समाचार

कर बुझाउन ४५ संस्थालाई महानगरको पत्र, ५ वटाले मात्रै बुझाउँदा उठ्यो ७१ लाख २५ हजार

सुरेन्द्र बजगाईं सोमबार, भदौ २७, २०७९ १५:३९

काठमाडौं– काठमाडौं महानगरपालिकाले ४५ वटा संस्थालाई राजश्व बुझाउन पत्र काटेकोमा ५ वटा संस्थाले मात्रै महानगरलाई राजश्व बुझाएका छन्।

महानगरले केहि समयअगाडि मनोरञ्जन कर र सम्पत्ति कर बुझाउन ति संस्थाहरुलाई पत्राचार गरेको थियो। तर हालसम्म ५ वटा संस्थाले मात्रै महानगरलाई कर बुझाएको पाइएको छ। ति ५ सस्थाहरुले मात्रै महानगरलाई ७१ लाख २५ हजार कर बुझाएका छन्।

महानगरले पछिल्लो समय कर तिर्न बाँकी संस्थाहरुलाई कर तिर्नको लागि ताकेता गर्न सुरु गरेको थियो। महानगरका मेयर बालेन्द्र शाह (बालेन) निर्वाचित भएपछि बाँकी कर उठाउन अभियान नै चलाएको हो। महानगरले भदौ १५ देखि भदौ २३ गतेसम्म विभिन्न संस्थालाई कर तिर्न भन्दै पत्राचार गरेको थियो।

महानगरलाई कर बुझाउनेमा काठमाडौं फन पार्क, डेल्टिन क्यासिनो, माजोङ्ग इन्टरटेनमेन्ट र सिविक अस्पताल रहेका छन्।

करदाताहरुको नाम	पत्राचार मिति	करको प्रकार	रकम बुझाएको मिति	बुझाएको रकम
काठमाडौं फन पार्क	२०७९/०५/१५	मनोरञ्जन कर	२०७९/०५/१६	१७,३६,०११ ।–
डेल्टीन क्यासिनो र होटल म्यारियट	२०७९/०५/१९	मनोरञ्जन कर	२०७९/०५/२३	२१,४२,०३४।–
बेल्जियम क्यासिनो र मल्ल होटल	२०७९/०५/१९	मनोरञ्जन कर	२०७९/०५/२३	१३,८८,३६३।–
माजोङ्ग इन्टरटेन्मेन्ट र होटल सोल्टी	२०७९/०५/१९	मनोरञ्जन कर	२०७९/०५/२३	९,९३,६००।–
सिविक अस्पताल प्रालि	२०७९/०५/१९	सम्पत्ति कर	२०७९/०५/२३	८,६५,३८०।–

महानगरपालिकाले काठमाडौं फन पार्कलाई २४ घण्टाभित्र कर बुझाउन भदौ १६ गते पत्र काटेको थियो। उक्त पार्कले त्यसको भोलिपल्टैै महानगरलाई १७ लाखभन्दा बढी कर मनोरञ्जन कर बुझाएको थियो।

यस्तै महानगरले भदौ १९ गते एक हप्ताभित्र मनोरञ्जन कर तिर्न ७ वटा क्यासिनोलाई पत्राचार गरेको थियो। महानगरपालिकाले डेल्टीन क्यासिनो, होटेल म्यारियट, क्यासिनो प्यालेस, अन्नपुर्ण होटेल, क्यासिनो च्याट, याडिसन होटेल, प्राइड इन्भेस्टमेन्ट एन्ड रिक्रीएसन, हायात होटेल, माजोङ्ग इन्भेस्टमेन्ट होटेल, सोल्टी, बाल्को क्यासिनो होटेल, एलफ्ट, बेली क्यासिनो,मल्ल होटेललाई कर तिर्न ताकेता गरेको हो। थियो। तर एक म्याद गुज्रँदा समेत पत्राचार भएको ७ क्यासिनो मध्य ४ वटा क्यासिनोले मात्रै महानगरलाई कर तिरेको छ। ती सस्थाहरुले टिकेटको ५ प्रतिशत कर महानगरलाई बुझाउनु पर्छ।

भदौ २३ गते महानगरलाई कर नतिर्नेमा शंकरदेव क्याम्पस, आर.आर. क्याम्पस, नेपाल ल क्याम्पस, वीर अस्पताल, महाबौद्ध, दशरथ रङ्गशाला, सरस्वती बहुमुखी क्याम्पस, नेपाल कमर्श क्याम्पसलाई १० दिनभित्र कर जरिवाना तिर्न अनुरोध गरेको छ। तर उनीहरूले अहिलेसम्म महानगरलाई कर तिरेका छैनन्।

यस्तै सोहीदिन नेपाल आर्मी केन्द्रीय कार्यालय, समाज कल्याण परिषद्, नेपाल प्रहरीको केन्द्रीय कार्यालयलाई महानगरले १० दिन भित्र कर बुझाउन पत्र काटेको छ। महानगरले तोकेको समयमा कर नतिरे महानगरको राजश्व ऐन, २०७५ बमोजिम कार्यवाही गरी सरकारी बाँकी कर असुल उपर गर्न आवश्यक प्रक्रिया अगाडि बढाउनेसम्म चेतावनी दिएको छ।

अहिले महानगरपालिकाले मात्रै नभएर सम्बन्धित वडाहरूले पनि महानगरलाई तिर्न बाँकी कर बुझाउनको लागि पत्र काट्ने गरेको राजस्व विभाग प्रमुख डा. शिव अधिकारी बताउँछन्। ‘कर उठाउनु हाम्रो निरन्तर प्रक्रिया हो। अघिल्ला वर्षहरूमा त हामीले बाजा बजाएर नै कर तिर्न बाँकी संस्थाहरूमा गएका थियौं। यसरी अघिल्लो साल २० करोड भन्दा धेरै राजस्व सङ्कलन भएको थियो’अधिकारीले भने।

अहिले आर्थिक वर्षको तोस्रो महिनामा छ। यति समयमा नै महानगरले महानगरलाई ७१ लाख २५ हजार राजश्व उठाउनु सकारात्मक भएको विभागको भनाइ छ।

‘महानगरले कर तिर्न निरन्तर ताकेता गरिरहेको छ। तर अटेर गर्नेलाई कानुन अनुसारको कारबाही हुन्छ’ राजश्व विभाग प्रमुख अधिकारीले भने।