काठमाडौं– नेपालीहरुको महान चाड दशैंको मुख्य दिन नजिकिएसँगै घर जाने यात्रुहरुको चाप बढेको छ। दैनिक करिब एक लाखबढीको संख्यामा यात्रु उपत्यकाबाट घरतर्फ जाँदैछन्। फूलपातिको दिन आइतबार पनि उस्तै भीड छ। लाखौं यात्रु सार्वजनिक सवारीमार्फत् घर गइरहेका छन्।
तर, सबैले घरसम्म पुग्नका लागि सवारी साधनको टिकट पाइरहेका छैनन्। काठमाडौंको गोंगबु बसपार्कमा बिहानैदेखि टिकटको लाइन लागे पनि सहज रुपमा टिकट पाइएको छैन। टिकट काट्न आउने र अग्रिम टिकट काटेका सर्वसाधारणहरु बिहानैदेखि नयाँ बसपार्कमा रहेका छन्।
नयाँ बसपार्क क्षेत्रमा रहेका सर्वसाधारणहरु यातायात व्यवसायीहरुले व्यवस्थापकीय काम राम्रोसँग गर्न नसकेको गुनासो गरे। बीच बाटोबाट सर्वसाधारणहरु लिएर जाने कतिपय सवारीसाधनका चालक र सहचालकहरुका कारण टिकट काटेका कतिपयले टिकट नपाइरहेको उनीहरुको गुनासो छ।
त्यस्तै यातायात व्यवसायीहरुले बसको टिकट छ भनेर काट्ने गरेको तर गाडी चल्ने बेलामा सिट नै खाली नभएको भन्दै क्याबिन तथा गल्लीमा मुढामा बस्न लगाउने गरेको यात्रुको गुनासो छ।
बस व्यवसायीहरुले दोब्बर मूल्य भाडा लिएर रिजर्भमा पनि यात्रुहरुलाई ओसार्ने गरेको तर टिकट भने नदिएकोमा यात्रुहरु आक्रोशित छन्। उनीहरुले सरकारले दशैंमा घर जानेहरुलाई बसको टिकटको लागि आवश्यक व्यवस्था नमिलाएको गुनासो गरेका छन्।
नयाँ बसपार्कमा भेटिएका एक सर्वसाधारणले बिहानैदेखि लाइन बसे पनि भनेजस्तो सिट नपाएको गुनासो गरे। पाइए पनि क्याबिनमा बस्नुपर्ने टिकट काउन्टरका कर्मचारीले बताउने गरेको उनको भनाइ छ।
त्यस्तै यातायात व्यवसायीहरुले भने ‘अन द स्पट’ आएर जसरी पनि घर जानैपर्ने भन्ने सर्वसाधारणका कारण यस्ता समस्या आइरहेको बताए। पूर्वाञ्चल संयुक्त यातायातका कर्मचारी खगेन्द्र बस्नेतले आज टिकट काट्न आउने र जसरी पनि जानैपर्छ भन्ने सर्वसाधारणहरुले यस्तो समस्या निकालिरहेको बताए।
उनले टिकट काट्दा उभिएर पनि जान्छु भन्ने तर टिकट काटिसकेपछि टिकटमा अर्को मानिस राखेको छ भन्ने जस्ता कुरा गरेर भ्रम पैदा गरिरहेको बताए।
नवरात्र शुरु भएसँगै रोजगारी र अध्ययनको सिलसिलामा काठमाडौं आएकाहरु गाउँ फर्किरहेका छन्। यातायात व्यवस्था विभागले अग्रिम टिकट खुलाएर यातायातको सहज व्यवस्थापन गर्ने भने पनि यात्रुहरु भने अग्रिम काटेको टिकट पनि नपाएको गुनासो गरिरहेका छन्।
नयाँ बसपार्क, गौशाला, कोटेश्वर लगायतका स्थानमा टिकट काटेर घर फर्किने यात्रुको लर्को देख्न सकिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
