काठमाडौं- काठमाडौं क्षेत्र नम्बर १ मा पर्ने त्रैविद्य शिक्षा सदन मतदान केन्द्र थापाथलीमा मतदाताको चहलपहल निकै थियो। कोही मतदान गरेर फर्किँदै थिए त कोही मतदान गर्न आइरहेका थिए। कोही मतदान गर्न भित्र पसेकालाई पर्खिंदै थिए।
‘भोट हाल्नुभन्दा त नहालेकै बेस,’ मतदानस्थल अगाडि बसेका रणेन्द्र केसी एक्लै बोलिरहेका थिए। बबरमहलको गणेशथान नजिकै घर भएका केसीले अहिलेसम्म ५ पटक मतदान गरिसके। आज भोट हाल्न मतदान केन्द्र पुगेपछि कसलाई भोट हाल्नेन भन्ने दोधारमा परेको उनले बताए।
‘म भोट कसलाई दिने भन्ने दोधारमा छु। पुराना पार्टीलाई दिउँ, केही गर्ने होइन, नयाँलाई दिउँ भने जितेपछि ताल त्यही हो। जुनै जोगी आए पनि कानै चिरेको। यस पटक युवालाई नै भोट हाल्छु,’ उनले भने।
नेताहरुप्रति निकै आक्रोश पोखे उनले। ‘कसैले केही गर्दैन। कुर्सीका पछि मात्र लाग्छन्। पहिले त्यत्रो भोट गरेर चुनाव जिताइयो, खै के गरे? आफ्नो लागि गरे होलान्। देश र जनताका लागि कसैले केही गरेन। अब पनि केही होला जस्तो लाग्दैन,’ उनले भने।
अर्का मतदाता जीवन तन्डुकार पनि मतदान गरिसकेर घर फर्किंदै थिए। उनले यो चुनावमा पार्टी परिवर्तन गरेका छन्। पहिला एउटा पार्टीलाई मत दिन्थे। आफ्नो क्षेत्रमा सबै युवा उम्मेदवार भए पनि तीमध्येका आफूले मनले खाएको उम्मेदवारलाई भोट हालेको उनले बताए।
‘यसपालि राम्रै छानेर हालेको छु। जिते भने काम गर्छन् जस्तो लाग्छ। तर यसै भन्न सकिन्न है। हेर्दा गर्छन् जस्तो देखिए पनि पछि केही गर्दैनन्। उनले जिते भने देशका लागि काम गरुन्। यसमै उनको भलो हुन्छ,’ तण्डुकारले भने।
बबरमहलकै शुभद्रा आचार्य लौरो टेकेर मतदान केन्द्रमा पुगिन्। बुहारीलाई साथमा लिएर मतदान केन्द्रमा पसिन्। केही उनी उमेरले ७७ पुगेकी उनले भोट हाल्न नजान्ने हो कि भनेर बुहारीलाई लगेको बताइन्। उम्मेदवार भने आफैंले छानेर मत दिएको उनले बताइन्।
‘५ कक्षा पास गरेको छु। पढ्न–लेख्न आउँछ। भोट हाल्न नआउने होइन। तर बिगार्छु कि भन्ने डरले बुहारीलाई लगेको हुँ,’ उनले भनिन्।
उनले पनि यसपालि नयाँ उम्मेदवारलाई भोट हालेको बताइन्। ‘मैले त यसपालि ठिटालाई मत दएिँ। जे गरुन्–गरुन्। मलाई उनैले केही गर्लान् जस्तो लाग्यो। उनले देश र गरिब जनताका पक्षमा काम गर्छन् जस्तो लाग्छ। अरु मेरो भन्नु केही छैन,’ उनले भनिन्।
गौतम तुलाधर मतदान गरेर निकै उत्साहका साथ घर फर्किरहेका थिए। आफूले राम्रो व्यक्तिलाई छानेर भोट हालेकोमा उनी ढुक्क देखिन्थे। ‘मलाई राजनीति मन पर्दैन। तैपनि, मताधिकारको सदुपयोग गर्न मतदान गरेँ,’ उनले भने।
उमेरले ७० कटेका तुलाधर पहिला फिल्म खेल्थेँ रे। नेपालको पहिलो फिल्म कुमारीमा ड्राइभरको अभिनय गरेको उनले सुनाए।
‘आफन्त पर्ने उम्मेदवारलाई भोट हालेको छु। उनी सांसद हुन लायक लागेर नै भोत हालें। संसदमा पुगेपछि काम गर्छन् तिनले। काम गरेनन् भने हामी जनता कहाँ हेरेर बस्छौँ र?,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
