काठमाडौं– निलम्बित प्रधानन्यायाधीश चोलेन्द्र शमशेर राणाकी छोरी सुनिधि राणाले वर्तमान (गठबन्धन) सरकारले आफ्नो परिवारमाथि अत्याचार गरेको आरोप लगाएकी छन्।
प्रहरी परिचालन गरेर सरकारले आफूहरुलाई नजरबन्दमा राखेको पनि राणाको भनाइ छ।
‘हामीलाई नजरबन्दमै राखिएको छ। हामीलाई यहाँबाट बाहिर निस्किने, भित्र जाने अवस्था छैन,’प्रधानन्यायाधीशको सरकारी निवास बाहिर सञ्चारकर्मीसँग बोल्दै राणाले भनिन्।
निलम्बित प्रधानन्यायाधीश राणाले बिहान १० बजेतिर अदालत जाने तयारी गरेपछि प्रहरीको टोली सरकारी निवास पुगेको थियो।
आफूविरुद्ध दर्ता भएको महाअभियोगको प्रस्ताव टुंगोमा नपुग्दै प्रतिनिधि सभाको कार्यकाल सकिएको भन्दै राणाले आइतबारदेखि अदालत जाने तयारी गरेका थिए। राणा अदालत आउने खबरपछि उनको विरोध गर्न भन्दै कानुन व्यवसायीहरु सर्वोच्च अदालतमा जम्मा भएका थिए।
राणाको प्रवेशले सर्वोच्च अदालतमा असहज स्थिति उत्पन्न हुने भन्दै प्रहरीले उनलाई निवासमै रोकेको थियो।
राणाकी छोरी सुनिधिले भने आफूहरु औषधि किन्न जान पनि नपाउने अवस्था रहेको सुनाइन्।
‘उहाँहरु (प्रहरीहरु) हामीलाई बाहिर निस्किन पनि दिइरहनु भएको छैन। बच्चाहरुलाई स्कूलबाट लिन जानुपर्छ, कसैलाई सञ्चो छैन, औषधि लिन जान पाइएको छैन,’ सुनिधिले भनिन्।
काम गर्ने मान्छे बाहिर जाँदा अराजकता मच्चायो भनेर लगेर थुन्ने काम गरेको पनि उनले सुनाइन्।
‘अराजकता त कसले मच्चाइराख्या छ भनेर त्यो त स्वतन्त्र रुपले देखिराख्या छ। सरकारको पावर देखाएर हामीलाई यस्तो गर्न खोजिराख्नुभाछ,’ सुनिधिले भनिन्, ‘अहिलेको सरकारले हामीमाथि एकदमै अन्याय, अत्याचार गरेको छ। गठबन्धनको सरकारले हामीमाथि अत्याचारै गरेको छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791869951.jpg)
-1786602170.png)
