पोखरा- नवौं राष्ट्रिय खेलकुद प्रतियोगिता अन्तर्गत बिहीबारदेखि हक्कीका खेल सुरु हुँदैछन्। तर मैदान भने अझै तयार भएको छैन। पुरुषतर्फको हेम्जाको गौरिशंकर खेल मैदानमा तथा महिलातर्फको गण्डकी बोर्डिङ स्कुलमा आयोजना गरिदैछ।
प्रतियोगिता जति नजिकिँदै छ, त्यति नै आयोजकलाई व्यवस्थापन गर्न हम्मे परेको छ। भोलि (बिहीबार)देखि औपचारिक सुरुवात हुन लागेको हक्की प्रतियोगिताको लागि बुधबार बल्ल हेम्जाको गौरिशंकर खेल मैदानका घाँस काट्ने काम गरिएको नेपाल हक्की संघका केन्द्रीय उपाध्यक्ष हिमाल खड्काले बताए।
बुधबार अबेर रातिसम्म मैदानको घाँस काटिने र बाँकी बिहीबार बिहानैबाट काटिने तथा मैदान मार्किङ लगायतका कार्य हुने उपाध्यक्ष खड्काले बताए। हतार–हतारमा व्यवस्थापन गरिएका यस्ता खालका पूर्वाधारमा खेलाडीहरुलाई चोटपटकको चुनौती रहेकोे उनले गुनासो गरे।
‘समयमा खेल मैदान व्यवस्थापनतर्फ सम्बन्धित निकायले ध्यान दिएन। मैदानमा अहिले भर्खर काटिएका घाँसका ठुटाहरु र स–साना ढुंगाका टुक्राहरु जताततै छन्। खेलाडीलाई कसरी खेलाउने?’ उनले प्रश्न गरे।
स्थानीय तह, खेल व्यवस्थापक लगायत सम्बन्धित निकायबीच समन्वय नहुँदा यो अवस्था आएको उनले बताए ।
भौतिक पूर्वाधार पर्याप्त नभएर हक्की प्रतियोगिता प्रदेश बाहिर लैजाँदा राम्रो सन्देश नजाने भएकोले चुनौतीका बीच पनि कास्कीमै गराउन लागेको उनले बताए।
राष्ट्रिय खेलकुद परिषदका सदस्य राजेश गुरुङले छोटो समयमा सबै खेलको भौतिक व्यवस्थापन गर्दै गर्दा कुनै कनै प्रतियोगिता अभाव र चुनौतीका बीच सञ्चालन गर्न लागिएको स्वीकारे।
गण्डकी प्रदेश आयोजक रहेको नवौं राष्ट्रिय खेलकुद प्रतियोगिताका लागि केन्द्रबाट नै समयमा बजेट प्राप्त नभएकाले समयमा प्रतियोगिताका लागि पूर्वाधारहरु व्यवस्थापन गर्न आयोजक चुकेको गुरुङले बताए।
‘प्रतियोगिताको लागि भौतिक व्यवस्थापनका लागि बजेट प्राप्त भएको छैन। मौखिक रुपमा मात्रै बजेटको कुरा भएको छ,’ सदस्य गुरुङले भने, ‘बजेट नभएकोले हामी यस विषयमा चुकेका छौं।’
खेलस्थल छनोट व्यवस्थापन हतारमा भए पनि प्रतियोगिता सफल बनाउनको लागि आयोजकका विभिन्न निकाय लागि परेको उनले बताए।
भोलिबाट हक्कीमा पुरुषतर्फ ९ टिम र महिलातर्फ ७ टिमले प्रतिस्पर्धा गर्दैछन्। प्रतियोगिताको असोज २८ गते औपचारिक रुपमा उद्घाटन हुने भनिए पनि प्रतियोगिता अन्तर्गतका केही खेलहरु सुरु भइसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
