काठमाडौं– सशस्त्र प्रहरी बलका प्रहरी सहायक निरीक्षक (असई) सत्यनारायण यादव हत्याको कारण व्यक्तिगत रिसिइबी भएको खुलेको छ। अहिलेसम्मको अनुसन्धानबाट व्यक्तिगत रिसिइबीकै कारण असई यादवको हत्या भएको खुलेको हो।
हत्या आरोपमा असई यादवकै सहकर्मी सशस्त्रका जवान होमबहादुर खत्रीलाई पक्राउ गरेर अनुसन्धान गरेको प्रहरीले हत्याको कारण तस्करी नभई व्यक्तिगत रिसिइबी भएको निष्कर्ष निकालेको छ। सुरुवाती क्रममा सीमावर्ती क्षेत्रबाट हुने तस्करीविरुद्ध उभिएकै कारण असई यादवको हत्या भएको हुनसक्ने आशंका गरेर अनुसन्धान गरेको प्रहरीले व्यक्तिगत रिसिइबीका कारण हत्या भएको निकर्षको निकालेको हो।
जिल्ला प्रहरी कार्यालय सप्तरीका प्रमुख तथा प्रहरी उपरीक्षक (एसपी) अभिनारायण काफ्लेले नेपाल लाइभसँग भने, ‘सामान्य व्यक्तिगत रिसिइबीका कारण नै असई यादवको हत्या भएको देखिएको छ । यसमा अहिलेसम्म अन्य कारण खुलेको छैन।’
सशस्त्र प्रहरी बल गण नम्बर ६ हेडक्वार्टर राजविराजमा दरबन्दी भई बोर्डर आउट पोस्ट (बीओपी) छिन्नमस्तामा कार्यरत असई यादव असोज २० गते मृत भेटिएपछि जिल्ला प्रहरी कार्यालय सप्तरीले घटनाको अनुसन्धान गरेको थियो।
नेपाल–भारत सीमाभन्दा तीन किलोमिटर भारततर्फ बिहार राज्यको मधुवनी जिल्ला अन्तर्गत जिरोगा पुनर्वासस्थित घोडदह खोलामा असई यादवको शव भेटिएको थियो। नांगो अवस्थामा शव भेटिएपछि अनुसन्धान सुरु गरिएको थियो। सो क्रममा सशस्त्रकै जवान खत्री समेतको संलग्नता देखिएको भन्दै प्रहरीले उनलाई पक्राउ गरेर अनुसन्धान भइरहेको छ।
उनै खत्रीले व्यक्तिगत रिसिइबीका कारण असई यादवको हत्या भएको खुलेको एसपी काफ्लेले बताए । मारिएका असई यादव र जवान खत्री दुवैजना मदिरा पिइरहने र सो क्रममा विवाद हुने गरेको अनुसन्धानबाट खुलेको छ। ‘असई यादवले जवानलाई गाली गर्ने, बेलामा खाना नपकाएको, ड्युटी नगरेको भनेर उनले गाली गर्ने गरेको देखियो।
त्यहाँमाथि यी दुवैजना मदिरा खाएर पटक–पटक विवाद गर्ने गरेको पनि देखियो। आफूलाई गाली गरेको भनेर त्यही रिसिइबीमा जवान खत्रीले असई यादवको हत्या गरेको देखिन्छ’ एसपी काफ्लेले भने।
पक्राउ परेका जवान खत्रीको विगत पनि नराम्रो रहेको ट्रयाक रेकर्ड देखिएको छ। मदिरा खाएर झगडा गर्ने, ड्युटी नै छाडेर १५÷२० दिनसम्म वेपत्ता भएपछि सहायक हवल्दारबाट एक तह घटुवा गरेर उनलाई जवानमा झारिएको थियो। आफ्नो गाउँ सिरहामा समेत मदिरा खाएर झगडा गरेपछि गाउँलेले खत्रीलाई पक्राउ गरेर प्रहरीलाई बुझाउन लाग्दा माफी मागेपछि छाडिएको पाइएको काफ्लेको भनाइ छ।
असोज १९ मा असई यादव ड्युटीका लागि भन्दै मोहनपुरतर्फ गएका थिए। सीमा नजिकै रहेको बीओपीबाट केही पर पुगेपछि जवान खत्रीले असईको हत्या गरेको र कपडा खोलेर शव खोलामा बगाएको पाइएको छ।
एआईजीको टोलीले छानबिन गर्दै
आफ्नै सहकर्मीबाट असई मारिएपछि सशस्त्र हेडक्वाटरले प्रहरी अतिरिक्त महानिरीक्षक (एआईजी) सीपी (चन्द्रप्रकाश) गौतमको संयोजकत्वमा छानबिन समिति गठन गरेर छानबिन अघि बढाएको छ ।
असईको हत्या भएको पाइएपछि सशस्त्र प्रहरी हेडक्वार्टरले राजविराजस्थित सशस्त्र प्रहरी गण नम्बर ६ का गणपति सशस्त्रका एसपी प्रदीप खड्कालाई हेडक्वार्टर हल्चोक तानेको थियो। उनलाई संगुक्त राष्ट्र संघ (युएन) शान्ति स्थापना तालिम शिक्षालय ककनी, नुवाकोटमा सरुवा गरिएको छ। सप्तरीमा एसपी तीर्थराज पौडेललाई पठाइएको छ।
बीओपी प्रमुखमा प्रहरी निरीक्षक (इन्सपेक्टर) रहँदै आए पनि उक्त बीओपीमा भने केही समयदेखि सई नै प्रमुखको रुपमा कार्यरत थिए। बीओपी प्रमुख सई कृष्णबहादुर मगर पनि उक्त घटनापछि बिरामी भन्दै सशस्त्र प्रहरी अस्पताल काठमाडौंमा भर्ना भएका छन्।
सई मगरमाथि पनि सशस्त्र हेडक्वाटरले छानबिन अघि बढाएको। गौतमको समितिले आन्तरिक छानबिन गर्ने र अनुसन्धानमा खटिएका प्रहरीलाई आवश्यक सहयोग गर्ने काम भइरहेको सशस्त्रका सहायक प्रवक्तासमेत रहेका प्रहरी नायब उपरीक्षक (डीएसपी) शैलेन्द्र थापाले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
