काठमाडौं– आगामी मंसिर ४ गते हुने प्रदेश तथा प्रतिनिधि सभाको निर्वाचनका लागि सिटको भागबण्डा मिलाउन सत्ता गठबन्धनका ५ दलहरु अन्तिम कसरतमा छन्। भागबण्डा टुंग्याउन गठित कार्यादलसहित ५ दलकै शीर्ष नेताहरु पनि पछिल्लो समय निरन्तरजसो छलफलमा छन्।
कार्यदलले पेस गरेको ‘प्रतिवेदन’अनुसार सिट बाँडफाँटका लागि शीर्ष तहमा एक तहको सहमति जुटिसकेको नेताहरुले दाबी गरेका छन्। तर, केही सिटलाई लिएर भने अझै पनि दलहरु आ–आफ्नै अडानमा छन्।
मधेस मिलाउन सकस
पहिलो हुने निर्वाचित हुने (प्रत्यक्ष) निर्वाचन प्रणालीअन्तर्गत प्रतिनिधि सभाका १६५ वटा सिटमध्ये १४८ वटाको बाँडफाँटका विषयमा गठबन्धनका नेताहरुबीच ‘मोटामोटी सहमति जुटिसकेको छ। यस्तै, प्रदेश सभाका ३३० सिटमध्ये पनि ‘अधिकांश’मा सहमति जुटिसकेको प्रधानमन्त्री तथा पार्टी सभापति शेरबहादुर देउवानिकट नेपाली कांग्रेसका एक नेताले जानकारी दिए।
तर, प्रतिनिधि सभाका १७ सिट र प्रदेश सभामा मधेस प्रदेशका सिटको विषयमा भने दोहोरो दाबी आइरहेको छ। दोहोरो दाबी आइरहेका प्रतिनिधि सभाका १७ सिटमध्ये धेरै मधेस प्रदेशका निर्वाचन क्षेत्र हुन्।
सिट बाँडफाँटको टुंगो लगाउन गठित कार्यदलका संयोजक एवम् नेपाली कांग्रेसका नेता कृष्ण सिटौलाले अबको २ दिनभित्र सिट बाँडफाँटको टुंगो लागिसक्ने बताए। यद्यपि सिट बाँडफाँटको विस्तृत विवरण भने उनले खुलाउन चाहेनन्।
‘अब बढीमा २ दिनभित्र सबै कुरा मिल्छ। सिट बाँडफाँट कसरी भयो, भइरहेको छ भन्ने भन्दा पनि सबै दलहरु सन्तुष्ट हुनेगरी सिट बाँडफाँट हुन्छ। छिट्टै हुनगइरहेको छ,’ सिटौलाले भने।
जसपाको दाबी– मधेस प्रदेशमा ५० प्रतिशत
मधेस प्रदेशमा जनता समाजवादी पार्टीले ५० प्रतिशत सिट आफूले पाउनुपर्ने दाबी गरेको छ। जबकि कांग्रेसले पनि ५० प्रतिशत आफूलाई र बाँकी ५० प्रतिशतमा अन्य दलको भागबण्डा हुनुपर्ने अडान लिइरहेको छ।
मधेस प्रदेशमा प्रतिनिधि र प्रदेश सभा, दुवैतर्फ जसपा र कांग्रेसको आधा–आधी सिटमा दाबेदारी छ। यस्तै, माओवादी केन्द्र र नेकपा एकीकृत समाजवादीले पनि मधेसमा ‘सम्मानजनक सिट’ पाउनुपर्ने दाबी गरिरहेका छन्।
नेपाली कांग्रेसका मधेस प्रदेशका नेताहरु अहिले पार्टीका शीर्ष नेता, सभापति देउवा र गठबन्धनको कार्यदलका नेताहरुलाई भेटेर मधेसको भागबण्डाबारे दबाब दिइरहेका छन्।
जसपाले दाबी गरेअनुसार उसको अवस्था मधेसमा ‘बलियो’ नभएको कांग्रेसका नेताहरुको रिपोर्टिङ छ।
तर, जसपाकै केही नेताहरुले मधेस प्रदेशमा आफूहरुले ५० प्रतिशत पाउने लगभग निश्चित भइसकेको अनौपचारिक रुपमा बताउने गरेका छन्।
काठमाडौंमै रहेका कांग्रेस मधेस प्रदेश समितिका सभापति कृष्ण यादवले मधेसमा सिट बाँडफाँट कसरी मिल्न गइरहेको छ भन्ने बारेमा अनभिज्ञता प्रकट गरे। तर जसपाले ५० प्रतिशत सिट पाउने भनेर सहमति भएको कुरा सत्य नभएको उनको भनाइ छ।
‘मधेसमा जसपाले ५० प्रतिशत सिट पाउने भयो भन्ने कुरामा सत्यता छैन। त्यस्तो सूचना मैले पनि कहीँ कतै पाएको छैन। यो सत्य कुरा होइन,’ यादवले नेपाल लाइभसँग भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1763721444.png)
-1763559424.jpg)
-1763559424.jpg)
