नेपालगन्ज विमानस्थल : फाइल तस्बिर
खजुरा– दशैंमा घर जान पाउनु वर्षभरिको एक उल्लासको समय हुन्छ तर, हुम्लाका सलिन ठकुरी र उनका साथीहरू यतिबेला नेपालगञ्जमा दशैंमा घर जान नपाइरहेको पीडामा छन्।
हुम्लाका लागि एकमात्र यातायातको साधन हवाई जहाजका कम्पनीले काठमाडौंमै उडान केन्द्रित गराएपछि उनीहरूले टिकट पाएका छैनन्। यसपल्ट घर जान पाइन्छ वा पाइँदैन ठेगान नभएको दुखेसो सुनाउँछन्।
अहिले नेपालगञ्जबाट कर्णालीका हिमाली जिल्लामा उडान भर्न समिट एयरको एकमात्र जहाज छ। समिट एयरको जहाजका लागि उनीहरु निराश अवस्थामा विमानस्थल परिसरमा भेटिए।
बिहीबार नेपालगञ्जबाट हुम्लाका लागि समिट र ताराको एउटा जहाजले उडान गरे। तर, विमानस्थलमा टिकटका लागि पुगेका कसैले पनि उड्न पाएनन्। विमान कम्पनीका कर्मचारीले टिकट पहिले नै प्याक भइसकेको जवाफ दिइरहेका थिए।
समिट एयरका कर्मचारीले आइतबार उडान गर्ने समयतालिका रहे पनि टिकट दिन नमान्ने ती कर्मचारीले भन्दै थिए, ‘हामी यहाँ बसेर सेवा दिइरहेकालाई पेल्ने तर, यतिबेला एउटा पनि विमान यहाँ नराखेर लुक्लातिर गएका कम्पनीहरूलाई केही नभन्ने?’
हुम्लाका चुनराज शाहीले दुई हप्तादेखि भौतारिँदा पनि टिकट नपाइएको दुःखेसो पोखे। उनले विमान कम्पनीले नाफा कमाउन विदेशी पर्यटकलाई बोक्न पूर्वतिर लाग्दा कर्णालीवासीको अधिकार खोखिएको बताए।
अहिले विमान कम्पनीले कर्णाली जिल्लाका लागि चार्टर उडान गर्न कडाइ गरिएपछि नियमित उडानको माग पनि कम गर्ने गरेको पाइएको छ। निजी विमान कम्पनीसहित सरकारी कम्पनी नेपाल एयरलाइन्सको विमान पनि नेपालगञ्जमा छैन। नेपाल एयरलाइन्सको विमानस्थलस्थित काउन्टर बन्द अवस्थामा रहेको थियो।
भएका उडानमा पनि सर्वसाधारणले टिकट पाउँदैनन्। नेता तथा पहुँचवाला र तिनका आफन्तले फोन गरेकै भरमा टिकट दिने गरेका कारण आधिकारिक बाटोबाट टिकट काट्न पुग्ने सर्वसाधारण निराश भएर फर्किनु परिरहेको छ।
यस्तो अवस्थामा पनि नेपालगञ्ज विमानस्थलमा हेल्प डेस्कको व्यवस्था छैन। कति यात्रुहरू कहाँका लागि टिकट पर्खिरहेका छन् भन्ने रेकर्ड न विमान कम्पनीसँग छ न विमानस्थल प्रशासनसँग।
कर्णालीका सर्वसाधारण भने दशैंको मुखमा घरको याद मनमा बोकेर भौतारिइरहेका छन्। चुनराज शाहीले भने, ‘चुनावका बेला जबरजस्ती बोलाएर टिकट दिएर विमानमा उडाएर लैजाने नेताहरू अहिले कता छन् थाहा छैन।’
तारा एयरका तीन वटा जहाजमध्ये एउटा कर्णालीका लागि र दुईवटा अहिले पूर्वतिर उडान भर्ने गरिएको तारा एयरका नेपालगञ्ज स्टेशन म्यानेजर दिलीप कार्कीले बताए।
उनका अनुसार एक जहाजमार्फत तालिका अनुसार हप्ताको दुई–तीन दिन कर्णालीका लागि उडान गरिरहेको छ। उनले भने, ‘अस्तीसम्म यात्रु नै थिएनन् अहिले दशैं मनाउन विशेष गरी विद्यार्थीहरू मात्रै बढी भएर एकैपटक भीड भएको हो, पालोअनुसार विस्तारै उडाइरहेका छौं।’ दशैंसम्म सबै यात्रु आफ्नो घर पुग्ने उनी विश्वस्त छन्।
वर्षमा दुई महिना सेप्टेम्बर र अक्टुबर पर्यटक आउने सिजन भएकाले घाटामा हुने गरेको एयरलाइन्सलाई पनि आम्दानी गर्न मुख्य स्रोतको आवश्यकता पर्ने भएकाले पहिलो प्राथमिकता पर्यटकलाई दिइको उनको भनाइ छ।
स्टेशन म्यानेजर कार्कीका अनुसार अहिले दुई जहाज पूर्व लुक्लातिर पठाएको छ। ‘हामीसँग चारवटा जहाज थियो। एउटा जहाज जोमसोममा क्य्राप्स भएपछि तीन वटाले धानेका छौं’, उनले भने।
कर्णालीका जिल्लाका लागि अहिले नेपाल एयरलाइन्स, समिट र ताराले हवाई उडान गर्दै आएका छन्। यसमा नेपाल एयरको जहाज बिग्रिएर उडेको छैन भने अहिले दुई वटा कम्पनीले मात्र उडान गरिरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1786157138.png)
-1786184812.png)
