धनगढी– डाक्टर गोविन्द केसीको २०औं अनसन दोस्रो दिन पनि जारी छ । धनगढीको एलएन चोकमा रहेको लक्ष्मीनारायण मन्दिरको धर्मशालामा अनसनरत चिकित्सा शिक्षा सुधारका अभियान्ता डाक्टर गोविन्द केसीको स्वास्थ्य अवस्था सामान्य रहेको छ । केसीका सहयोगी अमृत जैसीका अनुसार डा केसीको २०औं सत्याग्रहको मंगलबार दोस्रो दिन सबै चेकजाँचहरु गर्दा स्वास्थ्यमा केही कमजोरी आएको छ ।
‘डाक्टर साबको शरीर अहिले केही कमजोर हुँदै गएको छ । रोगसँग लड्न सक्ने प्रतिरोधात्मक क्षमता कमी भएको छ । बोल्न सक्ने क्षमता पनि केही कमी आएको छ’ उनले भने ‘मंगलबार बिहान स्वास्थ्य परीक्षण गर्दा सामान्य थियो । साँझ शरीर कमजोर बनेकाले बुधबारमात्र स्वास्थ्य परीक्षण गरेपछि उनको शरीरको अवस्थाबारे जानकारी हुनेछ ।’
डाक्टर केसी अनसन बसेको दोस्रा दिन भइसक्दा समेत उनको मागप्रति सरकारले कुनै प्रतिक्रिया दिएको छैन । ‘डाक्टर साबसँग सिधै सरकारबाट कुनै प्रतिक्रिया आएको छैन’ उनले भने, ‘अनौपचारिक रुपमा मागबारे के गर्न सकिन्छ भन्नेबारे पहल भइरहेकोबारे विभिन्न व्यक्तिहरुबाट प्रतिक्रिया आइरहेको छ ।’ उनले सरकारले एक दुई दिनमै वार्ता टोली गठन गरी उनको मागबारे छलफल अघि बढाउने तयारी भइरहेको बारे जानकारी आएको बताए । ‘भोलिसम्म वार्ता टोली गठन गरी छलफलका लागि पठाउने भन्ने जानकारी आएको छ’ उनले भने ।
मंगलबार बिहान पूर्वप्रधानमन्त्री डाक्टर बाबुराम भट्टराईले सार्वजनिक स्वास्थ्य शिक्षा क्षेत्र सुधारको माग राख्दै २०औं पटक सत्याग्रह बस्नु सबैको लागि लज्जाको विषय भएको बताए ।
डाक्टर केसीले सोमबारदेखि २०औं अनसन सुरु गरेको विषयबारे मंगलबार सामाजिक सञ्जाल ट्वीटरमार्फत उनले लेखेका छन्- ‘सार्वजनिक स्वास्थ्य र शिक्षा क्षेत्रको सुधारको विषयलाई लिएर डाक्टर केसीले २०औं पटक अनसनमा बस्न पर्नु राज्य र हामी सबैलाई लज्जाको विषय हो ।’
डाक्टर केसीको दोस्रो दिनको अनसनमा सेती प्रादेशिक अस्पतालमा कार्यरत अस्पतालका मेडिकल सुपरिटेण्डेण्ट डाक्टर हेमराज पाण्डे लगायत विशेषज्ञ चिकित्सकहरुले भेटघाट गर्दै उनको अनसनमा समर्थन जनाएका छन । डाक्टर पाण्डेले उनलाई आवश्यक पर्ने सम्पूर्ण उपचारका लागि चिकित्सकहरु तयारी अवस्थामा रहेको बताएका थिए ।
डाक्टर केसीले स्वास्थ्य सेवामा सुधारका लागि तोकिएको दरबन्दी अनुसारको क्षमताभन्दा बढी बेडमा चलिरहेका देशका सबै सरकारी अस्पतालहरुको दरबन्दी तत्काल हालको बेड संख्या अनुसार बढाउनुपर्ने माग राखेका छन् ।
त्यस्तै, जनसंख्याको वृद्धि अनुसार सरकारी स्वास्थ्य केन्द्र र अस्पतालहरुको निर्माण, स्तरोन्नति र गुणस्तर वृद्धि सुनिश्चित गरिनुपर्ने माग राखेका छन् । ‘स्वास्थ्य विज्ञान प्रतिष्ठानसम्बन्धी छाता ऐन जारी गरियोस् । आवश्यक कानुनी व्यवस्था गरी गेटा मेडिकल कलेजलाई तत्काल सञ्चालन गर्ने व्यवस्था गरियोस् । विभिन्न प्रतिष्ठानहरुमा जनशक्तिको अभाव पुर्ति गर्दै दाङ लगायत मधेश र गण्डकी प्रदेशमा तुरुन्त सरकारी मेडिकल शिक्षण संस्था निर्माण शुरु गरियोस् । चिकित्सा शिक्षा ऐनअनुसार २०८० सालसम्म सबै प्रदेशमा त्यस्ता संस्था सञ्चालनमा आउन् । यसअगाडि हामीसित सम्झौता भएबमभोजिम इलाम, उदयपुर र डडेल्धुरामा पनि सरकारी मेडिकल कलेज निर्माणको काम अघि बढाइयोस’, उनले भनेका छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1765528419.png)
-1763721444.png)
-1765273665.jpg)
