काठमाडौं– माइती नेपालकी अध्यक्ष अनुराधा कोइरालाले मानव बेचबिखनविरुद्धको अभियानमा नायक प्रदीप खड्कालाई साथ दिन अनुरोध गरेकी छन्। भारत मात्रै नभएर पछिल्लो समय तेस्रो मुलुकमा समेत मौलाइरहेको मानव बेचबिखन रोक्नका लागि कलाकारको साथ आवश्यक रहेको कोइरालाले बताएकी छन्।
शनिबार कोइरालाले नायक खड्कालाई माइती नेपालमा बोलाएर मानव बेचबिखन रोक्नका लागि कसरी प्रभावकारी काम गर्न सकिन्छ भन्ने विषयमा छलफल गरेकी छन्।
नायक खड्का चर्चित कलाकार भएकाले उनले बोलेको कुराले प्रभाव राख्ने भन्दै अभियानमा साथ दिन अनुरोध गरेकी हुन्। करिब तीन घण्टासम्म भएको छलफलपछि नायक खड्काले पनि आफ्नो पक्षबाट हुनसक्ने सबै प्रकारको सहयोग गर्न तयार रहेको प्रतिबद्धता जनाएका छन्।
‘तपाईं पछिल्लो समय नेपाली कलाकारमध्ये सबैभन्दा चर्चामा आउनुभएको हो। नेपालमा मानव बेचबिखनको समस्या विकराल बन्दै गएको छ। यसमा अझ तपाईंजत्तिको कलाकारले आफ्नो मञ्चबाट बोलिदिँदा प्रभावकारी हुनसक्छ। त्यसैले हाम्रो अभियानमा तपाईंको तर्फबाट साथ चाहन्छौं’, उनले खड्कालाई अनुरोध गरेकी थिइन्।
साथै कोइरालाले मानव बेचबिखनविरुद्धको विषयमा चलचित्र निर्माण भए आफ्नो पूर्ण साथ रहने प्रतिबद्धता पनि जनाएकी छन्। नायक खड्काले पनि यो अभियानमा हरसम्भव आफ्नो साथ र सहयोग हुने वचन दिएका छन्।
यस्तै पछिल्लो समय विदेशमा समेत लगेर नेपाली फिल्म चलाएको प्रति प्रशंसा गर्दै प्रेम गीत–३ को सम्पूर्ण टिमलाई बधाई दिएकी थिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
