काठमाडौं– आउँदो मंसिर ४ गते हुने प्रतिनिधि सभा र प्रदेश सभाको निर्वाचन आउन अब ३४ दिन बाँकी छ। चुनावका लागि अहिले उम्मेदवारहरुले आफ्नो तयारी गरिरहेका छन्।
यो चुनावमा ‘हेभिवेट’ नेताहरु समेत एक–आपसमा भिड्दैछन। ‘हेभिवेट’ नेताहरु भिड्ने चर्चितमध्येको एक क्षेत्र हो, कैलाली–४। कैलाली–४ मा माओवादी परित्याग गर्दै एमाले रोजेका लेखराज भट्ट र डोटी छोडेर कैलाली रोजेका कांग्रेसका वीरबहादुर बलायरबीच मुख्य प्रतिस्पर्धा हुँदैछ। यो क्षेत्रमा यी दुईबाहेक अन्य आठ उम्मेदवार चुनावी मैदानमा छन्।
नेकपा विभाजनपछि एमालेमै बसेका भट्ट अहिले एमालेका सचिव र सुदूरपश्चिम प्रदेश कमिटीका इञ्चार्ज हुन् भने बलायर नेपाली कांग्रेसका सुदूरपश्चिम प्रदेश सभापति हुन्।
बलायर डोटीबाट निर्वाचन लड्दै आएका थिए। डोटीबाट प्रतिनिधि सभामा एकीकृत समाजवादीका नेता प्रेमबहादुर आलेले टिकट पाएसँगै बलायर कैलाली–४ मा झरेका हुन्।
भौतिक पूर्वाधारमन्त्री भइसकेका बलायर २०७४ सालको प्रतिनिधि सभाको निर्वाचनमा डोटीबाट वाम गठबन्धनका प्रेम आलेसँग पराजित भएका थिए। आलेले ३२ हजार ५ सय १० मत ल्याएर विजयी हुँदा बलायरले ३० हजार ८ सय ७८ मत पाएका थिए।
तत्कालीन माओवादी केन्द्रका स्थायी कमिटी सदस्यसमेत रहेका भट्टले वाम गठबन्धनको तर्फबाट २०७४ सालको निर्वाचनमा कैलाली–४ बाट ३१ हजार ३ सय ५९ मत ल्याएर विजयी भएका थिए। उनीसँग कांग्रेसका सुनिल भण्डारी पराजित भएका थिए। भण्डारीले २० हजार ९ सय ६० मत मात्रै प्राप्त गरेका थिए।
भट्टले व्यवस्थापिका २०६३ बाट संसदीय यात्रा प्रारम्भ गरेका थिए। त्यतिबेला उनी अन्तरिम विधायिका बनेका थिए। भट्ट २०६४ सालको निर्वाचनमा कैलाली–५ बाट विजयी भएका थिए। भट्ट उद्योग, वाणिज्य तथा आपूर्ती मन्त्री, श्रम तथा यातायात व्यवस्थामन्त्री र विज्ञान प्रविधि मन्त्री भइसकेका छन्।
कैलाली–४ मा मोहन्याल गाउँपालिका वडा नम्बर ५, गौरीगंगा नगरपालिका, चुरे गाउँपालिका र गोदावरी नगरपालिका गरि चारवटा स्थानीय तह पर्दछन। यो क्षेत्रमा गत वैशाखमा सम्पन्न स्थानीय निर्वाचनमा वडाध्यक्षले पाएको मत हेर्ने हो भने कांग्रेस अगाडि देखिन्छ । कांग्रेसले २३ हजार ७३३, एमालेले १७ हजार ८५, माओवादी केन्द्रले ९ हजार २ सय ८६ पाएका थिए। त्यसैगरी नेकपा एकीकृत समाजवादीले ४ हजार ४९ मत पाएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
