काठमाडौं– युईएफए नेसन्स लिग अन्तर्गत गएराति भएको खेलमा स्पेन स्वीट्जरल्णडसँग पराजित भएको छ।
समूह ‘बी’ रहेका स्पेन र स्वीट्जरल्याण्ड गएराति आमने सामने भएका थिए। जसअन्तर्गत स्पेनको घरेलु मैदानमा भएको खेलमा स्वीट्जरल्याण्डले स्पेनलाई २–१ गोलले हरायो।
खेलको २१औं मिनेटमा कर्नर बललाई हेडमार्फत् म्यानुअल अकिन्जीले गोल गर्दै स्वीट्जरल्याण्डलाई अग्रता दिलाएका थिए। पहिलो हाफमा १–० गोलले पछि परेको स्पेनले दोस्रो हाफको ५५औं मिनेटमा गोल गर्दै बराबरीमा फर्किएको थियो। मार्को एसेन्सियोको पासमा जोर्डी अल्बाले गोल गर्दै घरेलु टोलीलाई बराबरीमा ल्याएका थिए।
स्पेनले गोल गरेको ३ मिनेटपछि नै स्वीट्जरल्याण्डले अर्को गोल गर्दै २–१ को अग्रता बनाएको थियो। अकिन्जीको पासमा इमबोलोले ५८ औं मिनेटमा गोल गरेका थिए। समूह ‘बी’ को शीर्ष स्थानमा रहेको स्पेन हारसँगै दोस्रो स्थानमा झरेको छ।
गएराति नै भएको समूह ‘बी’ को अर्को खेलमा चेक रिपब्लिकलाई हराउँदै पोर्चुगल शीर्ष स्थानमा उक्लेको छ। स्पेनको ८ अकं हुँदा पोर्चुगलको १० अंक छ।
अब समूहको अन्तिम खेलमा स्पेन र पोर्चुगल भिड्नेछन्। स्पेनलाई सेमिफाइनल प्रवेशका लागि पोर्चुगललाई हराउनै पर्ने हुन्छ। पोर्चुगल भने बराबरी खेले मात्रै पनि सेमिफाइनल पुग्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
