सालको निर्वाचनमा कांग्रेसका एउटै घरका नेता एउटा कांग्रेस र अर्को बागी उम्मेदवार बने। कांग्रेसबाट रोमी र बागी बनेर प्रेम निर्वाचन लडे। तर, कांगेसका रोमीले प्रेमलाई झिनो मतान्तरले पराजित गरे। कांग्रेसका रोमी ०७० सालमा निर्वाचन जितेपछि मन्त्री बने।

प्रेम एमालेमा प्रवेश गरे। ०७४ मा संघीय निर्वाचन भयो। प्रेमले ०७० सालको हारको बदला लिए। ०७४ मा रोमीलाई पराजित गरे। ०७४ मा ३ हजार ३ सय १७ मत प्राप्त गरी प्रेम विजयी भए। कांग्रेसका रोमीले २ हजार ८ सय ३२ मत प्राप्त गरेका थिए। यसपटक प्रत्यक्षमा उम्मेदवार हुने रुची नदेखाएका रोमीले समानुपातिकतर्फ पनि बस्ने इच्छा जनाएनन्।

मुस्ताङबाट निर्वाचित भएका ३ युवा
प्रतिनिधि सभामा मुस्ताङबाट चुनाव लड्ने योगेश २८ वर्षका गौचन मात्र होइन प्रदेश सभामा पनि दुवै युवा नै विजयी भएका छन् ।

प्रदेशसभामा ‘१’ मा ३५ वर्षीय नन्दु गुरुङ र प्रदेश सभा ‘२’ बाट ३८ वर्षीय विकल शेरचन विजयी भएका छन्। यी दुवै नेपाली कांग्रेसबाट विजयी भएका हुन्। उनीहरु दुवै नयाँ अनुहार हुन्। गुरुङ १ हजार ४८ मत ल्याएर प्रदेश सभा १ मा विजयी भए। उनका प्रतिस्पर्धी एमालेका इन्द्रधारा ड्याडु विष्टले ७ सय ९३ मत ल्याए। विष्ट यसअघि उक्त क्षेत्रबाट प्रदेश सांसद थिए।

यस्तै, शेरचन एमालेका चन्द्रमोहन गौचनलाई १५८ मतको अन्तरले पराजित गर्दै प्रदेश सभा सदस्यमा विजयी भएका हुन्। कांग्रेसका शेरचनले २ हजार ७२३ र एमालेका गौचनले २ हजार ५६५ मत पाए । गौचन एमाले जिल्ला अध्यक्ष र २०७४ को निर्वाचनमा समानुपातिकतर्फ प्रदेश सांसद रहेका थिए।