काठमाडौं– दरबारमार्गस्थित क्लब प्लाटिनममा बाउन्सरको रूपमा कार्यरत निकेत राई र तेन्जुङ शेर्पा ड्युटी सकेर असोज २५ गते बिहानीपख आफ्नो कोठातर्फ जाँदै थिए। काडमाडौं–२६ गल्कोपाखास्थित हुनमान चोक नजिक पुगेको बेला बिहान ५ बजेर २० जाँदा उनीहरुमाथि खुकुरी प्रहार भयो।
नम्बर नखुलेका चार वटा मोटरसाइकलमा आएका युवाहरुले उनीहरुमाथि खुकुरी प्रहार गरे। उनीहरुलाई पिछा गर्दै गल्कोपाखा पुगेपछि ज्यान मार्ने उद्देश्यले बाउन्सद्वय राई र शेर्पामाथि खुकुरी प्रहार भएको थियो।
योजनाबद्ध तरिकाले खुकुरी, बोतल, इँटा प्रहार गर्दा उनीहरुको टाउको, खुट्टा र शरीरका अन्य भागमा चोट लागेकोे थियो। खुकुरी प्रहार भएको सूचना पाएपछि घटनास्थल पुगेको प्रहरीले उनीहरुलाई उपचारको लागि ट्रमा सेन्टर पुर्याएको थियो।
त्यसपछि खुकुरी प्रहार गर्नेको खोजी गर्ने क्रममा अहिलेसम्म ८ जना पक्राउ परेका छन्। जिल्ला प्रहरी परिसर काठमाडौं, काठमाडौं उपत्यका अपराध अनुसन्धान कार्यालय, प्रहरी वृत्त लैनचौर, जिल्ला प्रहरी कार्यालय दोलखा र प्रहरी वृत्त बौद्ध समेतको सहयोगमा प्रहरीले ८ जनालाई पक्राउ गरेको हो।
पक्राउ पर्नेहरुमा दोलखाको सैलुङ गाउँपालिका–२ का ३३ वर्षीय जीवन तामाङ, सोही ठाउँका २९ वर्षीय विनोद तामाङ, सिन्धुपाल्चोकको बाह्रबिसे नगरपालिका–८ का २७ वर्षीय दोर्जे शेर्पा, रामेछापको गोकुलगंगा गाउँपालिका–२ का २८ वर्षीय विकास श्रेष्ठ, सिन्धुपाल्चोकको मेलम्ची नगरपालिका–१० का २९ वर्षीय राजेन्द्र खत्री, दोलखाको मेलुङ गाउँपालिका–३ का २९ वर्षीय प्रदीप तामाङ, काभ्रेपलाञ्चोकको रोशी गाउँपालिका–८ का ३२ वर्षीय दीपेन लामा र काठमाडौं–७ चाबहिलका २६ वर्षीय करण डंगोल छन्।
उनीहरुबाट प्रहरीले घटनामा प्रयोग गरिएको ३ थान खुकुरी, २ थान मोटरसाइकल, घटनामा प्रयोग भएको इँटा, च्यातिएर रक्ताम्य भएका कपडाहरु समेत बरामद गरेको छ। पक्राउ परेका ८ जनालाई ज्यान मार्ने उद्योगको कसूरमा म्याद लिएर अनुसन्धान अघि बढाइएकोे छ। अनुसन्धानको क्रममा नयाँ नयाँ तथ्यहरु खुल्दै गएका छन्।
क्लबमा एक महिनाअघि खाएको कुटाइएको बदला लिन खुकुरी प्रहार
एक महिनाअघि भदौ २३ गते हाल पक्राउ परेकासहित करिब ३० जनाको समूह दरबारमार्गमा रहेको प्लाटिनम क्लबमा गएको थियो। अत्यधिक मदिरा पिएपछि उनीहरुले त्यतिबेला क्लबमै तोडफोड र गालिगलौज गरेका थिए।
त्यसपछि बाउन्सरले उनीहरुलाई नियन्त्रणमा लिएर कुटपिट समेत गरेका थिए। कुटपिटबाट दोर्जे शेर्पाको हात समेत भाँचिएको थियो। उनको हातमा अहिले पनि स्टिल हालिएको छ। बाउन्सरको कुटपिटबाट हात समेत भाँचिएर स्टिल हाल्नुपर्ने अवस्थामा पुगेपछि त्यसैको बदलामा यो समूहले खुकुरी प्रहार गरेको पाइएको परिसरका एक अधिकृतले बताए।
खुकुरी प्रहारको मुख्य योजनाकार नै दोर्जे रहेको पाइएको छ। उनैको योजनामा अन्य व्यक्तिहरु मिलेर बाउन्सरमाथि खुकुरी प्रहार भएको पाइएको छ।
हिमाल आरोहीको कोठामा बन्यो योजना
