बुटवल– सिद्धार्थनगर नगरपालिका–८ की रेखा आचार्य दशैंका लागि सरसामान खरिद गर्न भैरहवा बजारदेखि करिब ५ किलोमिटर दूरीमा रहेको सीमावर्ती बजार सुनौली पुगिन्।
उनले खाद्यान, दैनिक उपभोग्य सामग्रीदेखि लत्ताकपडासमेत खरिद गरेर ल्याइन्। आचार्यका अनुसार धेरै सामान किन्नुपर्ने हुँदा केही सस्तो पाइने भएकाले उनी भारतीय बजार पुगेकी हुन्।
तिलोत्तमा नगरपालिका-६ की माया पौडेल पनि छिमेकीहरूका साथ दशैंका लागि सामान किन्न सीमावर्ती बजार सुनौली पुगिन्। ‘लुगाकपडा, चिनी, तेललगायत सबै सामान किनेकी छु,’ पौडेलले भनिन्, ‘दशैंका बेला सामान किन्न सधैं सीमापारिका भारतीय बजार जाने गरेकी छु।’
आचार्य र पौडेल मात्र नभई भारतीय सीमाक्षेत्रका प्रायः सबैजसो नेपाली अहिले दशैंको सामान किन्न भारतीय बजार पुग्ने गरेका छन्। चिनी, दाल, तेल, सुट, सारीलगायत सामान भारतीय बजारमा सस्तो पाइने हुनाले भारतीय बजार जाने गरेको स्थानीय बताउँछन्।
‘दशैंमा परिवार सबैका लागि लत्ताकपडा किन्नुपर्छ। मीठोमसिनो खान पनि अन्य दैनिक उपभोग्य सामग्री पनि चाहिन्छ,’ रुपन्देही देवदह नगरपालिकाका पुष्करराज न्यौपाने भन्छन्, ‘सस्तो पाइन्छ भनेर हामी दशैंका लागि सामान खरिद गर्न सधैं भारतीय बजार जाने गर्छौं।’
केही दिनपछि दशैंका लागि सामान खरिद गर्न भारतीय बजार जाने योजना बनाएको उनले सुनाए। गाउँभरिका सबै दशैंका लागि सामान खरिद गर्न भारतीय बजार नै जाने गरेको उनको भनाइ छ।
रुपन्देहीसहित पाल्पा, अर्घाखाँची, गुल्मी, स्याङ्जा, प्युठानदेखि पोखरासम्मका व्यक्तिहरूले हिन्दूहरूको महत्त्वपूर्ण पर्व दशैंका लागि नुन, चिनी, तेल, दाललगायत दैनिक उपभोग्य सामग्रीदेखि लत्ताकपडासम्म खरिद गर्न सीमावर्ती भारतीय बजारको भर पर्ने गर्छन्।
विजयादशमीको ५ दिन मात्र बाँकी रहँदा रुपन्देहीका अधिकांश बजारहरू सुनसानजस्तै छन्। तर, सीमावर्ती भारतीय बजार भने दशैंको सामान खरिद गर्न जानेको चहलपहलले गुल्जार बनेका छन्।
सिद्धार्थ उद्योग वाणिज्य संघका अध्यक्ष भीष्म न्यौपाने भन्छन्– ‘भारतीय बजारमा चहलपहल हुनु र नेपाली बजार सुनसान हुनुमा सरकारी निकायको लापरवाही हो।’
न्यौपानेका अनुसार भन्सार कार्यालयले एउटा सीमा तोकेर सामान ल्याउन दिनुपर्छ। नियमन गर्ने निकायले भारतीय बजारबाट जति पनि सामान ल्याउन दिने, चेकजाच नगर्ने, गरेपनि छोड्ने प्रवृत्तिले गर्दा यस्तो भएको उनको दाबी छ।
बेलहिया नाका देशकै दोस्रो ठूलो भन्सार नाका हो। यस नाकासँग जोडिएको सुनौली बजारमा अहिले दशैंको समयमा दिनहुँ हजारौं संख्यामा नेपालीहरू बजार गर्नका लागि जाने गरेका छन्। जसका कारण दिनहुँ करोडौं नेपाली रकम विदेशिने गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769166231.png)
-1769158577.png)
-1769161919.png)
-1764146706.png)