हाल फरार रहेका मामा भनिने दावा शेर्पाको कोठामा योजना बनाएर बाउन्सरमाथि खुकुरी प्रहार भएको अनुसन्धानबाट खुलेको छ। दावा ट्रेकिङ गएको भन्ने सूचना प्रहरीले पाएको छ।
कपन सिमलटारमा रहेको दावाको कोठामा योजना बनाएर बाउन्सरमाथि खुकुरी प्रहार गरिएको अनुसन्धानमा संलग्न एक प्रहरी अधिकारीले नेपाल लाइभलाई जानकारी दिए। उनैको कोठाबाट प्रहरीले खुकुरी समेत बरामद गरेको छ।
फरार रहेका दावा हिमाल आरोही समेत रहेको पाइएको छ। दावाले आफूलाई ७ पटक हिमाल आरोहण गरेको बताउने गरेको पक्राउ परेका उनकै सहकर्मीले प्रहरीसमक्ष बताएका छन्। ‘उनको कोठामा भेटिएको तस्बिरहरुबाट समेत उनी हिमाल आरोही रहेको देखिन्छ। तर, कुन हिमाल कतिपटक चढे भन्नेबारे उनी पक्राउ नपरी भन्न सक्ने अवस्था छैन’, एक अनुसन्धान अधिकृतले भने।
प्रहरीलाई समेत कुट्ने गिरोह
हाल पक्राउ परेकाहरुले बाउन्सरलाई मात्रै होइन प्रहरीलाई समेत कुटपिट गरेको पाइएको छ। कपन एरियामा उनीहरुले केही समयअघि प्रहरीलाई नै कुटपिट गरेका थिए। मदिरा पिएर होहल्ला गर्ने र उल्टै प्रहरीलाई कुटपिट गरेर फरार भएको पाइएको छ।
ड्युटीमै रहेको प्रहरीलाई कुटपिट गर्ने यो समूह कपन, बौद्ध एरियामा गुण्डागर्दीमा समेत संलग्न रहेको प्रहरी अनुसन्धानबाट खुलेको छ। जग्गा किनबेचको काम गर्ने, त्यसबापत कमिसन लिनेदेखि टोले गुण्डाको रुपमा समेत उनीहरुले धम्क्याउँदै रकम असुल्ने गरेको पाइएको प्रहरीले जनाएको छ।
१० वर्ष जेल बसेर निस्केका समेत खुकुरी प्रहारमा संलग्न
पक्राउ परेकामध्ये काभ्रेपलाञ्चोकको रोशी गाउँपालिका–८ घर भइ काठमाडौं बौद्ध बस्दै आएका ३२ वर्षीय दीपेन लामा १० वर्ष जेल बसेर छुटेका व्यक्ति भएको पाइएको छ।
कुटपिटदेखि डाँका, चोरी समेतको घटनामा पक्राउ परेर उनी दोषी ठहर भएका व्यक्ति हुन्। डाँका चोरी घटनामा दोषी ठहर भएर उनी १० वर्षसम्म ललितपुरस्थित नख्खु कारागार बसेका थिए। १० वर्ष जेल बसेर छुटेका उनै दीपेन अहिले फेरि ज्यान मार्ने उद्योगको कसूरमा पक्राउ परेका छन्।
दोर्जेको योजना अनुसार बाउन्सरलाई खुकुरी प्रहार गर्ने घटनामा उनी पनि संलग्न रहेको जिल्ला प्रहरी परिसर काठमाडौंका एसपी तथा प्रवक्ता दीनेशराज मैनालीले बताए।
प्रहरीलाई कुटपिट गर्नेदेखि हिमाल आरोहीसम्म अझै फरार
खुकुरी प्रहार घटनामा संलग्न भएका ८ जना पक्राउ परे पनि केही व्यक्ति भने अझै फरार छन्। हिमाल आरोही भनिएका दावा लामादेखि प्रहरीलाई कुटपिट गर्ने भनिएका छिरिङ नाम बताउने व्यक्ति, ग्याल्जेन शेर्पा, अनिस तामाङ लगायतका व्यक्तिहरु अझै फरार रहेका छन्।
उनीहरुको खोजी जारी रहेपनि अहिलेसम्म पक्राउ पर्न सकेका छैनन्। ‘फरारको खोजीमा हामी लागिरहेका छौं। उनीहरु पक्राउ परेपछि यो घटनाको सबै पाटो खुल्छ’, जिल्ला प्रहरी परिसर काठमाडौंका प्रमुख तथा एसएसपी भरत बोहराले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1785139095.jpg)
-1764146706.png)
